ޔޫއޭއީ ގެ ގޯލްޑަން ވިސާ ސަންޖޭ އަށް
ޔުނައިޓެޑް އެެރަބް އެމިރޭޓްސްގެ ގޯލްޑަން ވިސާ ބޮލީވުޑްގެ މަޝްހޫރު އެކްޓަރ ސަންޖޭދަތަށް ދީފިއެވެ.
މިކަން އިއުލާނުކޮށް އިންސްޓަގްރާމްގައި ސަންޖޭކޮށްފައިވާ ޕޯސްޓެއްގައި ބުނެފައި ވަނީ ގޯލްޑަން ވިސާ ލިބުމަކީ އެއީ ފަހުރުވެރިވާ ކަމެއް ކަމަށެވެ. ސަންޖޭ އާ ވިސާ ހަވާލުކޮށްފައި ވަނީ، ދުބާއީ ފޮރިން އެފެއަރޒް ޖެނެރަލް ޑައިރެކްޓެރޭޓްގެ ޑިރެކްޓަރ ޖެނެރަލް މޭޖަރ ޖެނެރަލް މުހައްމަދު އަލްމައްރީއެވެ.
ޔޫއޭއީގެ ގޯލްޑަން ވިސާ އޮންނަ ފަރާތްތަކަށް 5 އަހަރާއި 10 އަހަރާ ދެމެދުގެ މުއްދަތަކަށް އެގައުމުގައި ވިސާ އާ ނުކޮށް އުޅެވޭނެއެވެ. މި ވިސާ މިހާތަށް ދޫކޮށްފައި ވަނީ ވަރަށް މަދު ބަޔަކަށެވެ.
ލެޖެންޑްރީ އެކްޓަރއެއްގެ ގޮތުގައި ފޭނުން މުހާތަބު ކުރާ ސަންޖޭގެ ކުރިއަށް އޮތް ފިލްމުތަކަށް ބަލާލާއިރު، ޝަމްސެރާ އަދި ޕްރިތުވިރާޖް ފާހަގަކޮށްލެވެއެވެ.
މިހާތަނަށް ބެލުންތެރިންނާ ހަމައަށް ކާމިޔާބު އެތައް ފިލްމްތަކެއް ގެނެސްދީފައިވާ ސަންޖޭގެ ފާހަގަކޮށްލެވޭ ފިލްމްތަކުގެ ތެރޭގައި، މުންނާ ބާއި އެމް ބީ ބީއެސް އަދި އަގްނީޕަތު ހިމެނެއެވެ.
މަނާ ހަތިޔާރު ގެންގުޅުމުގެ ކުށުގައި 2013 ވަނަ އަހަރު ޖަލަށް ލީ ނަމަވެސް ހުކުމުގެ އެއްބައި ފުރިހަމަކޮށް އޭނާ ވަނީ ދޫކޮށްލައިފައެވެ. އަދިވެސް އެހުކުމުގެ 42 މަސް ފުރިހަމަ ކުރުމަށް އޭނާ ޖަލަށް ދާންޖެހިދާނެ ކަމަށް ރިޕޯޓްތައް ބުނެއެވެ.
