ޖަންގަލީގައި 27 އަހަރު އުޅުމަށްފަހު މި މީހާ ދާން ޖެހުނީ ޖަލަށް
އުމުރުން އެންމެ 20 އަހަރުގައި ކްރިސްޓަފަރ ނައިޓް، އޭނާގެ އަމިއްލަ ގެދޮރާއި ޤައުމު (ބޮސްޓަން) ދޫކޮށް އެންމެންނާ ވެސް ދުރަށް ޖަންގަލީގެ ތެރެއަށް ދިޔައީ، ހަމައެކަނި ޒަރޫރީ ބޭނުންތައް ކުރެވޭ ވަރުގެ އެތިކޮޅަކާ ފައިސާކޮޅެއް ހިފައިގެންނެވެ.
ބޮސްޓޮން މެސެޗުސެޓްސްގައި ދިރިއުޅުނު، އަދި މެއިންއަށް އުފަން ކްރިސްޓަފަރ، އޭނާގެ ޒުވާން އުމުރު ހޭދަ ކުރީ ގޭގޭގެއާއި އެއްގަމު އުޅަނދުފަހަރުގައި އެލާމް ސިސްޓަމް ހަރު ކުރުމުގައެވެ. ނަމަވެސް ވެރިމީހާއަށް އަންގައިވެސް ނުލައި އެއްދުވަހު އޭނާ ވަޒީފާއިން ވަކިވެގެން ފިލީއެވެ. ރިޕޯޓު ތަކުން ބުނެފައިވާ ގޮތުގައި ކްރިސްޓަފަރ ފިލީ އެލާމް ސިސްޓަމް ހަރުކުރަން ގެންގުޅޭ ސާމާނުތަކާއި އޭނާ މަސައްކަތްކުރި އެ މަހުގެ މުސާރަ ވެސް ނަގައިގެންނެވެ. އޭނާ ދާން އުޅޭ ތަނެއް އަދި ކުރަން އުޅޭ ކަމެއް ވެސް އެކަކު ގާތުގައި ވެސް ނުބުނެއެވެ.
"އަހަރެންގެ ނުހުރޭ އެއްވެސް ރަޙްމަތްތެރިއެއް. އެކުގައި މަސައްކަތް ކުރާ މީހުންނާ އެހާ ވާހަކަ ދައްކާ ހިތެއް ނުވި، އެހެންވެ ވާހަކަ ދައްކާނެ މީހެއް ނެތީމަ ނުބުނީ އެކަކު ކަރިރީގައި ވެސް" ކްރިސްޓަފަރ ބުންޏެވެ.
އުތުރު އެމެރިކާގެ ބޮޑެތި މަގުތަކުން އޭނާ ކުރި ދަތުރުގައި ކައިބޮއެ އުޅުނީ ކުދި ހޮޓާތަކުންނެވެ. އަދި ބައެއް ފަހަރު އެންމެ އަގުހެޔޮ ހޮޓެލްތަކުން ކޮޓަރި ކުއްޔަށް ހިފައިގެން ރޭގަނޑުގެ ވަގުތު ހޭދަކުރިއެވެ. އެތަކެއް ދުވަހު ދަތުރު ކުރުމަށްފަހު ފްލޮރިޑާގެ ޖަންގައްޔަށް އޭނާއަށް ދެވުނެވެ.
ޖަންގައްޔަށް ދިޔައީ ހަމައެކަނި ޓެންޓަކާއި އޭނާގެ ބައެއް އަންނައުނު އަޅާފައި ހުރި ދަބަހެއް ހިފައިގެންނެވެ. ތަނަކަށް ދާވާހަކަ އެއްވެސް މީހެއް ގާތު ނުބުނެ ދިޔުމުން، އަދި ހޯދައިހޯދައި ވެސް އޭނާ ނުފެނުމުން، ކްރިސްޓަފަރގެ އާއިލާ މީހުން ހީކުރީ އޭނާ މަރުވީ ކަމަށެވެ.
