ސުނީތާ: ފަސްބައި ކިލަނބު ނުކޮށް، ރާއްޖޭގައި އެންމެ މަޝްހޫރުވި ހިތްވަރުގަދަ އެއް ފަންނާނު!
ދިވެހި ފިލްމީތަރި އަދި ނެށުންތެރިޔާ ސުނީތާ ޢަލީ އަކީ އާ މޫނަކަށް ނުވާނެއެވެ.
ކުރިން ހަމައެކަނި ދިވެހި ސިނަމާތަކުން ސުނީތާ މަޝްހޫރުވި ނަމަވެސް، އެއަށްވުރެ ބޮޑު މަޝްހޫރުކަމެއް އޭނާ ހޯދީ ބޮލީވުޑްގެ މަޝްހޫރު އެއް ބަޠަލާކަމަށްވާ ޕްރިޔާންކާ ޗޯޕްރާގެ އެންމެބޮޑު އެއް ފޭނަށް ވުމުންނެވެ.
ސުނީތާއަށް ފުރައްސާރަކުރި އެތައްބަޔަކު އާންމުންގެ ތެރެއިންނާއި ޚުދު ފިލްމީ ދާއިރާގައި ވީ ނަމަވެސް، 2015 ވަަނަ އަހަރުގެ ޖެނުއަރީ މަހު ޕްރިޔާންކާ ރާއްޖެއަށް ކުރި ޒިޔާރަތާއެކު އެފަދަ ކިތަންމެ ބައެއްގެ އަނގަތައް ވަނީ ބަންދު ކޮށްލާފައެވެ.
ޕްރިޔާންކާ ހެދުން އަޅާގޮތަށް ސުނީތާ ހެދުން އެޅުން ވެސް އޭނާއަށް ވަރަށް ކަމުދިޔައެވެ. ޕްރިޔާންކާ އެދުވަހު ބުނީ، އޭނާ އަށްވުރެ ސުނީތާ އެހެދުންތައް ލާފައި ހުންނައިރު ރީތި ކަމަށެވެ.
ސުނީތާގެ ހަގީގީ މަޝްހޫރުކަން ފެށިފައި ވަނީ އެހިސާބުންނެވެ. ޕްރިޔާންކާއާއި ސުނީތާގެ އެކުވެރިކަން އެދުވަހަށްފަހު ބަދަހިވުމުގެ އިތުރުން، އިންޑިއާގެ ބައެއް ރިޕޯޓުތަކަށް ވެސް ސުނީތާގެ ވާހަކަތައް ވަނީ އަރާފައެވެ.
ދެހާސް ސަތާރަ ވަނަ އަހަރު "ޖީކިޔު އިންޑިއާ" އިން ޝާއިޢު ކޮށްފައިވާ ރިޕޯޓެއްގައި ސުނީތާއާ ބެހޭގޮތުން ވަރަށް ގިނަ މައުލޫމާތު ލިޔެފައިވެއެވެ. އެ ނޫހުގެ ނޫސްވެރިން ވަނީ ސުނީތާއާ ބައްދަލުކޮށް، އޭނާގެ ބަސްދީގަތުމެެއް ނަގާފައިކަމަށް އެރިޕޯޓުގައި ބުނެފައި ވެއެވެ.
އެގޮތުން ސުނީތާ އުފަންވީ 1980 ވަނަ އަހަރު އއ. އުކުޅަހަށް ކަމަށާއި އޭނާގެ ބައްޕައަކީ މަސްވެރިއެއް ކަމުގައިވެސް ލިޔެފައިވެއެވެ.
މީގެއިތުރުން އުމުރުން 13 އަހަރުގައި ސުނީތާ އޭނާގެ އޭރުގެ އެންމެ ގާތް އެކުވެރިޔާއާ ކައިވެނި ކުރި ކަމަށާއި އެކައިވެނި ކުރަން ފުރަތަމަ އޭނާގެ މައިންބަފައިން ނުރުހުނު ކަމުގައިވިޔަސް ފަހުން އެއްބަސްވި ކަމަށް ލިޔެފައިވެއެވެ. ނަމަވެސް އޭގެ ތިން މަސް ފަހުން އެކައިވެނި ރޫޅުނެވެ. ސަބަބަކަށްވީ، އޭނާގެ އުމުރުގެ އެހެން ފިރިހެން ކުދިންނާއެކު އެކި ކުޅިވަރުތައް ކުޅެން ނުފޮނުވުން ކަމުގައި ސުނީތާ ބުނި ކަމަށް ވެސް އެރިޕޯޓުގައިވެއެވެ.
