ބަޔަކު ހިފާ ހައްޔަރު ކުރަންޖެހޭކަމަށް ވިދާޅުވުމުން އިދިކޮޅުން ކަންބޮޑުވުން ފާޅުކޮށްފި

ޓެރަރިޒަމް ހުއްޓުވުމަށް ޓަކައި ޤާނޫނީ އިމުގެ ތެރެއިން މަސައްކަތްކުރުމަކީ ކުރަންޖެހޭ ކަމެއްކަމަށް އެކޯލިޝަނުން އަބަދުވެސް ގަބޫލުކުރާ ކަމަށް ވިދާޅުވެ އެބަޔާނުގައި އިތުރަށް ވިދާޅުވީ ގާނޫނުއަސާސީއާ ހިލާފަށް އެއްވެސް މީހަކު ހިފާ ހައްޔަރުކުރުމަކީ ކޮށްގެންވާނެ ކަމެއް ނޫން ކަމަށެވެ.

އެހެންކަމުން ކުށެއްނެތް މައުސޫމް މީހުން ، ސިޔާސީ މަގްސަދެއް ހާސިލްކުރުމަށް ޓަކައި ހިފާ ހައްޔަރުކޮށް އަނިޔާވެރިކަން އިސްނުކުރުމަށް ސަރުކާރަށް ގޮވައިލާކަމަށް އެ ބަޔާނުގައި ބުނެފައިވެއެވެ. އެއީ ޤާނޫނުއަސާސީގެ ރޫޙާއި ޑިމޮކްރެސީގެ ހަމަތަކާ މުޅިން ޚިލާފުކަމެއް ކަމަށް އިދިކޮޅުން ބުނެފައިވެއެވެ.

ޕްރޮގްރެސިވް ކޯލިޝަނުން ނެރުނު ބަޔާނުުގައި އިތުރަށް ވިދާޅުވެފައި ވަނީ އެއްވެސް މީހަކު ހިފައި ހައްޔަރުކޮށްފައި ބެހެއްޓޭނެ ގޮތްތައް ޤާނޫނުއަސާސީގެ 49 ވަނަ މާއްދާގައްޔާއި ޖިނާޢީ އިޖުރާއަތުގެ ޤާނޫނުގެ 58 ވަނަ މާއްދާއާއި 59ވަނަ މާއްދާއާއި 60 ވަނަ މާއްދާގައި ވަރަށް ސާފުކޮށް ބަޔާންކުރެވިފައިވާއިރު، ގިނަ ޢަދަދެއްގެ ބަޔަކު ހިފާ ހައްޔަރު ކުރަންޖެހޭކަމަށް އެމްޑީޕީގެ ރައީސް ، ރައީސް ނަޝީދު ވިދާޅުވެފައިވާތީ އެކަމާ އެކޯލިޝަނުން ކަންބޮޑުވުން ފާޅުކުރާ ކަމަށެވެ.

އެމްޑީޕީއަށް 16 އަހަރު ފުރުނު އަހަރީ ދުވަހާ ގުޅުވައިގެން ރޭ އެޕާޓީގެ "އެމްޑީޕީ ހަރުގެ ކްލަބް ހައުސް" ވަނީ އިފްތިތާހު ކޮށްފައެވެ.

ކުލަބު ހައުސްގެ އެމްޑީޕީ ހަރުގެ އިފުތިތާހު ކުރުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނަޝީދު ވިދާޅުވީ ރާއްޖޭގައި އެކި ބާވަތްތަކުގެ ގޮވާ ތަކެއްޗާއި އަދި މީހުންގެ ފުރާނައަށް ގެންލުންދޭ ކަންކަން ކުރަމުން އައިސް މިހާރު އެކަން އޮތީ ޒަމާނީ ޓެކްނޮލޮޖީގެ ތެރެއިން ވަރަށް ބޮޑަށް ކުރިއަރައިގެން ގޮސްފައި ކަމަށާއި ފިކުރީ ހަނގުރާމައަކަށް މިކަން ހެދުމުގެ އިތުރުން ވަކި ފިކުރަކަށް ވެސް ހަދައިފައިވާ ކަމަށާއި އެކަމުގެ ސަބަބުން ހިތަށް ވެރިވަނީ ވަރަށް އަނދިރި މަންޒަރެއް ކަމަށެވެ.