މޫސުން ގޯސްވުމުން ބައެއް ފްލައިޓްތައް ޑިލޭ ވަނީ!
ވެލާނާ އިންޓަނޭޝަނަލް އެއަރޕޯޓަށް ޖައްސަން ޝެޑިއުލް ކޮށްފައިވާ ބައެއް ފްލައިޓްތައް ، މާލެ ސަރަޙައްދަށް ކުރަމުންދާ ވިއްސާރައިގެ ސަބަބުން ޑިލޭ ވާން ފަށައިފިއެވެ.
ޑިލޭ ވަމުންދާ ފްލައިޓްތަކުގެ ތެރޭގައި އެމިރޭޓްސް، ސްރިލަންކަން އެއަރލައިންސް، ފްލައި ދުބާއީ، ޤަތަރު އެއަރވޭސް، އެއިރޯފްލޮޓް، މަންޓަރ އެއަރ، ވިލާ އެއަރ އަދި މޯލްޑިވިއަންގެ ފްލައިޓްތައް ހިމެނެއެވެ.
މޫސުމާ ބެހޭ ގައުމީ އިދާރާއިން ވިދާޅުވީ ކުރިއަށް އޮތް 24 ގަޑިއިރު ރާއްޖޭގެ ބޮޑުބަޔަކަށް ގުގުރުމާ އެކު ވިއްސާރަކުރާނެ ކަމަށާއި ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 17 މޭލާއި 27 މޭލާ ދެމެދުގެ ބާރުމިނުގައި، މެދުރާއްޖެތެރޭގެ އަތޮޅުތަކަށް ދެކުނާއި ހުޅަނގުދެކުނުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި އަދި އުތުރުގެ އަތޮޅުތަކަށް އިރުދެކުނާއި ދެކުނުން ގަޑިއަކު 08 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާ ކުރެވޭ ކަމަށެވެ. އަދި ވިލާގަނޑުގައި ގަޑިއަކު 50 މޭލާއި 55 މޭލާގެ ބާރުމިނަށް ވައިގަދަވުން އެކަށީގެންވާ ކަމަށް ވެސް މޫސުމާ ބެހޭ ގައުމީ އިދާރާއިން ވިދާޅުވިއެވެ.
އަދި އައްޑުއާއި ފުވައްމުލަށް ހިމެނޭ ސަރަހައްދަށް ބޯކޮށް ވާރޭ ވެހި ގުގުރާނެ ކަމަށާއި އަދި ގަޑިއަކު 25 މޭލާއި 30 މޭލުގެ ބޭރުމިނުގައި ވައި ޖެހުމުގެ އިތުރުން ވިލާގަނޑުގައި 50 މޭލަށް ވައި ގަދަވާނެ ކަމަށް ލަފާކުރެވޭ ކަމަށް ވެސް މެޓުން ބުނެފައި ވެއެވެ.
