ޢީދު ބަންދުގައި މާލެއިން ބޭރަށް ނުދިޔުމަށް އިލްތިމާސް ކޮށްފި

ކުރިއަށް އޮތް ފިތުރު ޢީދު ބަންދުގައި މާލެއިން ބޭރަށް ނުދިޔުމަށް ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) އިން އިލްތިމާސް ކޮށްފިއެވެ.

Ads by STELCO

އެޗްއީއޯސީން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެކްނިކަލް އެޑްވައިޒަރީ ގްރޫޕްގެ އޮފިސަރ ޑރ. ނަޒްްލާ މުސްތަފާ ވިދާޅުވީ ފައްސިވާ ކޭސްތައް މާލޭގައި މިހާ ބޮޑަށް ބަލި ފެތުރެމުން ދާއިރު މާލެއިން ބޭރަށް ނުދިޔުމަށް އިލްތިމާސް ކުރައްވާ ކަމަށާއި އެއްވުންތައް ވެސް މަދު ކުރުމަށް އިލްތިމާސް ކުރައްވާ ކަމަށެވެ.

"އާންމުންގެ ފަރާތުން އަޅުގަނޑުމެން އެދެނީ ވީހާވެސް ވަރަކަށް އެއްވުންތައް މަދުކުރުން. މިހާރު މިދިޔަ އެއް އަހަރު ތެރޭގައި އެބަ އިނގޭ އެއްވުންތައް ގިނަ ވީމަ، ގާތްގަނޑަކަށް ދެ ހަފްތާއެއްވަރު ފަހުން ކޭސްތައް ގިނަ ވާކަން. ޚާއްސަކޮށް މިހާރު އަތޮޅުތެރެއަށް ޢީދު ޗުއްޓީގައި ދާއިރު ވިސްނަން ޖެހޭނެ." ޑރ. ނަޒްލާ ވިދާޅުވިއެވެ.

އެންމެ ރަނގަޅީ މާލޭގައި މިހާ ބައިވަރު ކޭސްތައް އޮތްއިރު ކޮންމެހެން ދާން ނުޖެހެންޏާ އަތޮޅުތެރޭގައި ވެސް ހަމަ އެއް ރަށުން އަނެއް ރަށަށް ދަތުރުފަތުރު ނުކުރާ ގޮތަށް މާލެއިން ވެސް އެހެން ރަށްރަށަށް ކޮންމެހެން ދާން ނުޖެހެންޏާ މިދުވަސްކޮޅު ނުދިޔުން

ޑރ. ނަޒްލާ ވިދާޅުވީ ބަލިފެތުރިގެން އުޅޭ ތަނަކުން އެހެން ތަނަކަށް ދަތުރުފަތުރު ނުކުރުމަށް އިލްތިމާސް ކުރައްވާ ކަމަށެވެ.

ރާއްޖޭގައި ކޮވިޑް-19 އަނެއްކާ ވެސް ހަލުވިކަމާ އެކު ފެތުރިގެން ދާކަން ފާހަގަ ކުރަމުން އާންމުން ފަރުދީ ޒިންމާ ރަނގަޅަށް އަދާ ނުކުރާކަން ވެސް އެޗްއީއޯސީން ވަނީ ފާހަގަ ކުރައްވާފައެވެ. އެގޮތުން ބައެއް ފަރާތްތަކުން އަދިވެސް ވެކްސިން ނުޖަހާ ކަމަށާއި، މާސްކު ނާޅާ ކަމާއި، މާސްކު ރަނގަޅަށް ނާޅާކަން ވެސް ޑރ، ނަޒްލާ ވަނީ ފާހަގަ ކުރައްވައިފައެވެ. މީގެ އިތުރުން އެއްވުންތައް ބާއްވަމުން ގެންދަވާ ކަމަށާއި ގައިދުރުކަން ބެހެއްޓުމަށް ސަމާލުކަން ނުދޭކަން ވެސް ވަނީ ފާހަގަ ކުރައްވާފައެވެ.