މިއީ ދޮގާއި މަކަރާއި ހީލަތުން ކުރިއަށްދާ ޒާތީ މައްސަލައެއް: މަލީހް
އިތުބާރު ނެތް ކަމުގެ މައްސަލައަކީ ދޮގާއި މަކަރާއި ހީލަތުން ކުރިއަށްދާ ޒާތީ މައްސަލައެއް ކަމަށް ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
އިތުބާރު ނެތް ކަމުގެ މައްސަލައިގެ ބަހުސް މިހާރު ރައްޔިތުންގެ މަޖިލީހުގައި ކުރިއަށްދާއިރު، ޖަވާބު ދާރީ ވަމުން މަލީހު ވިދާޅުވީ އިތުބާރު ނެތްކަމުގެ މައްސަލައާ ގުޅިގެން މިހާތަނަށް ހުރިހާ އިޖުރާއަތްތަކެއް ވެސް ކުރިއަށް ދަނީ ދޮގާއި މަކަރާއި އޮޅުވާލުމުގެ ތެރެއިން ކަމަށެވެ.
މަލީހް ވިދާޅުވީ މަޖިލީހަށް ހާޒިރުވެ ހުރީ ވަޒީފާ ދިފާއު ކުރަން ނޫން ކަމަށެވެ. އަދި މަޖިލީހަށް ވަޑައިގަތީ ގާނޫނޫ އަސާސީގެ 27 ވަނަ މާއްދާ ދިފާއު ކުރަން ކަމުގައި މަލީހު ވަނީ ވިދާޅުވެފައެވެ.
މިނިސްޓަރު މަލީހް ވިދާޅުވީ އިތުބާރު ނެތްކަމުގެ މައްސަލަ ހުށަހަޅާފައިވަނީ ގަވައިދެއް ނުހަދައިގެން ނޫންކަމަށާއި، މި މައްސަލަ ހުށަހަޅާފައިވަނީ 13 ނޮވެމްބަރު 2020 ގައި ވީޓީވީގައި ދެއްކި ވާހަކައަކާ ގުޅިގެން ކަމަށެވެ.
މަލީހު ވަނީ އެމްޑީޕީގެ އިންސާފުގެ ދަތުރުގެ އޮޑި ފެތުނީތޯ ސުވާލު ކުރައްވާފައެވެ.
އޭނާއަކީ ރިޔާސީ ނިޒަމަށް ތާއީދުކުރާ ބަރުލަމާނީ ނިޒާމަށް ތާއީދު ނުކުރާ މީހެއްކަން ފާހަގަކޮށް މަލީހު ވިދާޅުވީ ޤާނޫނުއަސާސީގެ މާއްދާ 27ގެ ބޭނުން ހިފާނެ ކަމަށެވެ.
14 މެންބަރުން ސޮއިކުރައްވާ މަޖިލީހަށް ވައްދާފައިވާ އިތުބާރު ނެތްކަމުގެ މައްސަލައަކީ ވަޒީރެއްގެ ނަން ކިލަނބު ކޮށްލުމަށް ހުށައެޅުއްވި ޒާތީ މައްސަލައެއް ކަމަށާއި އެ މައްސަލައާ ގުޅިގެން ހުރިހާ އިޖުރާއަތެއް ކުރިއަށް ގެންދިޔައީ ދޮގާއި މަކަރާއި އެކުކަމަށް ވެސް މަލީހު ވިދާޅުވިއެވެ.
"އަޅުގަނޑަށް އަދަބު ދޭން ތި އުޅުއްވަނީ ތިން މިނިސްޓަރުކަމުގައި ނުނިމިވާ ކަމެއް އަޅުގަނޑު ނިންމީމަތޯ؟ ގާނޫނު ފާސްކުރީ 2015 ވަނަ އަހަރު. ގަވާއިދު ހަދަން ޖެހެނީ ތިން މަހާ ހަ މަހާ ދެމެދުގެ މުއްދަތެއްގަ. އެ މުއްދަތުގައި ގަވާއިދު ނުހަދައިފި ނަމަ އަމަލުކުރަންޖެހޭ ގޮތް ގާނޫނުގައި ވެސް ބަޔާން ނުކުރޭ. މިނިސްޓަރު [ޒިންމާ] ނަންގަވަންޖެހޭ ކަމަށް ވާނަމަ، މިނިސްޓަރު އުމަރު ނަސީރުގެ މައްޗަށް ނަގަންޖެހޭ އިތުބާރުގެ މައްސަލައެއް އަޅުގަނޑާ ހަމައަށް ސޮއްސާލައިގެން މި އައީ ކީއްވެތޯ؟ ކޮބާތޯ ފަހުން މިނިސްޓަރު ކަމާ ހަވާލުވެވަޑައިގެންނެވި ޒުހޫރު؟ ކޮބާތޯ އޭގެ ފަހުން މިނިސްޓަރުކަމާ ހަވާލުވެލެއްވި އަޒްލީން؟" މަލީހު ސުވާލު އުފެއްދެވި އެވެ.
ޓެލެކޮމިއުނިކޭޝަން ޤާނޫނުގެ ދަށުން ހަދަންޖެހޭ ޤަވާއިދުތަކެއް ހަދާފައި ނުވާކަމަށް މަޖިލީހުގެ މެންބަރުން ތުހުމަތު ކުރާއިރު، އެ ޤަވާއިދުތަކަކީ ރައީސް އިބްރާހީމް މުޙައްމަދު ޞާލިޙްގެ ވެރިކަމުގެ 2 އަހަރުގެ ތެރޭގައި ހަދާ ނިންމާފައިވާ ޤަވާއިދުތަކެއް ކަމަށް ވެސް މަލީހު ވިދާޅުވިއެވެ. އަދި އެ ޤަވާއިދުތައް އެކުލަވާލުމަށް ކުރި ބުރަ މަސައްކަތް ފާހަގަ ކުރައްވާ މަލީހު ވަނީ ޓެލެކޮމިއުނިކޭޝަން އޮތޯރިޓީގެ މުވައްޒަފުންނަށް ޝުކުރު އަދާ ކުރައްވާފައެވެ.
ކަލޯ ތަނެއްދޮރެއް ބަލައިނުލާ ޔާމީނަށް ވަގަށް ގޮވިއިރު،ޚުދު ތިމާއަށް މިފަދަ ދުވަހަކާއި ކުރިމަތި ލާންޖެހިދާނެ ކަމަށް ނުވިސްނި އޮތުމަކީ، ތިމާގެ އީންމާންތެރި ކަމެއް ނެތްކަމުގެ ދަލީލެކެވެ.