ރިޔާޒް ހެދި ހެޓްރިކުން އެނގެނީ ރައްޔިތުން ތިބީ ޕީޕީއެމްގެ ފިކުރުގައި ކުރިއަށްދާންކަން: އަދުރޭ
ލ. ފޮނަދޫ ކައުންސިލުގެ ރައީސްކަމަށް ހޮވިވަޑައިގެންފައިވާ ޕީޕީއެމްގެ ކެނޑިޑޭޓް އަހުމަދު ރިޔާޒް ހެއްދެވި "ހެޓްރިކުން" އެނގިގެން ދަނީ، ރައްޔިތުން ތިބީ ޕީޕީއެމްގެ ފިކުރުގައި ކުރިއަށްދާން ކަމަށް އިދިކޮޅު ޕީއެންސީގެ ރައީސް ޢަބްދުއްރަޙީމް ޢަބްދުﷲ (އަދުރޭ) ވިދާޅުވެއްޖެއެވެ.
ރިޔާޒަށް މަރުޙަބާ ދަންނަވަމުން އަދުރޭ ކުރެއްވި ޓްވީޓެއްގައި ވިދާޅުވީ ވޭތުވެދިޔަ ދެ އަހަރު ރިޔާޒް ކޮށްދެއްވި ޚިދުމަތް ފޮނަދޫ ރައްޔިތުން ބަލައިގެންފިކަން މިފަހަރު ވެސް ސާބިތުވެއްޖެ ކަމަށެވެ.
"ތިޔަ ހެއްދެވި ހެޓްރިކުން އެނގިގެން ދަނީ ވޭތުވެގެން ދިޔަ ދެ ދައުރުގައި ރިޔާޒް ކޮށްދެއްވި ޚިދުމަތް ރައްޔިތުން ބަލައިގެންފިކަން. އަދިވެސް އެދެނީ އެ ގޮތްކަން. ރައްޔިތުން ތިއްބެވީ ޕީޕީއެމްގެ ފިކުރުގައި ކުރިއަށް ދާންކަން" އަދުރޭ ވިދާޅުވިއެވެ.
ފޮނަދޫ ކައުންސިލު ރައީސްކަން ރިޔާޒް ކާމިޔާބު ކުރައްވާފައި ވަނީ 52.17 އިންސައްތަ ވޯޓުންނެވެ.
ރިޔާޒާއެކު އެ ގޮނޑިއަށް މި އިންތިހާބުގައި ވާދަ ކުރެއްވީ އެމްޑީޕީގެ ކެންޑިޑޭޓް ޙުސެއިން ޝާރިފްއާއި އަމިއްލަ ގޮތުން ވާދަ ކުރެއްވި ޙަސަން އަޙުމަދެވެ.
އެގޮތުން އެމްޑީޕީގެ ޝާރިފްއަށް 13.04 އިންސައްތަ ވޯޓު ލިބިފައިވާއިރު ހަސަން އަހުމަދަށް ލިބިލެއްވީ 34.78 އިންސައްތަ ވޯޓެވެ.
