އަލިފުށިން 5 ބިދޭސީން ފައްސިވެއްޖެ ، ރަށަށް ބަލި ފެތުރުމުގެ ފުރުސަތު ވަރަށް ބޮޑު!
ރ. އަލިފުށިން ފަސް ބިދޭސީން ފައްސިވެ ބަލި ރަށުތެރެއަށް ފެތުރުމުގެ ފުރުސަަތު ބޮޑުވެއްޖެއެވެ.
އަލިފުށި ސއްިހީ މަރުކަޒުގެ އޮފިޝަލެއް ކަމަށްވާ އިބްރާހިމް ޝަރީފް "ދެން" އަށް މައުލޫމާތު ދެއްވަމުން ވިދާޅުވީ، މިއަދު ކޮވިޑަށް ފައްސިވެފައިވާ ފަސް ބިދޭސީންނަކީ ވެސް އަލާމާތްތައް ފެންނަން ފެށުމުން ރަށު ފުލޫ ކްލިނިކަށް ދެއްކުމުން ފައްސިވެފައިވާ މީހުން ކަމަށެވެ. އަދި އޭގެ ތެރެއިން ހަތަރު މީހުންނަކީ އެއްކޮށް އުޅޭ ހަތަރު މީހުން ކަމަށާއި ދެން ހުރި މީހާއަކީ ވަކި ގެއެއްގައި އެހެން ބަޔަކާ އެކު އުޅޭ މީހެއް ކަމަށް ވެސް އިބްރާހިމް ވިދާޅުވިއެވެ.
މީގެ ހަފްތާއެއްހާ ދުވަސް ކުރިން އަލިފުށިން ކުޑަކުއްޖަކު ހިމެނޭހެން ދެ މީހަކު ކޮވިޑަށް ފައްސިވެފައި ވާތީ ރަށް ވަނީ އޭރުން ފެށިގެން ވެސް މޮނިޓަރިންގެ ހާލަތަށް ލެވިިފައި ކަމަށާއި، ޓާސްކްފޯހާއި ހެލްތު ސެންޓަރު އަދި ކައުންސިލުން ގުޅިގެން ރަށުގައި ބަލި ފެތުރުނަ ނުދީ ހިފެހެއްޓޭތޯ މަސައްކަތް ކުރަމުން އަންނަ ކަމަށް ވެސް އިބްރާހިމް ޝަރީފް ވިދާޅުވިއެވެ.
އިބްރާހިމް ޝަރީފް އިތުރަށް މައުލޫމާތު ދެއްވަމުން ވިދާޅުވީ، މިވަގުތު ރަށް މޮނިޓަރިންއަށް ލެވި، ފައްސިވެފައިވާ ފަރާތްތަކުގެ ކޮންޓެކްޓު ޓްރޭސިންގެ މަސައްކަތް ކުރެވެމުން އަންނަ ކަމަށާއި، ބަލީގެ އެއްވެސް އަލާމާތެއް ފެންނަ ފަރާތެއް ނަމަ ލަސްނުކޮށް ފުލޫ ކްލިނިކަށް ދެއްކުމަށް ވެސް ރަށުގެ ރައްޔިތުންނަށް އަންގައިފައިވާނެ ކަމަށެވެ.
މިއަދު އަލިފުށިން ފައްސިވި ފަސް މީހުންނާ ގުޅިގެން ރަށުތެރޭގައި ބަލި އުޅުމުގެ ފުރުސަތު ވަރަށް ބޮޑު ކަމަށާއި، ރެންޑަމް ސާމްޕަލް ނެގުމަށް ހަމަޖެހިފައިވީ ނަމަވެސް އަދި ކުރަމުން ދަނީ ކޮންޓެކްޓުންގެ ސާމްޕަލް ނެގުމުގެ މަސައްކަތް ކަމަށް ވެސް އިބްރާހިމް ވިދާޅުވިއެވެ. މިހާރު ވެސް އަލާމާތްތަކާ އެކު ގިނަ ފަރާތްތަކެއް ރަށު ފުލޫ ކްލިނިކަށް ދައްކަމުންގެންދާ ކަމަށް ވެސް އިބްރާހިމް ޝަރީފް ވިދާޅުވިއެވެ.