އުމުރުން 14 އަހަރުގައި، ރަށުން މާލެ އައިސް ސުނީތާގެ ދެބެންގެ ދެ ދަރި މީހެއް ގާތު ސުނީތާ ދިރިއުޅެން ފެށި ކަމަށާއި އެގޭގައި އުޅުނުއިރު ޓީވީ ހުޅުވައިގެން އަންނަ ލަވަތަކަށް ނެށި ކަމަށް ވެސް ސުނީތާ ބުނެފައިވެއެވެ. އޭނާ ބޭނުންވީ.މަދޫރީ ދިކްޝިތު ފަދަ ހުނަރުވެރި ނެށުންތެރިއަކަށް ވާށެވެ.
އެރިޕޯޓުގައި ދެން ހުރީ ސުނީތާ ކޮށްފައިވާ މަސައްކަތްތަކާ، އޭނާ ޕްރިޔާންކާއަށް ލޯބިކުރާ ވަރެވެ. އިންްޑިއާގެ އެ ރިޕޯޓަރުން ސުނީތާ ފާހަގަ ކޮށްފައި ވަނީ ވަރަށް ވެސް ހިތްހެޔޮ، އަދި އެހާމެ އެކުވެރި ފަންނާނެއްގެ ގޮތުގައެވެ.
ބޭރުގެ އެ ރިޕޯޓުތަކާ ގުޅޭގޮތުން އިތުރަށް ވާހަކަދައްކާލަމުން "ދެން" އަށް ދިން ޚާއްސަ ބަސްދީގަތުމެއްގައި ސުނީތާ ބުނީ، އޭނާއަކީ އަބަދުވެސް ޑިސިޕްލިން ހިފަހައްޓާ، އެހެން މީހުންގެ އިހްތިރާމް ހޯދުމަށް މަސައްކަތްކޮށް އެކަން ހާސިލުވެސް ކޮށްފައިވާ މީހެއް ކަމަށެވެ.
"އަހަރެން އަބަދުވެސް ބަލަން ވަކި ޑިސިޕްލިނެއްގައި ހިފެހެއްޓޭތޯ. އަހަންނަކީ ސޯލޯ ކޮށް މަސައްކަތް ކުރާ މީހެއް، އެކަނި ޝޯތައް ދެނީ ވެސް. އެހެންގޮސް އުޅޭއިރު ވެސް މީހުންނާ ވާހަކަ ދައްކާ، ގުޅިގެން އުޅެވޭތޯ އަހަރެން ބަލަނީ. އޭގެ އެއް ހެކި އެއީ މީހުން އަހަންނަށް އިހްތިރާމް ކުރުން ވެސް" ސުނީތާ ބުންޏެވެ.
މިހާރު އެ ދާއިރާއިން މިހުރީ ދުރުގައި، އެކަމަކު އުފަލާއެކީ ބުނަން ކެރޭ އެއްވެސް ހަޑި ލައްގަނޑެއް އަހަރެންގެ ފަސްބައިގައި ޖެހިފައި ނުހުންނާނެ ކަން، އަހަރެން ވިޔާނުދާކޮށް އުޅުނޭ ނުބުނެވޭނެކަން
އެންމެންނަށް ވެސް އެނގިފައިވާ ގޮތުގައި ސުނީތާ އެންމެ ސަޕޯޓު ކުރަނީ ޕްރިޔާންކާ އަށެވެ. ނަމަވެސް ރާއްޖޭގައި ވެސް އޭނާ ސަޕޯޓުކުރާ ތަރިއެއް ހުރެއެވެ. އެއީ ކުރީގެ ނަން މަޝްހޫރު އެކްޓްރެސް ޝިރާނީ އެވެ.
"ޝިރާނީ އަހަރެންގެ އެންމެ ފޭވަރިޓް އެކްޓްރެސް އަކީ. އެއީ ޝިރާނީ އަކީ ވެސް ވަރަށް ޑިސިޕްލިން ހިފެހެއްޓި، ރަނގަޅަށް މަސައްކަތް ކުރި މީހަކަށް ވާތީ. ދާއިރާގައި އުޅުނީ ވެސް ވަރަށް ރަނގަޅަށް، ދޫކޮށްފަ ދިޔައީ ވެސް ވަރަށް ރަނގަޅަށް، ރީތި ގޮތުގައި. މިހާރު ދިރިއުޅުމެއް ފަށައިގެން ވެސް ރީއްޗަށް އުޅެނީ" ސުނީތާ ބުންޏެވެ.
ޝިރާނީ އަކީ ނަމޫނާ ތަރިއެއް
ސުނީތާ އަކީ އެތައް ބައެއްގެ ފާޑުކިޔުންތަކާ ދާއިރާގެ އެތެރެއިންނާ ބޭރުން ވެސް ކުރިމަތިލާން ޖެހުނު މީހެކެވެ.
