ކޮވިޑް ޖެހިގެން ރާއްޖެއިން މިއަދު 5 ވަނަ މީހަކު ނިޔާވެއްޖެ
ކޮވިޑަށް ފަރުވާ ހޯދަމުން ދިޔަ އިތުރު މީހަކު ރާއްޖެއިން ނިޔާވެއްޖެއެވެ.
ނިޔާވެފައި ވަނީ ހުޅުމާލެ ކޮވިޑް ފެސިލިޓީގައި ފަރުވާދެމުން ދިޔަ އުމުރުން 84 އަހަރުގެ ދިވެހި ފިރިހެނެކެވެ. މިއީ ކޮވިޑް ބަލީގައި މިއަދު ރާއްޖެއިން ނިޔާވި ފަސްވަނަ މީހާއެވެ. މި މަރު ހިމެނޭ ގޮތުން ކޮވިޑް-19 ޖެހިގެން ރާއްޖެއިން މަރުވި މީހުންގެ އަދަދު މި ވަނީ 156އަށް އަރައިފައެވެ.
މިއަދު ފަތިހު ހުޅުމާލޭ މެޑިކަލް ފެސިިލިޓީގައި އޮތް 54 އަހަރުގެ ފިރިހެނަކު ވަަނީ ނިޔާވެފައެވެ. އަދި މިއަދު ހެނދުނު 47 އަހަރުގެ ދިވެހި ފިރިހެނެއް ހުޅުމާލެ ފެސިލިޓީގައި ނިޔާވި އިރު ދަރުމަވަންތަ ހޮސްޕިޓަލުގައި އޮތް ބަލި މީހަކު ވެސް މިއަދު ވަނީ ނިޔާވެފައެވެ. އޭގެ އިތުރުން ހުޅުމާލެ ކޮވިޑް ފެސިލިޓީގައި ފަރުވާ ހޯދަމުން ދިޔަ އުމުރުން 61 އަހަރުގެ ފިރިހެނެއް ވެސް މިއަދު ވަނީ ނިޔާވެފައެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
