ތިޔަ އުޅެނީ ކަރުގައި ރިއްސާތީތަ؟ މިކަންކަން ކޮށްލާ!
ފިނި މޫސުމުގައި ނުވަތަ ރޯގާ ޖެހުމުން ކަރުގައި ރިއްސުމަކީ ވަރަށް ގިނަ މީހުންނަށް ދިމާވާ ކަމެކެވެ. އަދި މިކަން ތަހައްމަލް ކުރާ ފަރާތްތަކަށް މިއީ ކިހާ ވޭން ހުރި ކަމެއްކަން އެނގޭނެކަން ގައިމެވެ. ގިނަ މީހުން ބޭހުގެ އިތުރުން މިކަމުގެ ފަރުވާއަކަށް ބޭނުން ކުރަނީ މާމުއި ނުވަތަ ކަޅުސަޔެވެ. އަދި ގިނަ މީހުންނަށް ބޭހުގެ އިތުރުން ކަރުގައި ރިއްސުމުން ފަރުވާ އަކަށް ބޭނުންކުރަން އެނގެނީ ވެސް އާއްމުގޮތެއްގައި މި ދެ ބާވަތެވެ. އެހެންކަމުން މިލިޔުމުގައި މި ބަލާލަނީ ކަރުގައި ރިއްސުމުން ފަރުވާގެ ގޮތުގައި ބޭނުންކުރެވިދާނެ ބައެއް ތަކެއްޗަށެވެ.
ލޮނުމެދު
ލޮނުމެދަކީ އޭގައި ހަށިގަނޑަށް ފައިދާ ހުރި ގިނަ މާއްދާތަކެއް އެކުލެވޭ އެއްޗެކެވެ. އެގޮތުން ލޮނުމެދުގައި ހިމެނޭ މާއްދާއެއް ކަމަށްވާ އެލިކިން އަކީ އޭގެ ސަބަބުން ގިނަ ބެކްޓީރިއާތަކެއް ނައްތާލާ އެއްޗެކެވެ. އޭގެ ސަބަބުން ކަރުގައި ރިއްސުމުން ދުރުކޮށްދެއެވެ. މީގެ އިތުރުން ލޮނުމެދުން ރޯގާ ވެސް ރަނގަޅު ކޮށްދެއެވެ. އެހެންކަމުން ލޮނުމެދަކީ ވީހާވެސް ގިނައިން ބޭނުންކުރުން ރަނގަޅު އެއްޗެކެވެ.
ސްމޫތީ
ގިނަ ފަހަރަށް ކަރުގައި ރިއްސުމުން ނުވަތަ ރޯގާ ޖެހުމުން ކާހިތް ނުވުމަކީ ގިނަ މީހުންނަށް ދިމާވާ ކަމެކެވެ. ނަމަވެސް ހަށިގަނޑަށް އެކަށީގެންވާ ވަރަށް ވިޓަމިންސް އަދި މިނެރަލްސް ލިއްބައިދޭ ކާނާ ކެއުމަކީ މުހިއްމު ކަމެކެވެ. އެހެންކަމުން ކާ ހިތް ނުވާނަމަ ސްމޫތީ އެއް ބޯލާށެވެ. އެގޮތުން ފިނި ކޮށް، މޭވާ، އިނގުރު، ކިރު، ރީނދޫ، އޯޓް އަދި އައިސް ކިއުބް އަޅައިގެން ސްމޫތީ އެއް ތައްޔާރު ކޮށްލާށެވެ. މިއީ ކަރުގައި ރިއްސާ ނަމަ ވަރަށް އަވަހަށް ރަނގަޅު ކޮށްދޭނެ އެއްޗެކެވެ.
އޯޓްސް
އޯޓްސް އަކީ ޑައިޓް ކުރާ ފަރާތްތަކުން ނުވަތަ ދުޅަހެޔޮ ކާނާ އަށް ލޯބި ކުރާ ފަރާތްތަކުންގެ މެދުގައި ނުހަނު މަޤުބޫލު ކެއުމެކެވެ. އޯޓްސް އަކީ އެންޓިއޮކްސިޑެންޓާއި، ޒިންކް އަދި މެގްނޭސިއްމް އިން މުއްސަނދިވެފައިވާ ސިއްހަތައް ފައިދާ ހުރި އެއްޗެކެވެ. އަދި މިއީ ވަރަށް ފަސޭހައިން ތައްޔާރުވެސް ކުރެވޭ އެއްޗެކެވެ. އަދި އޯޓްސް ތައްޔާރުކުރުމުގައި ދޮންކެޔޮ ފަދަ މޭވާ އެއް އެއްކުރެވިދާނެއެވެ. އޭގެ ސަބަބުން ހަށިގަނޑަށް ލިއްބައިދޭ ވިޓަމިންސް އާއި މިނެރަލްސް އިތުރުވެއެވެ. މީގެ އިތުރުން ވެސް މާމުއި، އިނގުރު އަދި ފޮނިތޮށި ވެސް އިތުރު ކުރެވިދާނެއެވެ.
ހަވާދުގެ ބާވަތްތައް
ހަވާދުގެ ބާވަތްތަކުގެ ތެރޭގައި ހިމެނޭ ރީނދޫ، އިނގުރު އަދި ފޮނިތޮށްޓަކީ ކަރުގައި ރިއްސާނަމަ ބޭނުންކުރެވިދާނޭ ވަރަށް ފައިދާ ހުރި އެއްޗެކެވެ. އެގޮތުން ކަޅުސައި ނުވަތަ ހޫނު ފެނަށް އަޅައިގެން ބޭނުން ކުރެވިދާނެއެވެ. މި ބާވަތްތަކުގައި ހިމެނޭ މާއްދާތަކުގެ ސަބަބުން ކަރުގައި ރިއްސުމުން ދިމާވާ އުނދަގޫތަކުން ދުރުކޮށްދެއެވެ.
