ކޮވިޑް ޖެހިގެން މިއަދުގެ ހަ ވަނަ މަރު: ނިޔާވި މީހުންގެ ޖުމްލަ އަދަދު 135އަށް
ކޮވިޑް-19 ޖެހިގެން މިއަދު އިތުރު މީހަކު ނިޔާވެއްޖެއެވެ.
ކޮވިޑް ބަލީގައި ރާއްޖެއިން މިއަދު ހަ ވަނަ މީހަކަށް ނިޔާވެފައި ވަނީ ޅ. ހިންނަވަރު ފިރިހެނެކެވެ.
ހިންނަވަރު ކައުންސިލު ރައީސް ހަސަން ޝާފިއު "ދެން" އަށް މައުލޫމާތު ދެއްވަމުން ވިދާޅުވީ، ނިޔާވި މީހާއަކީ އުމުރުން ދުވަސްވުމުގެ ސަބަބުން އެނދުމަތިވެފައި އޮތް މީހެއް ކަމަށެވެ. އޭނާގެ އުމުރަކީ 87 އަހަރެވެ.
" ކޮވިޑްއަށް ފައްސި ވެގެން އޭނަގެ ހާލު ތަންކޮޅެއް ދެރަވެގެން ހެލްތު ސެންޓަރަށް ގެންދިޔައީ. އެތަނުގައި ފަރުވާ ދެމުން ދިޔުމަށް ފަހު ބ. އަތޮޅު ފެސިލިޓީއަށް ގެންދަން ވެސް މަސައްކަތް ކުރި. ނަމަވެސް ބަލިމީހާގެ ހާލަތު ވަރަށް ދެރަވުމުން ފެސިލިޓީއަށް ނުގެންދެވި އޮއްވާ ނިޔާވީ" ޝާފިއު ވިދާޅުވިއެވެ.
އެ މީހާ ނިޔާވީ ހިންނަވަރު ސިއްޙީ މަރުކަޒުގައި މިއަދު ހެނދުނު 11:00ހާއިރު ކަމަށް ވެސް ޝާފިއު ވިދާޅުވިއެވެ.
ކޮވިޑް-19 ޖެހިގެން ރާއްޖެއިން ނިޔާވި މީހުންގެ އަދަދު މިހާރު މިވަނީ 135އަށް އަރާފައެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
