އެމެޖެންސީ ހާލަތްތަކުގައި ޓްވިޓަރގައި ޓެގް ކުރެއްވުމަށް އެދުނު ޕޯސްޓް ޑިލީޓްކޮށްލައިފި
އެމަޖެންސީ ހާލަތްތަކުގައި ޓްވިޓާގައި ޓެގް ކުރެއްވުމަށް ޑރ. މުޙައްމަދު ޢަލީ އެދިވަޑައިގެންނެވި ޕޯސްޓް ޑިލީޓް ކުރައްވައިފިއެވެ.
މި ޕޯސްޓް ޑިލީޓް ކުރައްވާފައި ވަނީ މި ޕޯސްޓްގެ މާނަ އޮޅޭ ގޮތަށް މަޢުލޫމާތު ފަތުރަމުން ގެންދާ ދަަނޑިވަޅެއްގައެވެ. ނަމަވެސް ޕޯސްޓް ޑިލީޓްކޮށްލި ސަބަބު ސާފުވެފައެއް ނުވެއެވެ.
ޑރ. މުޙައްމަދު ޢަލީ ކުރެއްވި ޕޯސްޓެއްގައި މިއަދު ވިދާޅުވީ، މެސެޖް ލަހުން ފެނިދާނެތީ ބިރު ގަންނަ ކަމަށާއި އެންމެ އަވަހަށް ޖަވާބު ލިބޭނީ ޓްވިޓަރގައި ޓެގް ކުރެއްވުމުން ކަމަށެވެ. އަދި އެމެޖެންސީ ހާލަތުގައި (މެސެޖް ކުރުމުގެ ބަދަލުގައި) ޓެގް ކުރެއްވުމަށް ޑޮކްޓަރު ގޮވައިލެއްވިއެވެ.
މި ޕޯސްޓާ ގުޅިގެން ބައެއް ފަރާތްތަކުން ދަނީ ސިއްހީ ކަންކަމުގައި ބަރޯސާވާން ޖެހެނީ ޓްވިޓަރއަށް ކަމަށް ބުނެ ފާޑު ކިޔަމުންނެވެ. އަދި ޓްވިޓަރގައި ނޫޅޭ ފަރާތްތަކުން އެމަޖެންސީގައި ކުރާނީ ކޮންކަމެއްތޯ ބުނެ ފާޑު ކިޔުންތައް ވަނީ އަމާޒުވެފައެވެ.
ޑރ.މުޙައްމަދު އަލީއަކީ ޓްވިޓަރގައި މީހުންގެ ސުވާލުތަކަށް ވަރަށް އަވަހަށް ޖަވާބު ދެއްވާ ބޭފުޅެކެވެ. މިގޮތުން ސިއްޙީ ކަންކަމުގައި މީހުން އޭނާގެ ލަފަޔަށް އެދުމުން ޓްވިޓަރއިން ޖަވާބު ދެއްވަމުން އަންނަކަން ފާހަަގަކޮށްލެވެއެވެ. އަދި ސިއްހީ އެކިއެކި ކަންކަމުގައި ބައެއް ޚިދުމަތްތައް ލަސްވާތީ ޑޮކްޓަރ މީގެ ކުރިން އެ ފަރާތްތަކަށް ގައިޑްކޮށްދީ، އެހީތެރިކަން ފޯރުކޮށްދީފައި ވެއެވެ. ޑރ.މުޙައްމަދު އަލީގައި ރައްޔިތުންގެ މިފަދަ ޝަކުވާތަކަށް ޖަވާބު ދިނުމުގެ ސަބަބުން ވަރަށް ގިނަ ބައެއްގެ ލޯތްބާއި އިޙްތިރާމް ލިބިފައިވާ ފަރާތެކެވެ. ނަމަވެސް މިއަދު ކުރި ޕޯސްޓްގެ މާނަ ގިނަ ބަޔަކަށް އޮޅި، ޑޮކްޓަރަށް ގިނަ ބައެއްގެ ފާޑު ކިޔުން ވަނީ އަމާޒުވެފައެވެ.
ޑރ.މުޙައްމަދު އަލީ މިފަދައިން ޓްވީޓް ކުރައްވައިފައި ވަނީ، އެމްބިއުލާންސްގެ ޚިދުމަތް ވަރަށް ބޮޑަށް ލަސްވެ 10 އަހަރުގެ ކުޑަ ކުއްޖަކު ކޮވިޑްގައި މިދުނިޔެ ދޫކޮށްފައިވާ ދަނޑިވަޅެއްގައެވެ.
