ވެންޓިލޭޓަރު މައްސަލައިގައި އެއްވެސް ކަމެއް ނުފޮރުވައި މަޖިލީހާ ހިއްސާ ކުރާނަން: މިނިސްޓަރ ނަސީމް
ވެންޓިލޭޓަރުތަކެއް ގެންނަން ދުބާއީގެ ކުންފުންޏަކާ ހަވާލުކޮށް، ފައިސާ ދިނުމަށް ފަހު ވެންޓިލޭޓަރުތައް ނުލިބުނު މައްސަަލައިގެ އެއްވެސް ކަމެއް ނުފޮރުވައި، ހުރިހާ މައުލޫމާތެއް ރައްޔިތުންގެ މަޖިލީހާ ހިއްސާ ކުރައްވާނެ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޒިރުވެ ވަޑައިގެން މިނިސްޓަރ ނަސީމް ވިދާޅުވީ ވެންޓިލޭޓަރު މައްސަލައިގެ ހުރިހާ މައުލޫމާތެއް މިހާރު ވެސް މަޖިލީހަށް ދެއްވާފައި ވާނެ ކަމަށާއި އަދިވެސް މެމްބަރުން ހޯއްދަވަން އެދިވަޑައިގަންނަވާ މައުލޫމާތުތައް ދެއްވާނެ ކަމަށެވެ.
މިއަދުގެ މަޖިލިސް ޖަލްސާގައި ބިލެއްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލެއް ހަލީމް) މިނިސްޓަރ ނަސީމާ ސުވާލު ކުރެއްވީ ވެންޓިލޭޓަރު ގަންނަން ފޮނުވި ފައިސާ ނުވަތަ ވެންޓިލޭޓަރުތައް ލިބޭނެތޯއެވެ.
"ވަރަށް ތަފްސީލުކޮށް މި ތަނަށް، ވެންޓިލޭޓަރުކަންތަކާ ބެހޭ ގޮތުން އަޅުގަނޑު އޮންނާނީ ސިޓީއަކާ އެއްޗިހި ފޮނުވާފައި. ދެން ވެންޓިލޭޓަރުގެ މައްސަލައިގައި މިތަނުން ބޭނުންފުޅުވާ ހުރިހާ މައުލޫމާތެއް، ވަރަށް އިހުލާސްްތެރިކަމާ އެކީ އަޅުގަނޑު ފޮނުވައިދޭނަން. އެއްވެސް އެއްޗެއް އަޅުގަނޑު ފޮރުވާކަން ނެތިން،" ހެލްތު މިނިސްޓަރ ނަސީމް ވިދާޅުވިއެވެ.
މީގެ އިތުރުން މިނިސްޓަރ ނަސީމް ވިދާޅުވީ މައުލޫމާތުތަކެއް ނުދެއްވައި ހިފަހައްޓަވަން އުޅުއްވާ ކަަމަށް ހީވާ ކަހަަލަ ވާހަކަތަކެއް ވެސް ދެކެވޭ ކަމަށާއި އެހެން ނަމަވެސް އެކަހަލަ ކަމެއް ނޯންނާނެ ކަމަށެވެ.
Ads by STO
