ބޮލީވުޑް ސްކްރީން: ކަރީނާގެ ދިފާއުގައި ތާޕްސީ!
ބޮލީވުޑްގެ ޚަބަރުތަކަށް ވަރަށް އަވަސް ކަޅިއެއް ހިންގާލާއިރު، މިއަދު ޓްރެންޑިންގައި މިއުޅެނީ މިހާރު ކުރިއަރަމުން އަންނަ ކުޅަދާނަ އެކްޓްރެސް ތާޕްސީ ޕައްނޫއޭ ބުނުން ދޮގަކަށް ނުވާނެއެވެ.
ތާޕްސީއާ ބެހޭ ގޮތުން ފާހަގަ ކޮށްލެވޭ ގިނަ ޚަބަރުތަކުގެ ތެރެއިން ބައެއް ޚަބަރުތަކަށް ބަލައިލާނަމެވެ.
ކަރީނާގެ ދިފާއުގައި ބަސް ބުނީ ތާޕްސީ
ދާދި ފަހުން ހިނގި ބައެއް ހާދިސާއަށް ބަލާއިރު މަޝްހޫރު އެކްޓްރެސް ކަރީނާ ކަޕޫރް ޚާން އަލަށް ކުޅޭ "ސީތާ- ދި އިންކާނޭޝަން" ފިލްމު 12 ކްރޯޑް ރުޕީސްއަށް ކުޅެދޭން ބުނުމުން އެތައް ބަޔަކު ވަނީ ކަރީނާއަށް ފާޑު ކިޔައިފައެވެ. އެގޮތުން ސައިފުއާ ކައިވެނި ކޮށްގެން އުޅޭއިރު ކަރީނާއަށް "ސީތާ" ކުޅެން ދެނީ ކީއްވެތޯއާއި ހިންދޫންގެ ތާރީޚާ ގުޅިފައިވާ ވާހަކައެއްގެ މައްޗަށް ބިނާ ކޮށްފައިވާ އެ ފިލްމު ކުޅެން ކަރީނާ އެހާ ބައިވަރު ފައިސާއެއް ނަގަނީ ކީއްވެތޯ ގިނަ މީހުން ސުވާލު ކޮށްފައިވެއެވެ.
ޕަބްލިކުގެ އެވަރު ބޮޑު ޕްރެޝަރެއް ލިބެމުން ދިޔުމުން، ކަރީނާގެ ދިފާއު ގައި ވާހަކަދެއްކި އެކަކީ ތާޕްސީއެވެ. އެގޮތުން އޭނާ ބުނީ ކަރީނާ ފަދަ ހުނަރުވެރި އެކްޓަރެއް އޭނާގެ ވަގުތާއި ބުންވަރު އެ ފިލްމަށް ހޭދަ ކުރާ އިރު، އޭނާ ބޭނުން އަގެއް ކިޔުމަކީ ކަރީނާއަށް ލިބޭ ހައްގެއް ކަމަށެވެ. އަދި އެފަދަ ކެރެކްޓަރ އެއް ފިރިހެނަކަށް ދިން ނަމަ އޭނާ ވެސް އެ ރޯލު ކުޅެދޭނީ އެހާ އަގުބޮޑުކޮށް ކަމަށާއި ހިލޭ ކުޅެއެއް ނުދޭނެކަން ވެސް ތާޕްސީ ހަނދާން ކޮށްދިނެވެ.
ކަރީނާއަކީ އަބަދުވެސް ވަރަށް ހުނަރުވެރި އަދި މަސައްކަތަށް ފަރުވާތެރި ފަންނާނެއް ކަމުން، އެ ފިލްމު ކުޅެން ނިންމި އަގަކީ ހަމަ އެންމެ އެކަށީގެންވާ އަގު ކަމަށް ވެސް ތާޕްސީ ބުންޏެވެ.
ކަންގްނާއަކީ އެއްވެސް މީހެއް ނޫން ކަމަށް ތާޕްސީ ބުނުމުން، ރަތަށް!
