ފާޑުކިޔުންތައް ރައީސް ޞާލިހަށް އަމާޒު ވަނީ އެއީ އެންމެ ނުފޫޒު ގަދަ މީހާއަށް ވީމަ: ރީކޯ
ރާއްޖޭގެ ސިޔާސީ މަސްރަހުގައި މިވަގުތު ހުރި އެންމެ ނުފޫޒުގަދަ މީހަކީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްކަމަށް އެމްޑީޕީގެ ކުރީގެ ޗެއަރޕާރސަން މޫސާ މަނިކު (ރީކޯ) ވިދާޅުވެއްޖެއެވެ.
ރީކޯ މިރޭ ކުރެއްވި ޓްވީޓެއްގައި ވިދާޅުވީ ރާއްޖޭގެ ސިޔާސީ މަސްރަހުގައި މިވަގުތު ހުރި އެންމެ ނުފޫޒުގަދަ މީހެއްގެ ގޮތުގައި ފެންނަނީ ރައީސް ޞާލިޙްކަން ސިޔާސީ އެންމެން ވެސް ގަބޫލު ކުރާކަމަށެވެ. މިހެން ވިދާޅުވެ ރީކޯ ވިދާޅުވީ ބަޔަކު ޕާޓީއެއް ހެދިޔަސް، އަމިއްލަ ޕާޓީ ތެރެއިން ބޮޑާ ހޭކިޔަސް، އަދި އިދިކޮޅުން ރައްދެއް ދިނަސް އަމާޒު ވަނީ ހަމަަ ރައީސް ޞާލިޙާ 2023ގެ ރިޔާސީ އިންތިޚާބާ އަޅުވައިފައި ކަމަށެވެ.
ރީކޯ ، ރައީސް ޞާލިޙަށް ތަޢުރީފްކޮށްފައި މި ވަނީ އެމްޑީޕީގެ ރައީސް، ރައީސް ނަޝީދާއި ރައީސް ޞާލިޙްއާ ޚިޔާލު ތަފާތުވުންތަކެއް ހުރި ކަަމަށް ރައީސް ނަޝީދު ވިދާޅުވެފައިވާ ދަނޑިވަޅެއްގައެވެ.
އެމްޑީޕީގެ ވަޓްސް އެޕް ގްރޫޕްއަކަށް ރައީސް ނަޝީދު މިއަދު ފޮނުއްވި މެސެޖެއްގައި ވިދާޅުވެފައި ވަނީ ރައީސް ޞާލިހްއާ އެއްވެސް މައްސަލައެއް ނުޖެހޭ ކަމަށާއި ނުވެސް ޖެހޭނެ ކަމަށެވެ. ނަމަވެސް އެމަނިކުފާނާއި ރައީސް ޞާލިޙް މިހާރު ފިކުރީގޮތުން ޚިޔާލު ތަފާތުކަމަށް ވެސް ރައީސް ނަޝީދު ވިދާޅުވިއެވެ.
"އަޅުގަނޑުމެންގެ ޒާތީ ކަންކަމުގައި އަބަދުވެސް އުޅޭނީ އެކީގައި، އަޅުގަނޑުގެ ދަރިންގެ އިބޫ ދޮންބެ އެއީ. އެކަމަކު ދެން ރައީސުލްޖުމްހޫރިއްޔާއާ އެކީ ސިޔާސީ ގޮތުން ހުރެވޭކަށް ނެތް" ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ އެމްޑީޕީގެ ބައެއް ބޭފުޅުން ހިތްހަމަ ނުޖެހުނަސް ކުރާނެ ކަމެއް ނެތް ކަމަށާއި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްއާއި ޕީޕީއެމްއިން މެދުމިނުގެ ދީނީ ސިޔާސަތަށް ތާއީދު ކުރާނަމަ އެމަނިކުފާނު އެބޭފުޅުންގެ އެހީއަށް އެދިލައްވާނެ ކަމަށެވެ.
