އެސްޓްރާޒެނެކާ ވެކްސިން ޖޫން ފަހުކޮޅު ލިބޭނެ: ހެލްތު މިނިސްޓަރ

ކޮވިޑް-19އިން ދިފާއުވުމަށް ޖަހާ އެސްޓްރާޒެނެކާ ވެކްސިން އަންނަ ޖޫން މަހު ފަހުކޮޅު ލިބޭނެ ކަމަށް ހެލްތު މިނިސްޓަރ އަހުމަދު ނަސީމް (ކެރަފާ ނަސީމް) ވިދާޅުވެއްޖެއެވެ.

Ads by STELCO

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ހެލްތު މިނިސްޓަރ ވިދާޅުވީ ރަޝިޔާ ވެކްސިން (ސްޕަޓްނިކް ވެކްސިން)ގެ އެގްރިމެންޓް މިހާރު ލިބިފައިވާ ކަމަށާއި އެޓާނީ ޖެނެރަލްއަށް ފެނިވަޑައިގަންނަވާ ބައި މިހާރު ވާނީ އެ ފަރާތަށް ފޮނުވާފައި ކަމަށެވެ. އަދި މިހާރު ހަމަޖެހިފައި އޮތް ގޮތުން، އެގްރިމެންޓްގައި ސޮއިކުރާތާ ހަތަރު ހަފުތާގެ ތެރޭގައި ވެކްސިން ފޮނުވަން ޖެހޭނެކަމަށް ވެސް މިނިސްޓަރ ނަސީމް ވިދާޅުވިއެވެ.

"އެސްޓްރާޒެނެކާ، ކްލިއާ ކުރުމުގެ ކަންކަން ވަނީ ހަވާލުކޮށްފައި. އެކަމަކު އެ ޝިޕް ނުކުރެވިފައި އޮތީ. ކުރިން އޮތީ ޖޫންގެ ކުރީކޮޅު ލިބޭ ގޮތަށް. މިހާރު ލަފައެއް ނުކުރެވޭ ޖޫންގެ ކުރީކޮޅު ލިބޭނެ ކަމަކަށް. އެކަމަކު ޖޫންގެ ފަހުކޮޅު ލިބޭނެ." ހެލްތު މިނިސްޓަރ ވިދާޅުވިއެވެ.

ހެލްތު މިނިސްޓަރ މީގެ ކުރިން ވިދާޅުވެފައި ވަނީ ސިންގަޕޫރުގެ އެސްޓްރާޒެނެކާ ވެކްސިންގެ އޯޑަރުކުރީ 7 ލައްކަ ޑޯޒް ކަމަށެވެ.

މިދިޔަ ޖަނަވަރީ މަހުގެ 20 ވަނަ ދުވަހު ސިންގަޕޫރުގެ ކުންފުންޏަކާ އެކު ދިވެހި ސަރުކާރުން އެއްބަސްވުމެއްގައި ސޮއިކޮށްފައި ވާއިރު، އެކަން ކުރުމަށް ބޭނުންވާ ހާއްސަ ހުއްދަ، ފިނޭންސް މިނިސްޓަރު އިބްރާހިމް އަމީރުގެ ހާއްސަ ގަރާރަކުން މިދިޔަ އަހަރުގެ ފަހު ދުވަހު ވަނީ ދީފައެވެ.

ވެކްސިން ހޯދުމަށް ކުރަމުންދާ މަސައްކަތްތަކުގެ މައުލޫމާތު ހިއްސާ ކުރައްވަމުން މިނިސްޓަރު ނަސީމް އޭރު ވިދާޅުވީ އިންޑިއާގެ ކޮވިޝީލްޑްގެ އިތުރު ޑޯޒްތަކެއް ރާއްޖެއަށް ގެނައުމުގެ މަސައްކަތް މިހާރު ކުރިއަށްދާ ކަމަށާއި ރަޝިޔާއިން އުފައްދާފައިވާ ވެކްސިނަކާއި، ފައިޒާގެ އިތުރު ޑޯޒްތަކެއް ގަންނަން މަސައްކަތް ކުރަމުންދާ ކަމަށެވެ.

ވެކްސިނާ ގުޅޭގޮތުން މިރޭގެ ބައްދަލުވުމުގައި ރައީސް އިބްރާހިމް މުޙައްމަދު ޞާލިޙް ވެސް ވިދާޅުވީ ވެކްސިންތައް ނުލިބި ލަސްވަމުން ދަނީ ޑެލިވަރީ ކުރުމުގައި ހުރި ދަތިތަކެއްގެ ސަބަބުން ކަމަށެވެ. ދުނިޔޭގައި މިހާރު ވެސް ގިނައީ ވެކްސިންގެ އެންމެ ޑޯޒެއް ވެސް ނުލިބޭ މީހުންކަން ޤަބޫލުކުރަންވާނެ ކަމަށާއި ނަމަވެސް ރާއްޖޭގައި މިހާރު ވެސް 60 ޕަސެންޓަށް ވުރެ މަތީ އެއް ޑޯޒް ދެވިފައި ތިބި މީހުންކަން ރައީސް ފާހަގަ ކުރެއްވިއެވެ.