ކޮވިޑް-19: ހާލަތު ގޯސް، 63 ރަށެއްގައި 1261 ކޭސް
އަތޮޅުތެރޭގެ 63 ރަށެއްގައި ބަލި ޖެހިފައިވާ 1261 މީހުން އެބަތިބި ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.
އަތޮޅު ތެރޭގައި ކޮވިޑް-19ގެ ކޭސްތައް އިތުރުވެފައިވާ މި ދުވަސްވަރު ، 100 އިން މަތީގައި ކޮވިޑް ކޭސްތައް 6 ރަށެއްގައި އެބަ އުޅެއެވެ. އެ ރަށްތަކަކީ ބ. އޭދަފުއްޓާއި، ޅނައިފަރާއި، ކ.މާފުއްޓާއި އއ.މަތިވެރި އާއި ތ.ވޭމަންޑޫގެ އިތުރުން ލ.މާންދޫއެވެ.
ބ. އޭދަފުށިން 121 މީހަކަށް ވަނީ ބަލި ޖެހިފައެވެ. އަދި ނައިފަރުން 130 މީހުންނަށާއި މާފުށިން 209 މީހަކަށް އަދި މަތިވެރީން 171 މީހަކަށް ބަލި ޖެހިފައިވާއިރު ވޭމަންޑޫގައި 145 މީހަކަށް ބަލިޖެހިފައިވެއެވެ. މާންދޫގައި ތިބީ ބަލި ޖެހިފައި ތިބި 126 މީހުންނެވެ.
އަތޮޅުތެރޭގައި ބަލިޖެހިފައިވާ މީހުންގެ ނިސްބަތަށް ބަލާއިރު ގިނައީ ދިވެހީންނެވެ. އެގޮތުން 990 ދިވެހީންނަށް ބަލި ޖެހިފައިވާއިރު ބަލިޖެހިފައިވާ ބިދޭސީންގެ އަދަދަކީ 271އެވެ. މި އަދަދުތަކާއެކު އަތޮޅު ތެރޭގައި އެކްޓިވް ކޭސްތަކުގެ އަދަދަކީ 1261 އެވެ.
މިއަދަކީ ރާއްޖޭގައި އެންމެ ގިނަ މީހުން ކޮވިޑް-19އަށް ފައްސިވީ ދުވަހެވެ. މިއަދު އެކަނި 464 މީހުން ވަނީ ފައްސިވެފައެވެ. އަދި ދެ މީހަކު ކޮވިޑް-19ގައި ވަނީ ނިޔާވެފައެވެ. އެއީ ދިވެހި އަންހެނަކާއި އިންޑިއާ ފިރިހެނެކެވެ.
