ރާއްޖެއިން ކޮވިޑް-19އަށް ފައްސިވީ މީހުން މިއަދު ވެސް 1000އަށްވުރެ ގިނަ
ކޮވިޑް-19 އަށް މިއަދު ވެސް އިތުރު 1،007 މީހުން ރާއްޖެއިން ފައްސިވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި އިތުރު 1،007 މީހުން ކޮވިޑް-19 އަށް ރާއްޖެއިން ފައްސި ވެފައިވާ އިރު އޭގެ ތެރެއިން 821 މީހުންނަކީ އިއްޔެގެ އިރުއޮއްސި 6:00 އިން މިއަދުގެ އިރުއޮއްސި 6:00 އާއި ދެމެދު ނެގުނު ސާމްޕަލްތަކުގެ ނަތީޖާއެވެ.
ފައްސިވީ މީހުންގެ ތެރެއިން މާލެއިން ފައްސިވެފައި ވަނީ 793 މީހުންނެވެ. އަދި އަތޮޅުތެރެއިން 183 މީހަކާއި ހިންގަމުން އަންނަ ރިސޯޓުތަކުން 26 މީހެއްގެ އިތުރުން ކަނޑުއުޅަނދުފަހަރުން ފަސް މީހަކު ފައްސިވެފައިވެއެވެ.
މިހާރު ރާއްޖެއިން މިބައްޔަށް ޖުމްލަ 43،782 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައި ވަނީ ޖުމްލަ 28،013 މީހުންނެވެ. އަދި މިހައިތަނަށް މިބަލީގައި ރާއްޖެއިން 94 މީހުން ނިޔާވެފައިވެއެވެ.
ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 260 މީހުންނެވެ.
Ads by STO
