ބަލި މީހުންގެ ހާލު ދެރަ، އައު ވޭރިއަންޓެއް އުފެދުމުގެ ފުރުސަތު ވަރަށް ބޮޑަށް އެބަ އޮތް
ރާއްޖޭގައި މިވަގުތު ކޮވިޑް ޖެހިފައިވާ މީހުންގެ ހާލު ދެރަ ކަމަށާއި، އެހެންކަމުން ރާއްޖޭގައި ކޮވިޑްގެ އައު ވޭރިއެންޓެއް އުޅުމުގެ ފުރުސަތު ވަރަށް ބޮޑަށް އެބައޮތް ކަމަށް ޑރ. މުހައްމަދު އަލީ ވިދާޅުވެއްޖެއެވެ.
ފާއިތުވެ ދިޔަ ހަފްތާގައި ރާއްޖެއިން ކޮވިޑަށް ފައްސިވާ މީހުންގެ އަދަދު ވަނީ އިތުރުވެފައެވެ. އިއްޔެ އެކަނި ވެސް ރާއްޖެއިން 600 އަށް ވުރެ ގިނަ މީހުން ވަނީ ކޮވިޑް-19އަށް ފައްސިވެފައެވެ. މިއީ މި ފަހަކަށް އައިސް 24 ގަޑިއިރު ތެރޭގައި އެހާ ގިނައިން މީހުން މި ބައްޔަށް ފައްސި ވި ފަހަރު ވެސް މެއެވެ.
މީގެ އިތުރުން ރާއްޖޭގައި ޖުމްލަ 6500 މީހުންނަށް މިހާރު ކޮވިޑް ޖެހި ފަރުވާ އެބަދެއެވެ. އެހެންކަމުން ހޮސްޕިޓަލުގައި ފަރުވާ ދެމުން އަންނަ މީހުންގެ އަދަދު ވެސް މައްޗެވެ.
މިހާރު މާލޭގެ ދަރުމަވަންތަ ހޮސްޕިޓަލުގެ އައިސީޔޫ ވެސް ވަނީ ފުރިފައެވެ.
ރޭގައި ނޫސްވެރިންގެ ބައްދަލުވުމެެއްގައި ވާހަކަ ދައްކަވަމުން ޑރ. މުހައްމަދު އަލީ ވިދާޅުވީ، އައު ވޭރިއެންޓަކާއި ދެކޮޅަށް ވެސް ރައްކާތެރިވުމުގެ ގޮތުން ކުރަން ޖެހިފައި އޮތީ ހަމަ އެއް ކަންތައްތަކެއް ކަމަށާއި، މީގެ ހަފްތާއެއް ކުރިން ސަމާލުވެ ކުރަންޖެހޭ ކަންކަން ކުރަންވީ ވަގުތު ފާއިތު ވެއްޖެކަމަށެވެ. އަދި ރައްކާތެރިކަމުގެ ފިޔަވަޅު އާންމުން އަޅައިގެން ނޫން ގޮތަކަށް މިކަމުން އަރައި ނުގަނެވޭނެ ކަމަށް ވެސް ޑރ. މުހައްމަދު އަލީ ވިދާޅުވިއެވެ.