އެގޮތުން އޭނާ އެންމެ ފާހަގަ ކުރަނީ ކޮން ފާޑުކިޔުންތަކެއްތޯ ސުވާލު ކުރުމުން ސުނީތާ ބުނީ، ވަރަށް ގިނަ މީހުން އެކި އެއްޗެހިކީ ކަމަށާއި އެގޮތުން ވެސް އޭނާގެ ހަނދާނުގައި އަބަދުވެސް ހަރުލާފައި ހުންނާނީ މީގެ އެތައް އަހަރެއް ކުރިން ފިލްމީ ދާއިރާގެ ނަން މަޝްހޫރު ބަޔަކު އޭނާއާ ދިމާކުރި ކުރުން ކަމަށެވެ. އެމީހުން ސުނީތާއާ ދިމާލަށްކީ އެއްޗެހީގެ ވައިބާ ވޮއިސް ރިކޯޑިންގ ތަކެއް ވެސް އޭރު ލީކްވިއެވެ.
"އަބަދުވެސް ހަނދާނުން ފިލައިގެން ނުދާނެ ކަމެއް އެއީ. އެމީހުންނާމެދު ހަސަދައެއް އޮވެގެނެއް ނޫން. އެކަމަކު އޭރު އެވީ ކަންތަކަކީ މީގެ ކުރިން ދުވަހަކުވެސް އަހަރެންގެ މުޅި ޙަޔާތުގައި ވެސް ކުރިމަތިލާން ޖެހުނުވަރު ކަމެއް ނޫން. ލީކް އަދި އެވީ ބައެއް އެއްޗެހި. އެއަށްވުރެ މާގިނަ އެއްޗެހި އެމީހުން އަސްލުގަައި އަހަންނާ ދިމާލަށްކީ، ހަގީގަތް ބަލާނުލާ." ސުނީތާ ބުންޏެވެ.
ވަރަށް ދެރަވި ދުވަސްތަކެއް އެއީ. އަހަރެން ޤަބޫލުކުރަނީ ދާއިރާއިން ވެސް އަހަރެންގެ އަގު ވަޒަން ނުކުރީކަމަށް އެއީ.
މުނިފޫހިފިލުވުމުގެ ދާއިރާއާއި ދުރަށް ގޮސް މިހާރު ސުނީތާ އުޅެނީ އަމިއްލަ ވިޔަފާރިއެއް ފަށައި، އެކަމުގައި ބިޒީ ކޮށެވެ.
އެގޮތުން އޭނާއަކީ މިހާރު އޯޑަރަށް ބްރެކްފަސްޓް ޕެކޭޖާއި ހަވީރު ސައިބޯން ބޭނުންވާ ފަރާތްތަކަށް ވެސް ކާއެއްޗެހި ހަދައިދޭ މީހެކެވެ. "ސުނީސް ސްޕެޝަލް" ގެ ނަމުގައި އޭނާ ހިންގާ މިވިޔަފާރީގައި އޭނާ އަމިއްލައަށް ހަދާފައި ހުންނަ ލޮނުމިރުސް ވެސް ވިއްކައެވެ. އަދި ކުޑަކުދިންނަށާއި ބޮޑެތި މީހުންނަށް ޚާއްސަކޮށް ތައްޔާރު ކޮށްފައި ހުންނަ، އޮރިޖިނަލް ކާށިތެޔޮ ވެސް ވިއްކައެވެ.
"މިމަސައްކަތް ފެށުނީ މިދިޔަ އަހަރު ލޮކްޑައުން ތެރޭގައި. ގޭގައި ހުންނަން ޖެހުމުން ކޮންމެވެސް ކަމެއް ކުރަން ފެށުމުގެ ގޮތުން ފެށިކަމެއް މިއީ. އަހަރެން ދަންނަ ގިނަ ގާތް މީހުންނަށް އެނގޭނެ އަހަންނަކީ އަބަދުވެސް ކައްކާ ހިތްވާ މީހެއްކަން" ސުނީތާ ބުންޏެވެ.
އަބަދުވެސް ވަރަށް ކުރަން ބޭނުންވި ކަމެއް އަމިއްލަ ރެސްޓޯރަންޓެއް ހުޅުވުމަކީ. އެކަމަށް ހުވަފެން ދެކި މި މަސައްކަތް ކުރަނީ ވެސް. އެންމެ ކަމެއް ނޫންތާ ކޮންމެ މީހަކަށް ވެސް ކުރަން އެނގޭނީ.
ސުނީތާގެ ހިތްވަރާއި، ހުނަރުވެރިކަމާއި، ކެތްތެރިކަމަށް ހަމަ އައްސަރިބަހާ ސާބަސް ކިޔާވަރުވެއެވެ. އެފަދަ އަޚްލާޤު ރަނގަޅު ހުނަރުވެރިން ހަގީގަތުގައި ވެސް މަދުވާނެއެވެ.
ލަވަ، ޑްރާމާ، ފިލްމު ކުޅުމުގައި އެތަށް ހިލޭ ފިރިހެނުންގައިގައި ހޭކިފާ ފަސްބައި ތާހިރޭ ނުކިޔާ