ޝާހްރުކާ އެކީ އަސަރު ގަދަ ލޯބީގެ ފިލްމެއް ކުޅެން ބޭނުން: މުރްނާލް
މިހާރު އެންމެ ބޭނުން ވަނީ ޝާހްރުކް ޚާނާއެކީ ލޯބީގެ ފިލްމެއް ކުޅެން ކަމަށް އަރަމުން އަންނަ ބޮލީވުޑްގެ ޒުބާން ބަތަލާ މުރްނާލް ތާކޫރް ބުނެފިއެވެ.
ބޮލީވުޑް ހަންގާމާއަށް ދިން އިންޓަރވިއުއެއްގައި މުރްނާލް މިހާރު ކެރިއަރގައި ކުރަން އެންމެ ބޭނުންވެފައި ހުރި އެއް ކަމަކީ އޭނާ ކުޑައިރުއްސުރެ އެންމެ ކަމުދާ ބޮލީވުޑްގެ ކިންގް ކަމުގައި އޭނާ ދެކޭ ޝާހްރުކްއާ އެކު ވަރަށް އަސަރު ގަދަ ފިލްމެއް ކުޅުން ކަމަށެވެ. އަދި އޭނާއާ އެކު ފިލްމެއް ކުޅެން ފުރުސަތު ލިބިއްޖެ ނަމަ ޝާހްރުކް އާ ދިމާޔަށް ކަލި ހުއްޓައި ނުލައި ބަލަހައްޓައިގެން ހުރެވިދާނެ ކަމަށާއި އެކްޓް ކުރާ ގޮތް މުޅިން ހަނދާން ނެތިދާނެ ކަމަށް ވެސް މަޖާޒީ ރާގެއްގައި މުރްނާލް ބުންޏެވެ.
"ބޭނުން ވަނީ 2000ގެ އަހަރުތަކުގައި ޝާހްރުކް ކުޅުނު ކަހަލަ ލޯބީގެ ފިލްމެއް ކުޅެން. 'ކަލް ހޯނަހޯ، މޭ ހޫނާ، ވީރް ޒާރާ' ކަހަލަ ފިލްމެއް" މުރްނާލް ބުނީ މިހާރު ބޮލީވުޑްއިން މިކަހަލަ ފިލްމްތައް ނެރޭ ތަނެއް ނުފެނޭ ކަމަށެވެ.
މުރްނާލް ބުނީ މަދޫ އާއި އަރުވިންދު ސްވާމީގެ 1992 ގެ "ރޯޖާ" އަކީ ވެސް ހިތުން ނުފިލާ ފިލްމެއް ކަމަށެވެ. އަދި އެކަހަލަ ފިލްމެއްގައި ޝާހްރުކްއާ އެކު ރޯލެއް ބޭނުން ކަމަށާއި މިހާރު ކުޅޭ ފިލްތަކުގައި އެއްވެސް ކަހަލަ ލޯބީގެ ގުޅުމެއް ނުފެންނަ ކަމަށް އޭނާ ބުންޏެވެ.
"ލޯބި ވެގެން އުޅޭ މީހާއަށް ބަލާލާ ގޮތް ވެސް، އޭރު ވަރަށް ރީއްޗަށް ހުރޭ. މިހާރު ފިލްމްތަކުގައި ދައްކައިދެނީ ލޯތްބެއް ނޫން، ބޮސްދޭ މަންޒަރެއް ހިމެނީމަ އެއީ ލޯބި ކަމަށް މިހާރު ޤަބޫލު ކުރޭ." މިހާރުގެ ބޮލީވުޑް ފިލްމްތަކަށް ފާޑު ކިޔަމުން މުރްނާލް ބުންޏެވެ. މުރްނާލްގެ އުއްމީދަކީ ބޮލީވުޑް ނުދެކޭ ފަދަ ކަލްޓް ލޯބީގެ ފިލްމެއް ޝާހްރުކްއާ އެކު ކުޅުމެވެ.
ބަތަލާއެއްގެ ގޮތުގައި މުރްނާލް އާންމުންގެ ތެރޭގައި މަޝްހޫރުވީ ޒީޓީވީގެ ސިލްސިލާ "ކުމްކުމް ބަގިއާ" އިންނެވެ. އެ ސިލްސިލާގައި 2014-2016 އަށް އޭނާ ވަނީ މަސައްކަތްކޮށްފައެވެ. އޭގެ ފަހުން މުރްލީއަށް ފިލްމްތަކުން ޖާގަ ލިބިގެން ދިޔައެވެ. މުރްލީ ވަނީ ރިތިކް ރޯޝަނާއި ޖޯން އަބްރަހަމާއި ޝާހިދު ކަޕޫރާއި ފަރުހާން އަޚްތަރު ފަދަ ބޮލީވުޑްގެ މަޝްހޫރު އެކްޓަރުންނާ އެކު ފިލްތަކުން ފެނިގެން ގޮސްފައެވެ. މިއަަހަރު ނެރުމަށް ހަމަޖެހިފައިވާ ބައެއް ފިލްމްތަކުން ވެސް މުރްނާލް ފެނިގެންދާނެއެވެ. އޭގެ ތެރޭގައި ފަރުހާން ޕްރޮޑިއުސް ކުރާ "ތޫފާން" އާއި ނޮވެމްބަރު 5އަށް ތާވަލުކޮށްފައިވާ ޝާހިދު ޕްރޮޑިއުސް ކުރާ "ޖާޒީ" ހިމެނެއެވެ.
Ads by STO