ބޮލީވުޑްގެ އަންހެން އެކްޓަރުންނަށް ބަލާއިރު، ކޮންމެ މީހަކު ވެސް އެ މީހަކާ ދުރުގައި ހުންނަން ޖެހޭ އެއް އެކްޓްރެސްއަކީ ކަންގްނާ ރަނާވަތު ކަމަށް ގިނަ ބަޔަކު ދެކެއެވެ. އެހެންކަމުން ގިނަ މީހުން އޭނާއާ ވާހަކަ ވެސް ނުދައްކާ ވޭތޯ ބަލައެވެ.
ނަމަވެސް ދާދި ފަހުން ތާޕްސީ ޕައްނޫ މި ވަނީ ކަންގްނާގެ ނަން ގަނެފައެވެ. ޓްވިޓާއިން މިހާރު ބޭން ކޮށްލާފައިވާ ކަންގްނާއާ ބެހޭގޮތުން ތާޕްސީ ބުނީ ކަންގްނާ ޓްވިޓާގައި ނެތަސް އެއްވެސް އެއްޗެއް ހިތަށް ނާރާ ކަމަށާއި އޭނާއަކީ އެއްވެސް މީހެއް ނޫން ކަމަށެވެ.
ކަންގްނާއާ ބެހޭގޮތުން އެއްޗެއް ބުނެފިނަމަ، ޚާއްސަކޮށް އިންޑަސްޓްރީގެ މީހަކު އެއްޗެއް ބުނެފިނަމަ، އެކަން ކަންގްނާއަށް ނޭނގިއެއް ނުދާނެކަން ގިނަ މީހުންނަށް އެނގެއެވެ. ތާޕްސީ ވެސް މިފަދައިން ބުނިކަން އެނގިގެން ކަންގްނާ ރުޅިއައިސްގެން ބުނީ ތާޕްސީ އުޅެނީ ފެންވަރު އޮޅިގެން ކަމަށާއި މިއަދު ކަންގްނާއަކީ އެއްވެސް މީހެއް ނޫން ކަމުގައި ބުނި އިރު، އޭނާއަކީ ކަންގްނާ ނުކުޅެން ދޫކޮށްލާ ފިލްމުތައް ކުޅެން އޭނާއަށް ދިނުމަށް ޕްރޮޑިއުސަރުން ކައިރީ އާދޭސް ކުރި މީހެއް ކަމަށެވެ. އެހެންކަމުން އެއްވެސް މީހެއް ނޫން ކަމުގައި ބުނެވެން ނެތް ކަމަށް ވެސް ކަންގްނާ ބުންޏެވެ.
"އާކޭން 2" ނުކުޅެން އަމީތާބު ނިންމުމުން އެ ފިލްމު ބަންދު!
ދެ ހާސް ދެވަނަ އަަހަރު ނިކުތް ކާމިޔާބު އެއް ފިލްމު ކަމަށްވާ "އާކޭން" ގެ ދެވަނަ ބައެއް ހެދުމުގެ މަސައްކަތް ފެށިފައިވާ ކަމަށް 2016 ވަނަ އަހަރު ވަނީ އިއުލާނު ކޮށްފައެވެ.
ނަމަވެސް އެ އިއުލާނަށް ފަހު އެކިއެކި މައްސަލަތައް ޖެހެން ފެށުމުގެ ސަބަބުން "އާކޭން 2" ގެ މަސައްކަތް ވަނީ ނުނިންމިފައެވެ.
އަމީތާބް ބަޗަން، އަނީލް ކަޕޫރް، އަރްޝަދު ވާރްސީގެ އިތުރުން ރެޖީނާ ކަސަންދްރާ ހިމެނޭ އެ ފިލްމުގެ މަސައްކަތަށް އެކިއެކި ގޮންޖެހުންތައް ކުރިމަތިވަމުން ގޮސް ދެން އިވުނީ ފިލްމުގެ އެއް ލީޑް ކަމުގައިވާ އަމީތާބު އެ ފިލްމު ދޫކޮށްލި ޚަބަރެވެ. އެކަން ޔަގީން ކޮށްދެމުން "އާކޭން 2" ގެ ޑައިރެކްޓަރ އަބީނޭ ޑިއޯ ބުނީ އެ ފިލްމު ދެން ވުޖޫދަށް ނާންނާނެ ކަމަށާއި އެއްކޮށް ބަންދު ކޮށްލީ ކަމަށެވެ.
Ads by STO
