މެންބަރުން ދާއިރާތަކަށް ކުރައްވާ ދަތުރުތަކަކީ ރަސްމީ ދަތުރުތައް ކަމަށް ކަނޑައަޅައިފި
ރައްޔިތުންގެ މަޖިލީހުގެ މެންބަރުން، އެ މެންބަރަކު ތަމްސީލު ކުރައްވާ ދާއިރާތަކަށް ކުރާ ދަތުރުތަކަކީ ރަސްމީ ދަތުރުތަކެއް ކަމުގައި ރައްޔިތުންގެ މަޖިލީހުން ކަނޑައަޅައިފިއެވެ.
ރައްޔިތުންގެ މަޖިލީހުގެ ޢާންމު ކޮމިޓީ މި ގޮތަށް ނިންމާފައިވާކަން އިއުލާނުކޮށް މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ މަޖިލީހުގެ ޤަވާޢިދުގެ 240 ވަނަ މާއްދާއަށް ރިޢާޔަތްކޮށް މަޖިލީހުގެ މެންބަރުން ދާއިރާތަކަށް ކުރައްވާ ދަތުރުތަކަކީ ރަސްމީ ދަތުރުތަކެއް ކަމަށް ކަނޑައެޅިދާނެ ކަމަށް މަޖިލީހުގެ ޢާންމު ކޮމިޓީން ނިންމާފައިވާ ކަމަށެވެ.
ކޮމިޓީން ނިންމާފައި ވަނީ މަޖިލީހުގެ މެންބަރުން ކުރައްވާ ދަތުރުފުޅުތަކުގެ މައުލޫމާތާއެކު، ދަތުރުކުރުމުގެ ހުއްދަ ލިޔުމުން ހޯއްދެވުމަށް މަޖިލީހުގެ އިދާރާގައި އެދިވަޑައިގެންނެވުމަށް ކަމަށް ރައީސް ނަޝީދު ވިދާޅުވިއެވެ. އެއިރުން މަޖިލީހުގެ އިދާރާއިން ހުއްދަ ދިނުމަށް ނިންމާފައިވާ ކަމަށް ވެސް އެ މަނިކުފާނު ވިދާޅުވިއެވެ.
މީގެ އިތުރުން ކޮމިޓީން ނިންމާފައި ވަނީ މެންބަރުން މި ހުއްދަ ލިބިވަޑައިގެން ދަތުރު ކުރައްވާ ނަމަ، މަޖިލީހާއި މަޖިލީހުގެ ކޮމިޓީތަކުގެ ހާޒިރީގައި ފާހަގަ ކުރާނީ "ރަސްމީ ދަތުރުގައި" ކަމަށާއި މެންބަރުން ރަސްމީ ދަތުރުގައި ތިއްބަވާއިރު، ކޮމިޓީއެއްގެ ބައްދަލުވުމުގައި ބައިވެރިވެވަޑައިގަތުމަށް މެންބަރަކު އެދިވަޑައިގެންފިނަމަ އެ މެންބަރަކަށް އޮންލައިންކޮށް އެ ބައްދަލުވުމެއްގައި ބައިވެރިވެވަޑައިގަތުމުގެ ފުރުސަތު ވެސް ލިބިވަޑައިގަންނަވާނެ ކަމަށް ރައީސް ނަޝީދު ވިދާޅުވިއެވެ.
ރައްރަށުގަ އާއިލާ ތިބިމީހުން އެމީހުންގެ އާއިލާއާ ބައްދަލު ކޮއްލުމަށް ދިއުން ނުވޭބާ ރަސްމީ ދަތުރަކަށް މި މީހުން ސިޔާސީ ބޭނުމަށް ކުރާ ދަތުރު މިވަނީ ރަސްމީ ދަތުރަށް