ބޮލީވުޑް ސްކްރީން: ސަލްމާން ޚާނަށަށް އައިޝްވާރްޔާ މުހިންމެއް ނުވި
ބޮލީވުޑްގެ ޚަބަރުތަކަށް އަވަސް ކަޅިއެއް ހިންގައިލާއިރު މިފަހަރު ވެސް ފެނިފައި މިވަނީ ވަރަށް ޝައުޤުވެރިވާނެ ފަދަ ޚަބަރުތަކެކެވެ. މިފަދަ ބައެއް ޚަބަރުތައް ކިޔުންތެރިންނާ ހިއްސާ ކޮށްލާނަމެވެ.
22 އަހަރަށް ފަހު ވެސް ސަލްމާނަށް އައިޝްވާރްޔާ މުހިންމެއް ނުވި
ބޮލީވުޑްގެ ކުރީގެ ކާމިޔާބު ފިލްމުތަކަށް ބަލާއިރު، 1999 ވަނަ އަހަރު ރިލީޒްވި "ހަމް ދިލް ދޭ ޗުކޭ ސަނަމް" އަކީ ފާހަގަ ކޮށްލެވޭ އެއް ފިލްމެވެ. ތަފާތު ލޯބީގެ ވާހަކައެއްގެ މައްޗަށް ކާމިޔާބު ފިލްމު ޕްރޮޑިއުސަރު ސަންޖޭ ލީލާ ބަންސާލީ އުފެއްދި މި ފިލްމަށް އިތުރު ފުރިހަމަ ކަމެއް ގެނެސް ދިނީ އެ ފިލްމުގެ ލީޑް ރޯލުން ފެނިގެން ދިޔަ އައިޝްވާރްޔާ ރާއީ ބަޗަން އާއި ސަލްމާން ޚާންއެވެ. ފިލްމުގެ ޝޫޓިންގެ ތެރެއިން މި ދެތަރިން ވަނީ ލޯބީގެ ގޮތުން ވެސް ގުޅިފައެވެ. އަދި ދެ ތަރިންގެ ޖޯޑު އެތައް ބަޔަކަށް ކަމުދިޔައެވެ.
ނަމަވެސް ފޫނުބެއްދޭ ވަރުގެ މައްސަލަތަކަކަށް ފަހު ސަލްމާންއާއި އައިޝްވާރްޔާ ވަނީ އެ ގުޅުން ކަނޑައިލައިފައެވެ. އެއަށް ފަހު ދެމީހުންނަށް އެކަކު އަނެކަކު ފެނުމުން ވެސް މޫނު އަނބުރައިލައިފައި ދާ ކަމަށް ބައެއް މީޑިއާ ރިޕޯޓުތަކުން ބުނެއެވެ.
މިއަދު ވެސް މިވަނީ އެފަދަ ކަމެއް ހިނގައިފައެވެ. ދެ މީހުންގެ ލޯބީގެ ދަތުރު ފެށުނު "ހަމް ދިލް ދޭ ޗުކޭ ސަނަމް"އަށް މިއަދު 22 އަހަރު ފުރުމުން ކުރީގެ ބައެއް ހަނދާންތައް އައު ކުރަމުން ސަލްމާން ވަނީ އެއިރުގެ ބައެއް ފޮޓޯތައް މީސް މީޑިއާގައި ހިއްސާ ކޮށްފައެވެ. ނަމަވެސް އޭގެ އެންމެ ފޮޓޯއަކުން ވެސް އައިޝްވާރްޔާއެއް ނުފެނެއެވެ.
ކާރްތިކް ހުރީ މަސައްކަތެއް ނުލިބިފަ ކަމަށް ބުނެ ދެއްކި ވާހަކަތަކަށް ރައްދެއް
ކާރްތިކް އާރްޔަންއަކީ ވެސް މިހާރު ބޮލީވުޑްގައި މަޝްހޫރު ނަމެކެވެ. "ލުކާ ޗުޕީ" އަދި "ލަވް އާޖް ކަލް" ފަދަ ފިލްމުތަކުން އޭނާ ފެނިގެން ގޮސްފައިވާއިރު، މިހާރު އޭނާގެ އެއްވެސް ފިލްމެއް ނުފެންނާތީ ގިނަ ބަޔަކު ބުނަމުން ދިޔައީ ކާރްތިކްގެ ތަރި އޮއްސިއްޖެ ކަމަށެވެ. ނަމަވެސް އިއްޔެ އިންސްޓަގްރާމުގައި ޕޯސްޓުކުރި ފޮޓޯއަކާ އެކު އޭނާ ދޫކޮށްލީ ވަރުގަދަ މެސެޖެކެވެ. ކާރްތިކް އެ ފޮޓޯގެ ކެޕްޝަންގައި ލިޔެފައި ވަނީ "ތަފާތު އެއްޗެއް ވަރަށް އަވަހަށް އަންނާނެ" ކަމަށެވެ. ބޮލީވުޑްގެ ބައެއް ރިޕޯޓުތަކުން މިކަމާ މެދު ބުނެފައި ވަނީ، ކާރްތިކްއަށް ނެޓްފްލިކްސްގެ އާ ޕްރޮޖެކްޓެއް ލިބިއްޖެ ކަމަށާއި އެ ގޮތުން ރާމް މާދްވަނީގެ "ދަމާކާ" އިން ކާރްތިކް ފެންނާނެ ކަމަށެވެ.
އަންޑަޓޭކަރ ބޭނުން ވަނީ އަކްޝޭ އާ އެކު ހަގީގީ ރެސްލިންގެ ރީ މެޗެއް
ބޮލީވުޑްގެ "ކިލާޅީ" ގެ ލަގަބު އެމީހަކަށް ދީފައިވާ މަޝްހޫރު އެކްޓަރު އަކްޝޭ ކުމާރާ އެކު ހަގީގީ ރެސްލިން މެޗެއް ކުޅެން ބޭނުންވާ ކަމަށް ކުރީގެ ނަން މަޝްހޫރު ރެސްލަރު އަންޑަޓޭކަރު ބުނެފިއެވެ. އަންޑަޓޭކަރ މިހެން ބުނެފައި މިވަނީ 1996 ވަނަ އަހަރުގެ ޖޫން 14 ގައި ރިލީޒްވި "ކިލާޅިއޯކާ ކިލާޅީ" އަށް 25 އަހަރު ފުރުން ފާހަގަ ކުރަމުން އެ ފިލްމުގެ ބައެއް ހަނދާންތައް އަކްޝޭ ހިއްސާ ކުރުމާ ގުޅިގެންނެވެ. އޭގެން އެއް ހަނދާނެއްގެ ގޮތުގައި އަކްޝޭ ހިއްސާ ކުރީ ރެސްލަރު އަންޑަޓޭކަރ ކައިރިން އޭނާ އެ ފިލްމުގައި މޮޅުވި ކަމެވެ.
އަކްޝޭގެ ސަޅި ކެނޑުމަށް މަޖާ ރައްދެއް ދިނުމުގެ ގޮތުން އަންޑަޓޭކަރ އޭނާއަށް ހުށަހެޅީ އަސްލު ރެސްލިން މެޗަކަށެވެ. އެގޮތުން ރީ މެޗެއް ކުޅެން އޭނާ ހުށަހެޅުމުން އަކްޝޭ ބުނީ ހަގީގަތުގައި އެ ފިލްމުގައި އަންޑަޓޭކަރގެ ރޯލު ކުޅެފައިވަނީ އެކްޓަރު ބްރައިން ލީ ކަމަށެވެ.
Ads by STO
