ޝާހިދުގެ ޗީފް އޮފް ސްޓާފަކަށް އިންޑިއާ މީހެއް، ޚާއްސަ މަންދޫބަކަަށް ދިވެއްސެއް

ޔޫއެންގެ އާއްމު މަޖިލީހުގެ 76 ވަނަ ދައުރުގެ ރައީސަކަށް ހޮވި ވަޑައިގަތް ރާއްޖޭގެ ފޮރިން މިނިސްޓަރ އަބްދުﷲ ޝާހިދުގެ ޗީފް އޮފް ސްޓާފަކަށް އިންޑިއާގެ މީހަކު އަދި އެ މަނިކުފާނުގެ ހާއްސަ މަންދޫބަކަށް ދިވެއްސަކު ހަމަޖައްސަވައިފިއެވެ.

Ads by Hajj Corporation

އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ، އެބޭފުޅާގެ ޗީފް އޮފް ސްޓާފްގެ ގޮތުގައި އިންޑިއާއިން ޔޫއެންއަށް ކަނޑައަޅާފައިވާ ހުންނަ ސަފީރުގެ ނަގަރާޖް ނައިޖޫ ހަމަޖައްސާފައިވާ ކަމަށެވެ. އަދި އެމަނިކުފާނުގެ ޚާއްސަ މަންދޫބަކަށް ދިވެހި ރާއްޖެއިން ޔޫއެންއަށް ކަނޑައަޅާފައިވާ ދާއިމީ މަންދޫބް ތިލްމީޒާ ހަސަން އައްޔަންކޮށްފައިވާ ކަމަށް ވެސް ޝާހިދު ވިދާޅުވިއެވެ. އަދި މިދެބޭފުޅުންނާ އެކު ރައީސްގެ ގޮތުގައި ޝާހިދު ދެކެ ވަޑައިގަންނަވާ ވިޝަން ފުރިހަމަ ކުރުމަށް މަަސައްކަތް ކުރައްވާނެ ކަަމަށް ވެސް ޝާހިދު ވިދާޅުވިއެވެ.

ޔޫއެންގެ އާއްމު މަޖިލީހުގެ 76 ވަނަ ދައުރުގެ ރައީސަކަށް ޝާހިދު ހޮވި ވަޑައިގަތީ 143 ޤައުމުގެ ވޯޓާއެކުގައެވެ. އިދިކޮޅަށް ވޯޓް ދިނީ 48 ޤައުމަކުންނެވެ. ޝާހިދު ރައީސް ކަމަށް ހޮވި ވަޑައިގަތީ އިންޑިއާއިން ކެންޕެއިންކޮށްގެން ކަމަށް އިންޑިއާގެ ނޫސްތަކުން ރިޕޯޓްކުރެއެވެ.

އާއްމު މަޖިލީހުގެ ރިޔާސަތުގެ އިންތިޚާބު ކާމިޔާބުކުރެއްވުމަށް ފަހު އދގެ އާއްމު މަޖިލީހުގައި ތަޤްރީރު ކުރައްވަމުން މިނިސްޓަރ ޝާހިދު ވަނީ އެމަނިކުފާނުގެ ޓީމަކީ މިންތީގެ ހަމަހަމަކަން ޤާއިމް ކުރެވިފައިވާ އަދި ހުރިހާ ޖިއޮގްރަފިކަލް ސަރަހައްދުތައް ތަމްސީލް ކުރެވޭ، އެކި ޤައުމުތަކުގެ މައްޗަށް ބަހާލެވޭ ޓީމަކަށް ހައްދަވާނެކަމަށް ވިދާޅުވެފައެވެ. މީގެ ތެރޭގައި ތަރައްޤީވެފައިވާ އަދި ތަރައްޤީވަމުން އަންނަ ޤައުމުތައް ވެސް ހިމެނޭނެކަމަށް މިނިސްޓަރ ވިދާޅުވިއެވެ.

މިނިސްޓަރ ޝާހިދު ވަނީ މިހާރު ހިނގަމުންދާ އދގެ އާއްމު މަޖިލީހުގެ 75 ވަނަ ދައުރުގެ ރައީސް ވޮލްކަން ބޮޒްކިރްއާއި އިއްޔެ އދގެ މައި މަރުކަޒުގައި ބައްދަލުކުރައްވައިފައެވެ. މިބައްދަލުވުމުގައި، އިންތިޚާބުގައި ލިބިވަޑައިގެންނެވި އެއްބާރުލެއްވުމަށް ޝުކުރު އަދާކުރައްވައި އަދި ކުރިއަށް ހުރި މަސައްކަތްތަކާ ބެހޭ ގޮތުން ދެ ބޭފުޅުން މަޝްވަރާ ކުރެއްވިއެވެ. އަދިބޮޒްކިރްގެ ތަޖުރިބާ ހިއްސާކުރެއްވިކަމަށް ޓަކައި މިނިސްޓަރ ޝާހިދު ޝުކުރު އަދާކުރެއްވިއެވެ.