ކުޑަކުދިންނަށް ޖިންސީ ގޯނާ ކޮށްފައިވާ މީހަކަށް ވަކި ކަހަލަ ވަޒީފާއެއް ނުލިބޭގޮތް ހަދަނީ

ކުޑަކުދިންނަށް ޖިންސީ ގޯނާ ކުރުމުގެ ކުށެއް ސާބިތުވެފައިވާ މީހަކަށް ކުޑަކުދިންނަށް މުއާމަލާތް ކުރަން ޖެހޭ ވަޒީފާއެއް ނުލިބޭނެ ގޮތަށް ސިވިލް ސާވިސް ގާނޫނު ކޮމިޓީއިން އިސްލާހުކޮށްފިއެވެ.

Ads by STELCO

އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށަހެޅުއްވި އެ އިސްލާހުގައި ބުނެފައި ވަނީ ކުޑަކުދިންނަށް ޖިންސީ ގޯނާ ކުރުމުގެ ކުށެއް ސާބިތުވެފައިވާ މީހަކަށް ކުޑަކުދިންނާ މުއާމަލާތް ކުރަންޖެހޭ ވަޒީފާއެއް ދީގެން ނުވާނެ ކަމަށެވެ.

ސިވިލް ސާވިސް ގާނޫނަށް ގެންނަ އިސްލާހު ތަކުގެ ބިލު ކޮމިޓީއިން ފާސްކޮށް އެ ގާނޫނުގެ 41 ވަނަ މާއްދާއަށް މިކަން ވަނީ އިތުރުކޮށްފައެވެ. ދިވެހި ސިވިލް ސަރވިސްގެ ވަޒީފާއަށް ޢައްޔަން ކުރެވޭނީ، ތިރީގައިމިވާ ޝަރުޠުތައް ފުރިހަމަވާ މީހުންނަށް ކަމަށް ގާނޫނުގައި ބަޔާންކޮށްފައި ވެއެވެ.

• ދިވެހި ރައްޔިތަކަށްވުން.
• އަސާސީ ތަޢުލީމުގެ ފެންވަރަށް ލިޔަންކިޔަން ދަންނަ މީހަކު ކަމުގައިވުން.
• ވަޒީފާއަށްއެދި ހުށަހަޅާއިރު، މި ޤާނޫނުގައި ބަޔާންކޮށްފައިވާ ވަޒީފާއިން މުސްކުޅިކުރުމުގެ އިޚްތިޔާރު ކޮމިޝަނަށް ލިބިދޭ އަށްވުރެ ދޮށީ މީހަކުކަމުގައި ނުވުން.
• އިސްލާމްދީނުގައި ޙައްދެއް ކަނޑައެޅިފައިވާ ކުށެއްކުރިކަން ނުވަތަ ވައްކަން، ވައްކަން، ޓެކުން، މަކަރާއި ޙީލަތްހެދުން، އަދި ޚިޔާނާތްފަދަ ބޮޑު ކުށެއްކުރިކަން، ވޭތުވެދިޔަ 5 އަހަރުދުވަހުގެ ތެރޭގައި، ޝަރީޢަތަށް ސާބިތުވެފައިވާ މީހަކުކަމުގައި ނުވުން.
• ޣައިރުޤާނޫނީ ޖަމާޢަތެއްކަމުގައި ޝަރީޢަތުން ކަނޑައަޅާފައިވާ ޖަމާޢަތެއްގެ މެންބަރެއްކަމުގައި ނުވުން.
• ވަޒީފާ އަދާކުރަންޖެހޭ އޮފީހުގެ ޒިންމާދާރު އިސްވެރިޔާއަކީ،ވަޒީފާއަށް ކުރިމަތިލާ މީހާގެ މަންމައަށް، ބައްޕައަށް، ދަރިއަކަށް،އަނތްބަކަށް، ފިރިއަކަށް، އެއްބަނޑުއެއްބަފާ މީހަކަށް، އެއްބަނޑު މީހަކަށް ނުވަތަ އެއްބަފާ މީހަކަށް ނުވުން.
• ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން އިންތިޚާބު ކުރެވޭ މަޤާމެއް ފުރަމުންދާ މީހަކު ކަމުގައި ނުވުން ހިމެނެއެވެ.

މި ޤާނޫނަކީ ދިވެހި ސިވިލް ސަރވިސްގެ ނަމުގައި، މުސްތަޤިއްލު ޚިދުމަތެއް ޤާއިމުކޮށް، އެޚިދުމަތުގެ ޤާނޫނީ ހައިސިއްޔަތާއި މަގުޞަދުތަކާއި މަސްއޫލިއްޔަތުތަކާއި ހުދޫދުތައް އެކަށައެޅުމުގެ ޤާނޫނެވެ.