ބޮލީވުޑް ސްކްރީން: ކްރިޝް 4 ކުޅެންވީ ގޮތް ބެލުންތެރިއަކު ކިޔައިދިނުމުން ރިތިކްގެ ޖަވާބު
ބޮލީވުޑްގެ ޚަބަރުތަކަށް އަވަސް ނަޒަރެއް ހިންގާލާ އިރު ތަފާތު މައުލޫމާތުތަކެއް މިއަދު ވެސް މިވަނީ ލިބިފައެވެ.
ފާހަގަ ކޮށްލެވޭ ބައެއް ޚަބަރުތައް ހިއްސާ ކޮށްލާނަމެވެ.
"ކަލް ހޯ ނަ ހޯ"ގައި އުޅުނު ކުޑަ ފިރިހެން ކުއްޖާ މިހާރު ދާއިރާގައި އުޅުނަސް އެކްޓެއް ނުކުރޭ
މަޝްހޫރު އެކްޓަރު ޝާހްރުކް ޚާނާ އެކު ފިލްމު "ކަލް ހޯ ނަ ހޯ" ގައި އުޅުނު އަތިކް ނާއިކް (ޝިވް ކަޕޫރް) އަކީ މިހާރު އެކްޓު ނުކުރިޔަސް ފިލްމީ ދާއިރާގައި އުޅޭ މީހެކެވެ. ކުޑަ އިރު ކުޅުނު އެ ފިލްމުން އަތިކްއަށް ނުހަނު ބޮޑު ކާމިޔާބީއެއް ލިބުމުން ގިނަ ބަޔަކު ހީކުރީ އޭނާ އިތުރު ފިލްމުތަކުން ވެސް ފެންނާނެކަމަށެވެ.
ކުޑައިރު ވަރަށް "ކިއުޓް" ކުއްޖެއްގެ ގޮތުގައި ފެނުނު އަތިކްއަކީ މިހާރު ވެސް އިންޑިއާގެ ރީތި ފިރިހެނުންގެ ތެރެއިން ހިމެނޭ އެކަކެވެ. އެހެންކަމުން އޭނާ ކެމެރާގެ ކުރިމަތިން ފެނުމަށް ވަރަށް ގިނަ ބަޔަކު ބޭނުންވިއެވެ.
ނަމަވެސް އެކްޓިންއަށް އަލްވަދާއު ކިޔުމަށް ފަހު އަތިކް ބޭނުންވީ ކެމެރާ ފަހަތުގައި ސިނެމަޓޮގްރަފީއެއްގެ ގޮތުގައި ހަރަކާތްތެރިވުމަށެވެ.
ކަރީނާއަށް މަސައްކަތަށް ނިކުމެވޭ ވަރު ވާނީ އޮކްޓޯބަރުގައި
ކަޕޫރް ޚާންދާނުގެ މިހާރު އެންމެ މަޝްހޫރު ތަރިއަކީ ކަރީނާ ކަޕޫރް ޚާން ކަމާ މެދު އެއްވެސް ދެބަސްވުމެއް ނެތެވެ.
އަބަދުވެސް އެކިއެކި ފިލްމުތަކުގެ މަސައްކަތްތަކުގައި ނުހަނު ބުރަކޮށް އުޅޭ ކަރީނާ، މިދިޔަ ފެބްރުއަރީ މަހު ދެވަނަ ދަރިއަކު ލިބުމަށް ފަހު ވަނީ ފިލްމީ މަސައްކަތްތަކާ ދުރަށް ޖެހިލައިފައެވެ. ފިރިމީހާ ސައިފް އަލީ ޚާން އަދި ދެ ދަރިންނާ އެކު ކަރީނާ ދަނީ އާއިލީ ޒިންމާތައް އަދާ ކުރަމުން ކަމަށް ރިޕޯޓުތަކުން ބުނެފައިވެއެވެ.
ނަމަވެސް މިހާރު ރިޕޯޓުތަކުން ބުނާ ގޮތުގައި ކަރީނާ ދަނީ ފިލްމީ މަސައްކަތްތަކަށް ވެސް އެނބުރި އަންނަން ތައްޔާރުވަމުންނެވެ. އަދި އޭނާއަށް އެ މަސައްކަތްތަކަށް އެނބުރި ނިކުމެވޭނީ މި އަހަރުގެ އޮކްޓޯބަރު މަހު ކަމަށް ވެސް ބުނެފައިވެއެވެ.
ކްރިޝް 4 ކުޅެންވީ ގޮތް ބެލުންތެރިއަކު ކިޔައިދިނުމުން ރިތިކް ދިން ރައްދު
ދާދި ފަހުން ރިތިކް ރޯޝަން ވަނީ، އޭނާގެ އެންމެ ކާމިޔާބު އެއް ފިލްމު ކަމުގައިވާ "ކްރިޝް" އަށް 15 އަހަރު ފުރުން ފާހަގަކޮށްފައެވެ.
އެ އުފާވެރި ޚަބަރާ އެކު ރިތިކް ދިން އަނެއް އުފާޥެރި ޚަބަރަކީ "ކްރިޝް" ގެ ހަތަރުވަނަ ބައެއް ހެދުމުގެ މަސައްކަތް ކުރަމުންދާ ކަމަށެވެ.
ރިތިކް ދިން އެ އުފާވެރި ޚަބަރަށް މަރުހަބާ ކިޔައި، ބެލުންތެރިއަކު ވަނީ ކްރިޝް 4 އުފައްދަންވީ ގޮތުގެ ހިޔާލެއް ދީފައެވެ. އޭނާ ބުނީ ކްރިޝް 1ގައި ނުބައިބައި ކުޅެފައިވާ ނަސީރުއްދީން ޝާހް "ސުޕަރ ހީރޯ"އެއް ގޮތަށް އަނބުރާ ގެނައުމަށެވެ. އޭނާ އައިސް ރިތިކްއާއި ޕްރިޔާންކާގެ ދަރިފުޅު ރަހީނު ކުރާ ކަމަށާއި ޕްރިޔާންކާ ވެސް ސުޕަރ ހީރޯއަކަށް ހެދުމަށް އޭނާ ވަނީ ހިޔާލު ދީފައެވެ.
ޓްވިޓާ މެދުވެރިކޮށް ދިން އެ ހިޔާލަށް ރިތިކް ވަނީ ރައްދު ދީފައެވެ. ރިތިކް ބުނީ އޭނާއަށް އެ ހިޔާލު ކަމުދިޔަ ކަމަށާއި އެއީ ވަރަށް ތަފާތު ހިޔާލެއް ކަމަށެވެ.
