ދެކުނުގެ ރަށެއްގައި ކުޑަ ކުއްޖަކަށް ޖިންސީ ގޯނާ ކުރިކަމުގެ މައްސަލައެއް ފެންމަތިވެއްޖެ
ރާއްޖޭގެ ދެކުނުގެ ރަށެއްގައި ކުޑަ ކުއްޖަކަށް ޖިންސީ ގޯނާ ކުރިކަމުގެ މަައްސަލައެެއް ފެންމަތި ވެއްޖެއެވެ.
މިފަދަ މައްސަލައެއް ފެންމަތިވެގެން އުޅޭކަމަށް އެ ރަށުން ކައުންސިލުން ވަނީ "ދެން" އަށް ޔަގީން ކޮށްދެއްވައިފައެވެ.
ކައުންސިލުން ވާހަކަ ދެއްކެވި ބޭފުޅާ ވިދާޅުވީ، މީގެ ހަފްތާއެއް ކުރިން މި ފަދަ މައްސަލައެއް ފެންމަތިވެފައިވާ ކަމަށާއި ޖިންސީ ގޯނާ ކޮށްފައި ވަނީ ކުޑަ އަންހެން ކުއްޖަކަށް ކަމަށް އޭނާއަށް ވެސް މައުލޫމާތު ލިބިލައްވައިފައިވާ ކަމަށެވެ. އަދި މި މައްސަލަ ފުލުހުންނަށް ރިޕޯޓު ކޮށްފައިވާ ކަމަށް ވެސް ވިދާޅުވިއެވެ.
އެނގިފައިވާ ގޮތުގައި އެ އަންހެން ކުއްޖާއަކީ އެ ރަށަށް ގޮސްފައި ހުރި އެހެން ރަށެއްގެ ކުއްޖެކެވެ. އޭނާއަށް ޖިންސީ ގޯނާ ކުރީ އެ ކުއްޖާ ހުރި ގޭގެ ދެ މީހަކު ވެގެން ކަމަށް ބުނެ މީސް މީޑިއާގައި ދަނީ ވާހަކަ ފެތުރެމުންނެވެ.
މި މައްސަލައާ ގުޅޭގޮތުން ފުލުހުންގެ މީޑިއާ އޮފިޝަލަކު "ދެން" އަށް ވިދާޅުވީ އަޕަރ ޕޮލިސް ސައުތު ޑިވިޟަން (ގއ، ގދ) ގައި ހިމެނޭ ރަށެއްގައި އުމުރުން 15 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމަށް ތުހުމަތު ކުރެވޭ މައްސަލައެއް 30 މާރިޗު ވަނަ ދުވަހުގެ 9:30 ހާއިރު ފުލުހުންނަށް ހުށަހަޅައިފައިވާ ކަމަށެވެ.
ފުލުހުން ވިދާޅުވީ މި މައްސަލައާ ގުޅިގެން އުމުރުން 38 އަހަރުގެ ދިވެހި ފިރިހެނަކު ވަނީ ހައްޔަރު ކޮށްފައި ކަމަށާއި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅައި ތަނެއްގައި ބަންދުގައި ބަހައްޓަައިގެން ތަހުގީގު ކުރިއަށް ގެންދިޔުމަށް ހަތް ދުވަހުގެ މުއްދަތެއް ދެއްވައިފައިވާ ކަމަށެވެ.
މި މައްސަލަ ފުލުހުން ދަނީ ތަހުގީގު ކުރައްވަމުންނެވެ.
ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަ ތަކަކަށްވާތީ ކުއްޖާގެ ވަނަވަރު ރައްކާތެރި ކުރުމުގެ ގޮތުން، އެ ކުއްޖާގެ ނުވަތަ މައްސަލަ ހުށަހެޅި އަތޮޅާއި ރަށް ފުލުހުން ހާމައެއް ނުކުރައްވައެވެ. އަދި އެފަދަ މައުލޫމާތު ހާމަ ކުރުމަކީ ޤާނޫނީ ގޮތުން މިހާރު ކުށެކެވެ.
Ads by STO
