ވަރުން ކިޔައިދިނީ ރަންވީރް އަދި ރޯހިތުއާ އެކު މަސައްކަތް ކުރުމުގައި ހޭދަވި މަޖާ ވަގުތުތައް
ފިލްމު "ފަކްރޭ"އިން މަޝްހޫރުވި ވަރުން ޝަރްމާ ދެން އެންމެ އަވަހަށް ފެނިގެން ދާނީ ރޯހިތު ޝެޓީ އުފައްދާ "ސާކަސް" އިންނެވެ. އެ ފިލްމުގައި އޭނާއާ މަސައްކަތް ކުރަނީ ބޮލީވުޑްގެ މަޝްހޫރު ފިލްމީ ތަރި ރަންވީރް ސިންގްއާ އެކު ކަމަށް ރިޕޯޓުތަކުން ބުނެފައިވެއެވެ. ފިލްމުގައި މި ދެ ތަރިންގެ އިތުރުން ހަރަކާތްތެރި ވާނީ ޕޫޖާ ހެގްޑޭ، ޖެކްލިން ފާނަންޑެޒް، ސިދާތާ ޖާދަވް، ޖޯނީ ލިވަރ، ސަންޖޭ މިޝްރާ، ރާޖޭޝް ހިޖްރީ، ވިޖޭ ޕަޓްކާރް ގެ އިތުރުން ސުލްބާ އާރްޔާ، މުކޭޝް ތިވާރީ، އަނިލް ޗަރަންޖީތު، އަޝްވިނީ ކަލްސެކަރް އަދި މޫރްލީ ޝަރްމާއެވެ.
ފިލްމާ ބެހޭގޮތުން އިންޑިއާގެ މީޑިއާއަކަށް މައުލޫމާތު ދެމުން މި ފިލްމުގައި މުހިންމު އެއް ރޯލުން ފެނިގެންދާ ވަރުން ބުނީ ރޯހިތު މުޅި ޓީމާ އެކު މަސައްކަތް ކުރަން ލިބުނު މި ފުރުސަތަކީ އޭނާއަށް ކުރެވުނު ވަރަށް ތަފާތު އަދި ވަރަށް މަޖާ ތަޖުރިބާއެއް ކަމަށެވެ.
ފިލްމުގެ ޝޫޓިންގް ތެރޭގައި ރަންވީރްއާއި ވަރުން އެކި ކަހަލަ މިޔުޒިކް އަޑު އަހާ ނެށި ކަމަށާއި، ތަފާތު އެކި މިޔުޒިކް އެކަކު އަނެކަކަށް ތައާރަފް ކޮށްދިން ކަމަށް ވެސް ވަރުން ބުންޏެވެ. އޭގެ އިތުރުން ޝޫޓިންގަށް ފަހު ވެސް މަޖާ ކުރުމުގައި ވަގުތު ހޭދަ ކުރި ކަމަށާއި ރޯހިތު ވެސް އެ މީހުންގެ މަޖަލުގައި ބައިވެރިވި ކަމަށް ވަރުން ބުންޏެވެ.
"ސާކަސް" ބެލުންތެރިންނާ ހަމައަށް ވަރަށް އަވަހަށް އަންނާނެ ކަމަށާއި މި ފިލްމު ވެގެން ދާނީ އެތައް ބަޔަކަށް ކަމުދާނެ ފިލްމެއް ކަމުގެ ޔަގީންކަން ވެސް ވަރުން ވަނީ ދީފައެވެ.