ޒުވާން އުމުރުގައި، ކުއްލިއަކަށް އެންމެންނާ އެހައި ދުރަށް، އެކަނި އުޅެން ދާން ބޭނުންވީ ކީއްވެ ކަމެއް ޚުދު އޭނާއަށް ވެސް ނޭނގެއެވެ. ކްރިސްޓަފަރ ބުނި ގޮތުގައި އެއީ އޭނާއަށް އަދި މިހާތަނަށް ވެސް ޖަވާބު ދޭން ނޭނގޭ ސުވާލެކެވެ. ނަމަވެސް އެ ދަތުރުގައި ކާން ގެންދިޔަ އެއްޗެހި ހުސްވެގެން ދުވަސްކޮޅަކަށް އޭނާ ބަނޑަށް ޖެހުނެވެ. ޖަންގަލީގެ ފެންގަނޑުން ފެން ބޮއެގެން، އެކި ކަހަލަ ގަސްގަހާގެހި ކައިގެން 10 ވަރަކަށް ދުވަސް ވަންދެން އޭނާ ހިނގީ، ކެވޭނެ ފަދަ ރަނގަޅު ކާއެއްޗެއް ހޯދުމަށެވެ. އެހެން ހިނގުމުގެ ތެރޭގައި ކުޑަ އަވަށަކާ ހަމައަށް އޭނާއަށް ދެވުނެއެވެ. އެ އަވަށުގެ ބައެއް ގޭގޭ މީހުން ހައްދާފައި ހުރި ދަނޑުތަކަކާ ހަމައަށް ދެވުމުން، އެދަނޑުތަކުން އަލުތްވާއި ޒުވާރި ފަދަ ތަކެތި އޭނާ ނެގިއެވެ. އަދި އޭގެ ފަހުން ކޮންމެ ފަހަރަކު ވެސް ކާބޯތަކެތި ހުސްވުމުން އެ އަވަށަށް ގޮސް އޭނާ އެއްޗެހި ނަގައެވެ.
އޭގެ ފަހުން ގޭގެއަށް ވަަދެ ވައްކަން ކުރަން ކްރިސްޓަފަރ ފެށިއެވެ. ނަމަވެސް އޭނާ ބުނިގޮތުގައި، އެކަން އޭނާ ކުރީ އެއްވެސް ވަރަކަށް އެކަން ކުރާ ހިތަކުން ނޫނެވެ. ދިރިއުޅެން ޖެހޭތީ، އަދި ދިރިއުޅުމުގައި ދެން އިތުރަށް ކަންތައް ކުރިއަށް ގެންދާނެ ގޮތެއް ނޭނގޭތީ ކަމަށް އޭނާ ބުންޏެވެ.
"ގޭގެއަށް ވަދެ އެމީހުންގެ ކާއެއްޗެއްސާއި ގޭސްފުޅި ފަދަ އެއްޗެހި ނަގާ ކޮންމެ ފަހަރަކު ވަރަށް ބޮޑަށް ލަދުގަނެ ބިރުގަތް. އެކަންތައް ނިމެން އަހަރެން ވެސް ވަރަށް ބޭނުންވި" ކްރިސްޓަފަރ ބުނެފައި ވެއެވެ.
އުމުރުގެ ގިނަ ދުވަސްތަކެއް އެކަނި ހޭދަ ކުރުމަށް ފަހު، އަދި އެންމެންނާ ދުރުގައި 27 އަަހަރު ޖަންގައްޔެއްގައި އުޅުމަށްފަހު 2017 ވަނަ އަހަރުގެ ޖެނުއަރީ މަހު އޭނާ ހައްޔަރު ކުރީ، އެގޮތަށް ގެއަކަށް ވަގަށް ވަދެ އުޅުމުގެ ތެރޭގައި އަތުލައި ގަނެގެންނެވެ. އޭނާގެ ވާހަކަ މުޅި ދުނިޔެއަށް މަޝްހޫރުވެ، މުޅިއަކު 500 ނޫސްވެރިން އޭނާގެ އިންޓަރވިއު އެއް ނެގޭތޯ ފުލުހުންނަށް އިލްތިމާސް ކުރިއެވެ. އަދި އަންހެނަކު އޭނާއާއި ކައިވެނި ކުރަން ވެސް ހުށަހެޅިއެވެ.
"ޖަލުގައި އޮތުމަކީ އަހަންނަށް ޙައްޤު އަދަބެއްކަން ޤަބޫލުކުރަން. އަހަރެން އުފަލެއް ނުވޭ ވައްކަން ކުރެވިގެންނެއް، އެކަމަކު އަހަރެން ބޭނުންވި ކަންތައް ކުރެވުމުގެ ހިތްހަމަޖެހުން ލިބިއްޖެ. އެއީ މުޅި ދުނިޔެއަށް ގެއްލުން. އެކަން ޙާސިލް ކުރިން. އެކަމާއެކު ދެން ކުރެވުނު ކަންތައްތަކަށް މާފަށް އެދެން. އަހަރެން ބެލީ ދިރިހުރެވޭތޯ" ކްރިސްޓަފަރ ބުންޏެވެ.
ބޮސްޓަނ އެއ ގައުމެއްތ؟