ހަމަލާގެ ރިޕޯޓްގައި ސިއްރު ކުރި މައުލޫމާތު އާއްމުވެއްޖެ

މިދިޔަ މެއި މަހުގެ 6 ވަނަ ދުވަހު ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދަށް އަމާޒުކޮށްގެން ދިން ނިރުބަވެރި ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ކުރިއަށް ގެންދިޔަ އިންކުއަރީގެ ފައިނަލް ރިޕޯޓްގައި ސިއްރުކޮށްފައިވާ މައުލޫމާތު އާއްމުވެއްޖެއެވެ.

Ads by MWSC

އިއްޔެ ހާމަކުރި މި ރިޕޯޓްގައި ހުރި ގައުމީ ސަލާމަތާ ގުޅުން ހުރި މައުލޫމާތުތައް ވަނީ ސިއްރުކޮށްފައެވެ. މިގޮތުން ރައީސް ނަޝީދަށް ސެކިއުރިޓީ ދިނުމާ ގުޅުން ހުރި އެތައް މައުލޫމާތަކާއި ހައި ސެކިއުރިޓީ މީހުންނަށް ސެކިއުރިޓީ ދިނުމާއި ޖާސޫސީ މައުލޫމާތު އެއްކުރުމާއި އެ މައުލޫމާތު ބޭނުންކުރާ ގޮތް ފަދަ އެތައް މައުލޫމާތެއް އިއްޔެ އާއްމުކުރި ރިޕޯޓުގައި ވަނީ ސިއްރުކޮށްފައެވެ.

ރައީސް މުޙައްމަދު ނަޝީދަށް ބަޔަކު ފާރަލާކަމުގެ މަޢުލޫމާތު އެމް.އެން.ޑީ.އެފްއަށް ލިބިފައިވާ ކަމަށާއި އެމް.އެން.ޑީ.އެފްއަށް ލިބިފައިހުރި މަޢުލޫމާތަށް ބަލާއިރު ރައީސް މުޙައްމަދު ނަޝީދަށް ދީނީ ހަރުކަށި ފިކުރުގެ ބަޔަކު ފާރަލިކަން އެމް.އެން.ޑީ.އެފްއަށް އެނގިފައިވާކަމަށް ރިޕޯޓުގައި ފާހަގަކޮށްފައިވެއެވެ. އަދި މި އިންކުއަރީއަށް މަޢުލޫމާތުދިން ޑީ.އައި.އެސް މާހިރުންގެ ބަހުންނާއި، އެމް.އެން.ޑީ.އެފްއިން ފޮނުވައިފައިވާ ލިޔެކިޔުމުން މިކަން ކަށަވަރުވާ ކަމަށާއި މި އިންކުއަރީއަށް މަޢުލޫމާތު ލިބިފައިވާގޮތުގައި ދިވެހިރާއްޖޭގެ ހައި ލެވެލް ޓާގެޓަކަށް އަމާޒުކޮށް ހަމަލާއެއް ދިނުމަށް ރާވަމުންދާކަމުގެ މަޢުލޫމާތު ޑިސެންބަރު 22، 2020 ވަނަ ދުވަހު ލިބިފައިވާ ކަމަށާއި، ރައީސް މުޙައްމަދު ނަޝީދަށް ހަރުކަށި ފިކުރުގެ ފަރާތްތަކުން ސަރވައިލްކުރަމުން ދާކަމުގެ މަޢުލޫމާތު ލިބިފައިވާކަމަށް އެމް.އެން.ޑީ.އެފްއިން މި އިންކުއަރީއަށް މަޢުލޫމާތު ދީފައިވާކަމަަށް ވެސް ރިޕޯޓުގައި ވަނީ ވިދާޅުވެފައެވެ.

އެހެންނަމަވެސް އެމަނިކުފާނުގެ ސެކިއުރިޓީއާއި ގުޅުން ހުރި ގިނަ މައުލޫމާތުތައް ވެސް މި ރިޕޯޓުގައި ވަނީ ސިއްރުކޮށްފައެވެ. ރައްޔިތުންގެ މަޖިލީހުން އާންމުކޮށްފައި ވަނީ ރިޕޯޓުގައިވާ ޤައުމީ ސަލާމަތާއި ގުޅުން ހުރި ބައިތައް އުނި ކުރުމަށް ފަހު ނަމަވެސް މި ރިޕޯޓުގެ އަސްލު ރިޕޯޓު (ސިއްރު ކޮށްފައި ނުވާ ރިޕޯޓު) ހިއްސާ ކުރުމަށް ނިންމައިފައި ވާނީ ރައީސުލްޖުމްހޫރިއްޔާ އަށާއި ރައްޔިތުންގެ މަޖިލީހުގެ ރައީސްއަށާއި އުއްތަމަ ފަނޑިޔާރަށްކަން ވެސް އިއްޔެ އާންމުކުރި ރިޕޯޓުގައި ބަޔާންކޮށްފައިވެއެވެ.