ކޮވިޑް ޖެހިގެން އިތުރު ދިވެއްސަކު ނިޔާވެއްޖެ
ކޮވިޑް-19 ޖެހިގެން ރާއްޖޭގައި އިތުރު މީހަކު ނިޔާވެއްޖެއެވެ. މިއީ މި މަސް ތެރޭގައި މި ބަލީގައި ރާއްޖޭގައި ނިޔާވި 10 ވަނަ މީހާއެވެ.
އެޗްޕީއޭއިން ވިދާޅުވީ ދަރުމަވަންތަ ހޮސްޕިޓަލުގެ ކޮވިޑް ފެސިލިޓީގައި ފަރުވާ ދެމުން އައި މީހަކު މިއަދު ފަތިހު 05:06 ގައި، ނިޔާވެފައިވާ ކަމަށެވެ. ނިޔާވެފައިވަނީ އުމުރުން 62 އަހަރުގެ ދިވެހި ފިރިހެނެކެވެ.
މިއީ ރާއްޖޭގައި ކޮވިޑް-19 ޖެހިގެން ނިޔާވި 62 ވަނަ މީހާއެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވާ، ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން. އަދި މި ހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން
إِنَّا لِلّهِ وَإِنَّـا إِلَيْهِ رَاجِعُون
އިއްޔެ ވެސް ކޮވިޑް-19 ޖެހިގެން ރާއްޖޭގައި މީހަކު ނިޔާވެފައިވެއެވެ. ނިޔާވެފައިވަނީ ހުޅުމާލެ ކޮވިޑް ފެސިލިޓީގައި ފަރުވާ ދެމުން ގެންދިޔަ 80 އަހަރުގެ މީހެކެވެ.
މި ދުވަސްވަރު ރާއްޖޭގައި ކޮވިޑް-19 ފެތުރޭ މިންވަރު އަނެއްކާ ވެސް މިވަނީ އިތުރުވެފައެވެ. އެގޮތުން ކޮންމެ ދުވަަހަކު ވެސް ފައްސި އެތައް ކޭސްތަކެއް ފެންނަމުން ދާއިރު މި ބައްޔަށް ހޮސްޕިޓަލުގައި ފަރުވާ ދެމުންދާ މީހުންގެ އަދަދު ވެސް ވަނީ ބޮޑުތަނުން އިތުރުވެފައެވެ.
