ޖޫހީއާއި މަދޫރީ ފިލްމީ ތަރިންނާ ކައިވެނި ނުކުރި ސަބަބު އެ ތަރިން ހާމަކޮށްފި
ބޮލީވުޑްގެ "ދީވާ"އިންގެ ގޮތުގައި ބެލުންތެރިން ބަލައިގަންނަ މަދޫރީ ޑިކްސިޓްއާއި ޖޫހީ ޗާވްލާ ފިލްމީތަރިންނާ ކައިވެނި ނުކުރި ސަބަބު ހާމަކޮށްފިއެވެ.
ކަރަން ޖޯހަރް ހުށަައަޅައިދޭ "ކޮފީ ވިތު ކަރަން" ޝޯގައި ވާހަކަ ދައްކަމުން ރީތި ކަމުގެ ލާމަސީލު މިސާލެއްކަމުގައި ބުނާ މަދޫރީ ބުނެފައި ވަނީ ބޮލީވުޑްގައި އޭނާ ގަޔާވާ އެކްޓަރެއް ނެތް ކަމަށެވެ.
"އަހަރެން މަސައްކަތް ކުރިން ޝާހްރުކްއާ އެކު، ސަލްމާންއާ އެކު، އާމިރުއާ އެކު، އެކަމަކު އަހަންނަކަށް އެއްވެސް މީހެއް ދެކެ ކައިވެނި ކުރާހާ ގަޔާއެއް ނުވެވުނު، އަހަރެންގެ ފިރިމީހާއަކީ އަހަރެންގެ ހީރޯ" ޑޮކްޓަރ ޝްރީރާމްއާ ބެހޭގޮތުން މަދޫރީ ބުންޏެވެ.
ހަމަ އެސުވާލު ޖޫހީއާ ކުރުމުން ޖޫހީ ބުނީ އޭނާގެ ފިރިމީހާ ޖޭ އޭނައަށް ވަރަށް ގިނައިން ހަދިޔާ ފޮނުވި ކަމަށެވެ.
"އަހަންނަކަށް "ހޭންޑްލް"އެއް ނުކުރެވޭނެ އަހަރެން ބަލާ ވަރަށް ލޯގަނޑަށް ބަލަން ހުންނަން ޖެހޭ މީހެއް." ހިނިގަނޑަކާ އެކު ވަރަށް ކުރުކޮށް ޖޫހީ ބުންޏެވެ.
ރީތިކަމަށް ބަދަލެއް ނާންނަ ކަމަށް ފޭނުން ބުނާ މަދޫރީގެ ފިރިމީހާއަކީ ޑޮކްޓަރެކެވެ. އަދި ޖޫހީގެ ފިރިމީހާއަކީ ވިޔަފާރިވެރިއެކެވެ. ދެމީހުންގެ ކަައިވެންޏަށް ވެސްް އަހަރުތަކެއް ވެފައިވާއިރު ޖޫހީގެ އަންހެން ދަރިއަކާއި ފިރިހެން ދަރިއެއް ހުރެއެވެ. އަދި މަދޫރީގެ ދެ ފިރިހެން ދަރިން ތިބެއެވެ.
މިދެތަރިންގެ ބޮލީވުޑްގެ ދިގު ދަތުރުގައި އެއްކޮށް ކުޅެފައިވަނީ އެންމެ ފިލްމެކެވެ. އެއީ 2014 ވަނަ އަހަރު ނެރުނު ފިލްމް "ގުލާބް ގޭންގު" ނަމަކަށް ކިޔާ ފިލްމެކެވެ.
