ވެންޓިލޭޓަރު މައްސަލައިގައި ފައިސާ ހޯދަން އާބިޓްރޭޝަނަށް ދަނީ
ކޮވިޑް-19އާ ގުޅިގެން ރާއްޖެއަށް ހޯދަން ހަވާލުކުރި ވެންޓިލޭޓަރުތައް ނުލިބުނު މައްސަލައިގައި އެ ފައިސާ ހޯދަން އާބިޓްރޭޝަނަށް ދާން ދިވެހި ސަރުކާރުން ނިންމައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލުގެ ޖަވާބުގައި އެ އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ ވެންޓިލޭޓަރުތަކަށް ދިވެހި ސަރުކާރުން ފައިސާ ދެއްކި ނަމަވެސް އެ ވެންޓިލޭޓަރުތައް ނުލިބުނު މައްސަލައިގައި އެޓާނީ ޖެނެރަލް (އޭޖީ) އިބްރާހިމް ރިފްއަތު ލަފާ ދެއްވީ އިންޓަނޭޝަނަލް އާބިޓްރޭޝަނަށް މައްސަލަ ހުށަހަޅައިގެން ކުރިއަށް ގެންދަން ކަމަށެވެ.
މަބްރޫކް ވިދާޅުވީ، އާބިޓްރޭޝަން އޮންނާނީ ރާއްޖޭގައި ކަމަށްވިޔަސް، އެކަމުގައި ޔޫއޭއީ ސަރުކާރު ވެސް ހިމެނޭ ގޮތަށް ކުރިއަށް ގެންދަވާނެ ކަމަށެވެ.
ކޮވިޑް ޖެހި ހާލު ބޮޑުވާ މީހުންނަށް ފަރުވާ ދިނުމަށް ޓަކައި ގެނައުމަށް ނިންމި75 ވެންޓިލޭޓަރު ގެންނަށް ދުބާއީ ކުންފުންޏަށް އެޑްވާންސްގެ ގޮތުގައި 90 ޕަސަންޓަށް ވާ 30.9 މިލިއަން ރުފިޔާ ދިން ނަމަވެސް އަދި ލިބިފައި ވަނީ އޭގެ ތެރެއިން 10 ވެންޓިލޭޓަރެވެ.
މިކަމާ ގުޅިގެން ޕީޖީ އޮފީހުން ނެރެފައިވާ ނޫސްބަޔާނެއްގައި ބުނެފައި ވަނީ ވެންޓިލޭޓަރުތަކުގެ މައްސަލައިގައި އެ އޮފީހުން ނިންމި ނިންމުމާމެދު އެންޓި ކޮރަޕްޝަން ކޮމިޝަނާއި އާންމު ރައްޔިތުންގެ މެދުގައި ނުތަނަވަސްކަމާއި ކަންބޮޑުވުން ހުންނާނެކަން ޤަބޫލު ކުރާ ކަމަށެވެ.
ޕީޖީގެ ނޫސްބަޔާނުގައި ބުނެފައި ވަނީ މިކަމުގައި ގިނަ ބައެއްގެ ކަންބޮޑުވުން ހުރުމުން ޕީޖީގެ ނިންމުން މުރާޖައާ ކުރުމަށް ނިންމާފައިވާ ކަމަށެވެ.
Ads by STO
