ދެ އިރަށް ބަދަލުވާ ދިޔަވަރެއްހެން މޫޑު ބަދަލު ވުމަކީ އާދައިގެ ކަމެއްތަ؟
ހެނދުނުގެ ހިތްފަސޭހަ ވަގުތުގައި ރަށުގެ އިރުވައިމަތީ އަތިރި މައްޗަށް ނުކުމެލީމެވެ. "ވާސަރީ ވާ" އަމިއްލައަށް ވެސް ބުނެވުނީ އެހެންނެވެ. އެހެރަ ޗާލު ކަމަކަށް ހިތާހިތުން ކޮށްލެވުނީ ތައުރީފެވެ. އަވަހަށް ފޯނުން ފޮޓޯއެއް ނަގައިލާ ކެމެރާގައި ރައްކާ ކޮށްލީމެވެ. މުޅި ފަޅު ތެރެ އޮތީ ދިޔަހިކި އެކަށް ބެދިފައެވެ. ހުއި އޮންނާތީ މުޅި މޫދު އޮތީ ފެހި ކުލައިގެ ވިނަ ދަނޑެއްހެން ހިކިފައެވެ.
ހަމަ އެ ދުވަހު ހަވީރު ކުޅެ ނިންމާލައިފައި އެ ދިމާލުން އަތިރިއަށް ފައިބައިލީމެވެ. ސުބުހާނަﷲ އެވެ. ކަމަކު ދާކަށް ނެތެވެ. ދިޔަވަރު ބޮޑުކަމުން ހޭޅިފަށާ ހަމައަށް ރާޅު އާދެއެވެ. މިރެއަށް އަދި ދިޔަވަރު މާ ބޮޑުވާނެހެން ހީވެއެވެ. ދުވަސްވަރަކީ ދަންވަރަށް އުދަ ވެސް އަރާ ދުވަސްވަރެކެވެ.
މި ވާހަކަ މި ދެއްކީ ސުރުހީގައި ދެއިރަށް ބަދަލުވާ ދިޔަވަރެއްގެ ވާހަކަ ދެއްކިފައި އޮތުމުންނެވެ. ހެނދުނު ދިޔަވަރު ހިކިކޮށް އޮވެފައި ހަވީރަށް ބޮޑު ވުމަކީ އޭގެ އާދައެވެ. އެއީ އޭގެ ތަބީއަތެވެ. އިންސާނާގެ ތަބީއަތުގައި އެ ސިފަ ހުރުމަކީ މާ ސަޅި ކަމެއް ހެންނެއް އަހަންނަކަށް ހިޔެއް ނުވެއެވެ. ތިމާ ދެރަވާ ކަންކަމާއި ހިތްހަމަ ނުޖެހޭ ކަންކަން ވެސް ދިރިއުޅުމުގައި އަންނާނެއެވެ. ނަމަވެސް އެފަދަ ކޮންމެ ފަހަރަކު ރަޖާ އަޅައިގެން ނިދަން އޮންނަ މީހަކަށް ތިބާ ވުމަކީ ގަބޫލު ކުރެވޭ ކަމެއް ނޫނެވެ.
މިއަދު ހެނދުނު ސަކަރާތް ޖަހަޖަހާފައި ހަވީރު ފެންނައިރު ފިޔޮއް މަރުވެފައިވާ ކުކުޅެއްހެން ހުރުމުން އެއީ ގަބޫލު ކުރެވޭނެ ކަމެއް ނޫނެވެ. އަނެއްކާ ވީ ކީއްހޭ އެހުމުން ވެސް ތިޔަ ބުނަނީ ކަމެއް ނުވެޔޭ ވިއްޔާއެވެ. ކަމެއް ނުވެ އިންސާނުން ތިޔަ ފާޑަށް ތިބޭ ކަމެއް ހަމަ ގައިމު ވެސް އަހަރެން ނުދެނަ ހުރީމެވެ. ކަމެއް ވިޔަސް އެންމެ ކުޑަމިނުން ހިއްސާ ކޮށްލަން ވާނެތާއެވެ. ތިބާގެ ހިތަށް ތަސައްލީއެއް ލިބޭނީ ވެސް އޭރުންނެވެ.
ތިބާގެ މޫޑަކީ ދެއިރަށް ބަދަލުވާ ދިޔަވަރަކަށް ނުވަތަ ދެ ދުވަހުން އެއް ދުވަހު ބަދަލުވާ މޫސުމަކަށް ނުހަދާށެވެ. ދިރިއުޅުމުގައި ދިމާވާ ކަންކަމާއެކު ވެސް ކުރިއަށް ދާން ދަސްކުރާށެވެ. ބައެއް ފަހަރަށް އަމިއްލަ އިހްސާސްތަކުގެ މައްޗަށް ވެސް ތިމާ ގަދަވެގަންނަން ޖެހޭނެކަން ދަންނާށެވެ.
