އަލީ އާޒިމަކީ ވަރަށް "ރޭސިސްޓު ބޭފުޅެއް": ޝިޔާމް
އެމްޑީޕީގެ ޕާލިމެންޓަރީ ގުރޫޕުގެ ލީޑަރު އަލީ އާޒިމް އަކީ ނަސްލީ ތަފާތު ކުރުންތައް ގެންގުޅޭ، ވަރަށް "ރޭސިސްޓު" ބޭފުޅެއް ކަމުގައި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
ނުކުޅެދުންތެރިކަން ހުންނަ ފަރާތްތަކުގެ ހައްގުތައް ރައްކާތެރިކުރުމަށް ގޮވާލާ އިދިކޮޅުން ހުށަހެޅުއްވި ގަރާރަށް މެދު ހެންވޭރު ދާއިރާގެ މެންބަރު އަލީ އާޒިމް ބަހުސް ކުރައްވަމުން ގެންދަވަނިކޮށް، ނިޒާމީ ނުކުތާ ނަންގަވައި ޝިޔާމް ވަނީ އާޒިމް އަކީ ވަރަށް ރޭސިސްޓު ބޭފުޅެއް ކަމަށް ވިދާޅުވެފައެވެ.
"އަޅުގަނޑު ފާހަގަކުރަން އެމްޑީޕީގެ ޕާލިމެންޓަރީ ގުރޫޕުގެ ލީޑަރު ޑީއާރުޕީގައި އުޅުއްވި އިރު ކަންތައް ކުރެވިގޮތް އަދި ހަނދާން އެބަހުރި.. އެމްޑީޕީގައި އުޅުއްވިއިރު ކަންތައްތައް ކުރެއްވި ގޮތް އަދި ހަނދާނެއް ނެތް. ވަރަށް ރޭސިސްޓު ބޭފުޅެއް. މާފުކުރައްވާ އަޅުގަނޑަށް ވަގުތުކޮޅެއް ދެއްވާ،" ޝިޔާމް ވިދާޅުވިއެވެ.
ޝިޔާމްގެ ނިޒާމީ ނުކުތާއާ ގުޅިގެން މަޖިލީހުގެ ރިޔާސަތުގައި އިންނެވި ހަސަން އަފީފް ވަނީ މަޖިލިސް މެންބަރުންނާ ވާހަކަދައްކަވާއިރު އެފަދަ އިބާރާތްތައް ބޭނުން ނުކުރުމަށް އެދިވަޑައިގެންފައެވެ.
ޝިޔާމްގެ ނިޒާމީ ނުކުތާއަށް ފަހު އަލީ އާޒިމް ވިދާޅުވީ ކެލާ ޝަރީފް އޭ ބުނުމުން އެއީ ކެލާ ދަށް ކޮށްލީ ކަމަށް އެބޭފުޅާ ގަބޫލު ނުކުރައްވާ ކަމަށެވެ. ނަމަވެސް އޭނާ އެއްދުވަހަކު މަޖިލީހުގައި ދެއްކެވި ވާހަކަތަކަކީ"ރޭސިސްޓު" ވާހަކަތަކެއްކަމަށް ދެކެވުނު ފަރާތްތަކުގެ ކިބައިން މާފަށް އެދޭ ކަމަށް އަލީ އާޒިމް ވިދާޅުވިއެވެ.
