ނިޔާވި ދޮންމަނިކައްތަ ވެކްސިންގެ ދެ ޑޯޒް ފުރިހަމަ ކުރި ވާހަކައަކީ ދޮގެއް!
ކޮވިޑް-19 އަށް ފަރުވާ ހޯދަނިކޮށް ރޭ މެންދަމު 3:18 ގައި ނިޔާވި އުމުރުން 77 އަހަރުގެ އަންހެން މީހާ ނިޔާވީ މި ބަލިން ދިފާޢުވުމަށް ޖަހާ ވެކްސިންގެ ދެ ޑޯޒް ފުރިހަމަ ކުރި ފަހުން ކަމަށް ބުނެ ފެތުރެނީ ދޮގު ވާހަކައެއްކަން ހާމަ ވެއްޖެއެވެ.
ގއ. ކޮލަމާފުއްޓަށް ނިސްބަތްވާ އައިމިނަތު ނައީމާ (ދޮންމަނިކައްތަ) ނިޔާވެފައި ވަނީ ކޮވިޑް-19 އަށް ދިފާޢުވުމަށް ޖަހާ ވެކްސިންގެ ދެ ޑޯޒް ވެސް ފުރިހަމަ ކޮށްފައި ވަނިކޮށް ކަމަށް ބުނެ ބައެއް ފަރާތްތަކުން ވަނީ ވާހަކަ ފަތުރައިފައެވެ.
"ދެން" އަށް މައުލޫމާތު ދެމުން އެ އާއިލާގެ ފަރާތުން ބުނީ ދޮންމަނިކައްތަ ވެކްސިންގެ ދެ ޑޯޒް ފުރިހަމަ ނުކުރާ ކަމަށާއި އެހެން ނަމަވެސް ފުރަތަމަ ޑޯޒް ޖެހި ކަމަށެވެ.
"ކޮވިޝީލްޑް ވެކްސިން ޖެހީ. އޭގެ ފުރަތަމަ ޑޯޒް ޖެހީ. ނިޔާވީ އޭގެ ވަރަށް ދުވަސް ފަހުން ހަމަ ކުއްލި ގޮތަކަށް" އާއިލާއިން މައުލޫމާތު ދިން މީހާ ބުންޏެވެ.
މައުލޫމާތު ލިބިފައިވާ ގޮތުގައި ދޮންމަނިކައްތަގެ ކިޑްނީގެ މައްސަލަތަކެއް ހުއްޓެވެ. އަދި ޑައިލިސިސް ހަދަން ޖެހޭ ކަމަށް ޑޮކްޓަރުން އެންގި ކަމަށް ވެސް މައުލޫމާތު ލިބެއެވެ.
އެހެން ނަމަވެސް އޭނާ ބުނީ، ދޮންމަނިކައްތަގެ އާއިލާއިން ގިނަ ބަޔަކު ކޮވިޑް-19 އަށް ފައްސިވި ކަމަށެވެ. މިވަގުތު އެ މީހުންގެ ހާލު ވެސް ރަނގަޅު ކަމަށް މައުލޫމާތު ދިން މީހާ ބުންޏެވެ.
