ދިރާސީ އަހަރު ނިމެންދެން މާލޭ ސުކޫލުތައް ބަންދު، ކިޔެވުން އޮންލައިންކޮށް
މިހިނގާ ދިރާސީ އަހަރު ނިމެން ދެން މާލެ ސަރަހައްދުގެ ސްކޫލްތަކުގެ ހުރިހާ ގްރޭޑްތަކުގެ ދަރިވަރުންގެ ކިޔެވުން ކުރިއަށް ގެންދަން ހަމަޖެހިފައި ވަނީ އޮންލައިންކޮށް ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
އެޑިއުކޭޝަން މިނިސްޓްރީން ކުރި އިއުލާނެއްގައި ބުނެފައި ވަނީ ކޮވިޑް-19ގެ ހާލަތަށް ރިޢާޔަތްކޮށް ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ލަފާގެ މަތީން، މި ހިނގާ ދިރާސީ އަހަރު ނިމެންދެން މާލޭ ސަރަހައްދުގެ ހުރިހާ ސުކޫލެއްގެ ހުރިހައި ދަރިވަރުން ކިޔެވުން ކުރިއަށް ގެންދަން ހަމަޖެހިފައި ވަނީ އޮންލައިންކޮށް ކަމަށެވެ.
ކޮވިޑް19ގެ ނުރައްކާތެރިކަން އިތުރުވުމުގެ ސަބަބުން އެޗްޕީއޭއިން ވަނީ ރައްކާތެރިކަމުގެ ގިނަ ފިޔަވަޅުތަކެއް އަޅައިފައެވެ. އެގޮތުން 16 ގަޑިއިރުގެ ކާފިއުއެއް ހިންގުމާއި ހޮޓާ ރެސްޓޯރެންޓްތަކުގައި ކަސްޓަމަރުން ބައިތިއްބައިގެން ޚިދުމަތް ދިނުމާއި ޖިމްތަކާއި ސެލޫން އަދި މައިޒާންތަކާއި ޕާކްތައް ބަންދުކުރުން ވެސް ހިމެނެއެވެ.
