އެޗްޕީއޭއަށް ކުރި އިޙްތިރާމް ގެއްލިއްޖެ: ޝެއިޚް ޒައިދު
ހެލްތު ޕްރޮޓެކްޝަން އޭޖެންސީ (އެޗްޕީއޭ) އަށް ކުރި އިޙްތިރާމް ގެއްލިއްޖެ ކަމަށް ދީނީ ޢިލްމުވެރިޔާ ޝެއިޚް ޢަލީ ޒައިދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މެދު ހެންވޭރު ދާއިރާގެ އެމްޑީޕީ މެމްބަރު ޢަލީ އާޒިމްގެ އުފަން ދުވަސް ފާހަގަ ކުރުމަށް މިއަދު މަޖިލިސް އިދާރާގައި ބޭއްވި ކުޑަ ޙަފްލާއެއްގެ ވީޑިއޯއެއް ހިއްސާ ކުރައްވަމުން ޝެއިޚް ޒައިދު ސުވާލު ކުރައްވާ ވިދާޅުވީ އެއީ ތިން ފޫޓު ދުރުގައި ޤަވާއިދާ އެއްގޮތަށް ބޭއްވުނު ޕާޓީއެއް ތޯއެވެ.
"އަޅުގަނޑު އެޗްޕީއޭ އަށް ކުރި އިޙްތިރާމް ގެއްލިއްޖެ. ދެން ވެސް ބުނާނީ ކޭސްތައް ބޮއްސުންލީ މިސްކިތާ ގުޅިގެން ކަމަށްތޯ؟" އެޗްޕީއޭ ޓެގް ކުރައްވާ ޝެއިޚް ޒައިދު ސުވާލު ކުރައްވާފައިވެއެވެ.
ކޮވިޑް-19 ފެތުރެމުން ދިޔުމާ ގުޅިގެން، އެކަން ކޮންޓްރޯލް ކުރުމުގެ ގޮތުން އެޗްޕީއޭ އިން ވަނީ މާލެ ސަރަޙައްދުގެ މިސްކިތްތަކުގައި ޖަމާޢަތުގައި ނަމާދުކުރުން ވަގުތީ ގޮތުން ބަންދު ކުރުމަށް އިސްލާމިކް މިނިސްޓްރީގައި އެދިފައެވެ.
އެކަމާ ގުޅިގެން އެ މިނިސްޓްރީން ކަމާއި ގުޅުންހުރި ފަރާތްތަކާ މަޝްވަރާ ކުރެއްވުމަށްފަހު ނިންމެވީ، މިސްކިތްތަކުގައި ޖަމާޢަތުގައި ނަމާދު ކުރާއިރު ގައިދުރުކޮށް ސަފު ހެދުމަށެވެ. މިކަމާމެދު ދީނީ ބައެއް ޢިލްމުވެރިން ވަނީ ކަންބޮޑުވުން ފާޅު ކުރައްވާފައެވެ.
ދުއާ ދެއްވި ރައީސަށް އިތުބާރު ކޮށްގެން ކަލޭ ހުރޭ. އެހެން މީހަކަށް އިތުބާރު ކުރާކަށް ނުޖެހޭ.