ކޮވިޑް މެނޭޖުކުރުމުގައި ސަރުކާރު ފެއިލްވިކަމަކަށް ގަބޫލެއް ނުކުރަން : ރައީސް

ކޮވިޑް-19ގެ ހާލަތު މެނޭޖުކުރުމުގައި ސަރުކާރު ފެއިލްވިކަމަށް ގަބޫލު ނުކުރައްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

Ads by Sosun Fihaara

ރައީސުލްޖުމްހޫރިއްޔާގެ އޮފީހުން މިރޭ ކުރިއަށް ގެންދަވާ ނޫސްވެރީންގެ ބައްދަލުވުމުގައި ރައީސް ޞާލިޙް ވިދާޅުވީ ސިއްހީ ޚިދުމަތްތެރީންގެ އެހީތެރިކަމާއެކު މިހާތަނަށް ވެސް ކޮވިޑް މެނޭޖް ކުރަމުން އައީ ވަރަށް ރަނގަޅަށް ކަމަށެވެ. އެހެން ނަމަވެސް މިހާރު އޮތީ ދަތިކަމެއްގެ ތެރޭގައި ކަމަށް ގަބޫލުފުޅު ކުރައްވާ ކަމުގައި ވެސް އެމަނިކުފާނު ވިދާޅުވިއެވެ.

މީގެ ކުރިން ވެސް ފުރަބަންދަކާ އެކު ކޮވިޑްގެ އަދަދުތައް ދަށްކޮށް ކޮންޓްރޯލް ކުރެވުނު ކަމުގައި ރައީސް ފާހަގަ ކުރެއްވިއެވެ. އެހެން ނަމަވެސް ފުރަބަންދުގައި ރައްޔިތުންނަށާއި އިގްތިޞާދަށް ވެސް ދިމާވި ދަތިތަކަކާ ހުރެ އެ ހާލަތަށް ލުއިތަކެއް ދޭން ޖެހުނީކަމަށް އެމަނިކުފާނު ވިދާޅުވިއެވެ.

މިހާރު ވެސް ހަރުކަށި ފިޔަވަޅުތަކަކާ އެކު ކޮވިޑް ކޮންޓްރޯލް ކުރެވޭނެ ކަމަށާއި ސަރުކާރުގެ ހުރިހާ ވަސީލަތެއް ވެސް ބޭނުން ކުރައްވާނީ ބަލި ކޮންޓްރޯލް ކުރުމަށް ކަމުގައި އެމަނިކުފާނު ފާހަގަ ކުރެއްވިއެވެ. އަދި މާދަމާއިން ފަށައިގެން ހަރުކަށި ފިޔަވަޅުތަކެއް އަޅަން ނިންމަވާފައިވާ ކަމަށާއި އެ ފިޔަވަޅުތަކުގެ ސަބަބުން ނަންބަރުތައް މަދުވާނެކަމަށް ވެސް ރައީސް ފާހަގަ ކުރެއްވިއެވެ.