ރައީސް ނަޝީދަށް އަމާޒުކޮށްގެން ދިން ހަމަލާ: ފާތިޙުގެ ބަންދަށް 15 ދުވަސް ޖަހައިފި
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުއަށް އަމާޒުކޮށްގެން ދިން ހަމަލާއާ ގުޅިގެން ރޭ ބ. ދަރަވަންދޫން ހައްޔަރުކުރި ލ. ގަން، ދުންފިނިއުފާ، އަޙްމަދު ފާތިޙް (23އ)އަށް ބަންދުގެ މުއްދަތު ޖަހައިފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ، 2021 މެއި 06 ވަނަ ދުވަހުގެ ރޭ މާލެ، ނީލޯފަރު ހިނގުމުގައި އެއްޗެއް ގޮއްވާލައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ރޭ ބ. ދަރަވަންދޫ އިން ހައްޔަރުކުރި ފާތިޙްގެ ބަންދަށް 15 ދުވަސް ކޯޓުން މިއަދު ދީފައިވާ ކަމަށެވެ.
ފާތިޙު ހައްޔަރުކުރީ، ބ.ދަރަވަންދޫގައި ފުލުހުން ހިންގި ހާއްސަ އޮޕަރޭޝަނުގައި ރޭގެ ވަގުތެއްގައެވެ. އޭނާއަކީ ކުރީގެ ރައީސް ނަޝީދަށް ދިން ބޮމުގެ ހަމަލާގައި ގޮއްވާލި ސައިކަލު އެތަނުގައި ބެހެއްޓި މީހާކަމަށް ވަނީ ކަށަވަރު ވެފައެވެ.
ރައީސް ނަޝީދު އަވަހާރަކޮށްލަން ދިން ހަމަލާގައި ބާރުގަދަ އައިއީޑީއެއް ސައިކަލު ތެރެއަށް ލައި ގޮއްވާލީ އެމަނިކުފާނު ދިރިއުޅުއްވާ ކެނެރީގެއިން ނުކުމެވަޑައިގެން މަޖީދީ މަގުގައި އޮތް އެމަނިކުފާނުގެ ކާރުކޮޅަށް އެރުއްވުމަށް ހިންގަވައިފައި ވަޑައިގަންނަވަނިކޮށެވެ. އޭރު ގޮއްވައިލި ސައިކަލު ބަހައްޓާފައި ހުރީ ނީލޯފަރު ހިނގުމާއި މަޖީދީމަގާ ވީ ކަންމަތީގައެވެ.
އެނގިފައިވާ ގޮތުގައި ފާތިހު ދަރަވަންދޫއަށް ގޮސް ހުރީ ކައިވެނި ކުރުމަށެވެ. އަދި އޭނާ އެ ރަށުގައި ގޮސްހުރީ، ކައިވެނި ކުރަން އުޅުނު އަންހެން ކުއްޖާގެ ގޭގައި ކަމަށް ވެސް "ދެން"އަށް މައުލޫމާތު ލިބިފައި ވެއެވެ. ފާތިޙު ހައްޔަރު ކޮށްފައި ވަނީ ކަރަންޓީނުގައި ހުއްޓާ ކަމަށް ވެސް މައުލޫމާތު ލިބިފައިވެއެވެ.
Ads by STO
