ހިޔާ ފްލެޓު އިއުލާނުކުރުމާ އެކު ރަށްރަށުން 1972 މީހަކު ދަފުތަރަށް އިތުރުވި: ކޮމިޓީ ރިޕޯޓް
2018 ވަނަ އަހަރުގެ ތެރޭގައި ހިޔާ މަޝްރޫއުގެ ފްލެޓްތައް އިއުލާނު ކުރެވުނު ދުވަސްވަރު ގިނަ އަދަދެއްގެ ރައްޔިތުންތަކެއް ދަފްތަރުގައި ޖެހިފައިވާ ކަމަށާއި، އެ އަހަރު ރަށްރަށުން 1972 މީހަކު ދަފްތަރުގައި ޖެހުނު ކަމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކަ ކޮމިޓީގެ ރިޕޯޓުގައި ބުނެފިއެވެ.
އެ ރިޕޯޓްގައި ބުނެފައިވާ ގޮތުން 2021 ވަނަ އަހަރުގެ މާރިޗު މަހުގެ ނިޔަލަށް ދަފްތަރުގައި ޖެހިފައިވާ ޖުމްލަ 18,609 ފަރާތެއްވެއެވެ. އަދި މާލޭގެ ދަފްތަރަށް އެކި ދުވަސްވަރު ތަފާތު ބަދަލުތައް އައިސްފައިވާއިރު، މާލޭގެ ރައްޔިތުންގެ ތެރެއިން ތަފާތު ސަބަބުތަކާހުރެ ގޯއްޗެއް ނުވަތަ ދިރިއުޅޭނެ ގެއެއް ލިބިފައިނުވާ ފަރާތްތަކާއި، ރަށްރަށުން މާލެ ބަދަލުވެ ދަފްތަރުގައި ޖެހިފައިވާ ފަރާތްތައް، އަދި ރަށްރަށުން މާލެ ބަދަލުވެ ގޭގޭގައި ޖެހިފައިވާ ފަރާތްތައް ވެސް ދަފްތަރުގައި ހިމެނޭކަން ފާހަގަކުރެވިފައި ވާކަމަށް ރިޕޯޓްގައި ބުނެފައި ވެއެވެ.
ދިވެހިރާއްޖޭގެ ރަށެއްގެ ރަށްވެއްސަކަށްވުމާބެހޭ ޤާނޫނުގައި ބަޔާންކޮށްފައިވާ ގޮތުން 4 ވަނަ މާއްދާގެ (ހ) ގައި، ރަށެއްގައި މެދުނުކެނޑި 5 އަހަރުދުވަހު ދިރިއުޅުމުގެގޮތުން ވޭތުކޮށްފައިވާ މީހަކު އެ ރަށެއްގެ ރަށްވެއްސެއްގެ ގޮތުގައި ރަޖިސްޓަރީވާން އެދިއްޖެނަމަ، އެމީހަކު އެ ރަށެއްގެ ރަށްވެއްސެއްގެ ގޮތުގައި ރަޖިސްޓަރީ ކޮށްދޭންވާނެ ކަމަށާއި، އެގޮތުން، ރަޖިސްޓަރީކޮށްދޭ މީހުން، ކުރިން އެމީހުން ރަޖިސްޓަރީ ކުރެވިފައިވާ ރަށެއްގެ ރަށްވެހިންގެ ރަޖިސްޓަރީން އުނި ކުރަން ވާނެ ކަމަށް ބަޔާން ކޮށްފައި ވެއެވެ.
އަދި، އެ ޤާނޫނުގެ 5 ވަނަ މާއްދާގައި، އެ ޤާނޫނުގެ 2 ވަނަ މާއްދާގެ (ށ) އާއި 4 ވަނަ މާއްދާގެ (ހ) ގައިވާ ގޮތުގެމަތިން މީހަކު މެދުކެނޑުމެއްނެތި 5 އަހަރުދުވަސް ދިރިއުޅުމުގެގޮތުން ރަށެއްގައި ވޭތުކޮށްފައިވޭތޯ ބަލާނީ، ސަރުކާރުގެ ރަސްމީ ލިޔުމަކުން
ނުވަތަ ސަރުކާރުގައި ރަޖިސްޓަރީކުރެވިފައިވާ ތަނެއްގެ އިތުބާރުހުރި ލިޔުމަކުން ކަމަށާއި، އެފަދަ ލިޔުމަކުން އެކަން އެނގެން ނެތްނަމަ، އެމީހަކު އެ ރަށެއްގައި ދިރިއުޅުމުގެގޮތުން މެދުކެނޑުމެއްނެތި 5 އަހަރު ވޭތުކޮށްފައިވާކަން ސާބިތުކުރާނީ 2 ހެކީންގެ ހެކިބަހުންކަމަށް ކަނޑައަޅާފައިވާކަން ވެސް އެ ރިޕޯޓުގައި ވެއެވެ.
