ވެކްސިން ޖެހިއިރު ބިރުން ނީނާ ހަނދާންވީ އޭނަގެ މަންމަ މަތިން
އިންޑިއާގެ ތަރިންގެ ތެރެއިން، ކޮވިޑް-19އިން ރައްކާތެރިވުމަށް އެންމެ ފަހުން ވެކްސިން ޖެހި އެކަކީ އެކްޓްރެސް ނީނާ ގުޕްތާއެވެ.
ވެކްސިން ޖެހި ވަގުތުގެ ވީޑިއޯއެއް މީސް މީޑިއާގައި ޙިއްސާ ކުރަމުން ނީނާ ބުނީ އެވަގުތު ވަރަށް ބިރުގަތް ކަމަށާއި، "މަންމާ" އޭ ކިޔާފަ ނުގޮވާ ނުހުރެވުނު ކަމަށެވެ.
އެ ވީޑިއޯގައި ނީނާ ބުނީ ވެކްސިން ޖަހަން ވަރަށް ބިރު ގަންނަ ކަމަށާއި، އެހެން ނަމަވެސް ވެކްސިން ޖަހަން ދިޔަ ކަމަށެވެ. ވެކްސިންގެ ކަށި ކޮށްޕާލި ވަގުތު ވެސް ބިރުން "މަންމާ" ކިޔާފައި ނީނާ ހަޅޭލަވަން ފެށިއެވެ.
"ބަދާއީ ހޯ" ގެ ތަރި ނީނާގެ މި ވީޑިއޯ އެތައް ބަޔަކަށް ކަމުދިޔައެވެ. އެގޮތުން އެ ވީޑިއޯއަށް ކޮމެންޓުކުރި އެކަކު ބުނީ "އުމުރުން ކިތަންމެ ގިނަ ދުވަހެއް ވެފައި ހުއްޓަސް، ކޮންމެ މީހަކު ވެސް ތަދުވުމުން އެންމެ ހަނދާން ކުރާނީ މަންމަ މަތިން" ކަމަށެވެ.
ނީނާ އެންމެ ފަހުން ފެނިފައި ވަނީ ނެޓްފްލިކްސް ގެ "މަސާބާ މަސާބާ" އިންނެވެ.
