ފަސް މީހުންނަށް ވުރެ ގިނައިން މަގުމަތީ އެއްވެ އުޅުން މަނާކޮށްފި

މާލޭގެ މަގުމަތީގައި 5 މީހުނަށް ވުރެ ގިނަ މީހުން އެއްވެ އުޅުން މަނާ ކޮށްފިއެވެ.

Ads by STELCO

ޑިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަރުކު ސޮއިކުރައްވާ ނެރުއްވި އެންގެވުމެއްގައި ވަނީ އާއްމު ސިއްހަތު ރައްކާތެރިކުރުމުގެ ގާނޫނުން އެކަމަނާ އަށް ލިބިދީފައިވާ ބާރުގެ ދަށުން މާލެ ސަރަހައްދު [މާލެ، ހުޅުމާޅެ، ވިލިމާލެ، ތިލަފުށި، ގުޅީފަޅު އަދި ހުޅުލެ] ގައި އެއްފަހަރާ ފަސް މީހުންނަށް ވުރެ ގިނަ މީހުން މަގުމައްޗާއި އާންމު ތަންތަނަށް އެއްވެ އުޅުން ހުއްޓައިލުމަށް އަންގާ ކަމަށެވެ. މި ފިޔަަވަޅު އަޅާފައި ވަނީ އެއް ހަފްތާގެ މުއްދަތަށެވެ.

ކޮވިޑް-19 ކޭސްތައް މާލޭގައި އިތުރުވުމާއެކު، މީގެ ކުރިން އެޗްޕީއޭއިން އަންގާފައި އޮތީ 10 މީހުންނަށް ވުރެ ގިނަ މީހުން މަގުމަތީގައި އެއްވެ ނޫޅެވޭ ގޮތަށެވެ.

މީގެ އިތުރުން ވެސް އެޗްޕީއޭއިން ވަނީ ކޮވިޑް-19 އާ ގުޅިގެން އަޅާފައިވާ ބައެއް ފިޔަވަޅުތައް ހަރުކަށިކޮށް، އިތުރު ބައެއް ފިޔަވަޅުތައް އަޅާފައެވެ.

އިތުރު ފިޔަވަޅުތައް:

• ސިނަމާތަކާއި ފިލްމު ތިއޭޓަރުތައް ހިންގުން ހުއްޓައިލުން
• ދުވުމަށް ހާއްސަ ކޮށްފައިވާ ޓްރެކުތައް ބަންދުކުރުން
• ޕާކުތަކާއި މައިޒާންތައް ބަންދުކުރުން
• ޔުނިވާސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދިއުން ހުއްޓައިލުން
• އެކަނި ކުރާ ކަސްރަތުތައް ފިޔަވައި، ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހުއްޓައިލުން

އޭގެ އިތުރުން އެޗްޕީއޭ އިން ވަކިގޮތެއް އަންގަންދެން ވެސް ބައެއް ކަހަަލަ ފިޔަވަޅުތައް ދަމަހައްޓަން ވަނީ ނިންމައިފައެވެ.

• ޖިމްތަކުގައި، ހަމައެކަނި، އެކަނި ކުރާ ކަސްރަތުތައް ކުރުމަށް ހަމަޖެއްސުން
• ހާއްސަ ހުއްދައިގެ ދަށުން ޒަރޫރީ ބޭނުންތަކަށް މާލެ ސަރަހައްދުން ރަށްރަށަށް ދާ ފަރާތްތަކުން ދަތުރުކުރުމުގެ 72 ގަޑިއިރުގެ ތެރޭގައި ހަދައިފައިވާ ނެގެޓިވް ޕީސީއާރު ޓެސްޓު އޮތުން
• ޕްރީ ސްކޫލުތަކާއި، ނާސަރީތަކުގައި ކިޔަވައިދިނުން ހުއްޓައިލުން
• ޑޭ ކެއާގެ ހިދުމަތް ދޭ ތަންތަނުން ދެމުންގެންދާ ހިދުމަތްތައް ދިނުން ހުއްޓައިލުން