7 އަހަރުގެ މިކުއްޖާ ސިކުނޑީގެ އޮޕަރޭޝަނަށް ރުފިޔާ އެއްކުރީ ލުނބޯހުތުފަނި ތައްޔާރުކޮށް އެ ވިއްކައިގެން!
އެމެރިކާގެ އަލްބާމާގައި ދިރިއުޅޭ ކުޑަކުޑަ އާއިލާއެއްގެ އުމުރުން ހަތް އަހަރުގެ މި ކުޑަކުޑަ ކުއްޖާއަކީ އުފަންވީއްސުރެ ސިކުނޑީގައި އާދަޔާ ޚިލާފު ގޮތެއް ހުންނަ ކުއްޖެކެވެ.
ބޭރުގެ މީޑިއާތަކުން މައުލޫމާތު ލިބިފައިވާ ގޮތުގައި މި ކުއްޖާއަކީ ވަރަށް މަދުން ނޫނީ ނުފެންނަ ބައްޔެއް ހުންނަ ކުއްޖެއް ކަމަށާއި އެގޮތުން އެކުއްޖާގެ ބޮލުގައި އިތުރު ސިކުނޑިއެއް އިންނަ ކަމުގައި ޑޮކްޓަރުން ވަނީ ބުނެފައެވެ.
އެގޮތުން ކުރަން ޖެހޭ އޮޕަރޭޝަނަކީ ފުދޭވަރަކަށް ބޮޑު އޮޕަރޭޝަނަކަށް ވެފައި އެއަށް ދާ ޚަރަދަކީ ވެސް ފުދޭ ވަރަކަށް ބޮޑު ޚަރަދަކަށް ވުމުން އާއިލާއަށް އެކަން ވީ ބޮޑު ގޮން ޖެހުމަކަށެވެ. އެހެންނަމަވެސް މި ކުއްޖާގެ ތޫނުފިލި ވިސްނުމާއެކު ކުރި ކުޑަކުޑަ ވިޔަފާރިއަކާއެކު އޮޕަރޭޝަނަށް ޚަރަދު ކުރާނެ ވަރަށް ފައިސާ ވަނީ އެއްކޮށްފައެވެ.
އެއީ ގޭގައި އިނދެގެން ލުނބޯ ހުތު ޖޫސް ތައްޔާރުކޮށް އެ ވިއްކައިގެން ލިބުނު ފައިސާއިންނެވެ. ބޭރުގެ މީޑިއާތަކަށް މައުލޫމާތު ލިބޭ ގޮތުގައި މިހާރު މިކުއްޖާ ވަނީ ސިކުނޑީގެ އޮޕަރޭޝަން ކާމިޔާބު ކަމާއެކު ކޮށް ނިންމާލާފައެވެ. އަދި މިހާރު ހާލު ވެސް ރަނގަޅު ވަމުން އަންނަ ކަމަށާއި، މިކަމުގައި އޭނާއަށް އެކި ގޮތްގޮތުން އެހީތެރި ވެދިން އެންމެހާ ފަރާތްތަކަށް އޭނާގެ އާއިލާއިން ވަނީ ޚާއްސަ ޝުކުރެއް ވެސް އަދާ ކޮށްފައެވެ.
