މަޖިލީހުގެ އިދާރާ ދޮށުގައި އިޙްތިޖާޖް ކުރެއްވި ސަބަބު ޖާބިރު ކިޔައިދެއްވައިފި

އިއްޔެ ރައްޔިތުންގެ މަޖިލީހުގެ އިދާރާގެ ދޮރުމަތީގައި އޮށޯއްވެ އޮންނަވައި އިޙްތިތާޖް ކުރެއްވި ސަބަބު ކާށިދޫ ދާއިރާގެ މެމްބަރު ޢަބްދުالله ޖާބިރު ހާމަކުރައްވައިފިއެވެ.

Ads by STELCO

އިޙްތިޖާޖް ކުރި ސަބަބާ ގުޅޭ ގޮތުން "ދެން"އިން ޖާބިރުއާ ސުވާލު ކުރުމުން ވިދާޅުވީ، އިއްޔެ މަޖިލީހުގެ އިދާރާއަށް އެމަނިކުފާނު ވަޑައިގަތީ، އެމަނިކުފާނުގެ އަނބިކަބަލުން ދިޔާނާ ސައީދު، އޭނާގެ ސެކްރެޓަރީގެ މަޤާމަށް އައްޔަން ކުރުމަށް ކަމަށެވެ. އަދި ވަޑައިގަތީ މަޖިލީހުން އަންގައިގެން ކަމަށް ވެސް އޭނާ ވިދާޅުވިއެވެ.

"ރައްޔިތުންގެ މަޖިލީހުގެ އިދާރާއަށް އަޅުގަނޑު ދިޔައީ، ރައްޔިތުންގެ މަޖިލީހަކީ ރިސެސްގައި އޮންނަ އިރުގައި ވެސް މެންބަރުންގެ އޮފީސްކޮޅު ހުރޭ، އަދި މަސައްކަތް ކުރެވޭ (ތަނެއް)." ޖާބިރު ވިދާޅުވީ މަޖިލީހަށް ވަޑައިގަތުމުން އެތަނުގައި އިން ކުއްޖާ ޖާބިރުއަށް މުޚާތަބުކޮށް 'ލޮލީ' ޖާބިރުއޭ ވިދާޅުވި ކަމަށެވެ.

"އަޅުގަނޑު މަސައްކަތަށް ދިޔާމަ ކޭބަލް އޮފީހުގައި އިން ކުއްޖާއަށް ބުނެވުނީ 'ލޮލީ ޖާބިރު'އޭ. ދެން އެ ހިސާބުން އަޅުގަނޑު ބުނީ އިއްޒަތްތެރި މެންބަރު ކިޔައިގެން މުޚާތަބު ކުރާށޭ."

ޖާބިރު ވިދާޅުވީ މެންބަރަކާ ދިމާލަށް އެފަދަ ގޮތަކަށް މުޚާތަބު ނުކުރެވޭނެ ކަމަށާއި އެ މުވައްޒިފަށް ދުވަހަކު ވެސް މަޢާފެއް ނެތް ކަމަށެވެ.

މިކަމާ ގުޅޭ ގޮތުން ސުވާލު ކުރުމުން މަޖިލީހުގެ އިދާރާއިން ވިދާޅުވީ، މަޖިލީހުގެ އެއްވެސް މުވައްޒަފަކު ޖާބިރަށް ނިސްބަތްކޮށް އެއްވެސް އެއްޗެއް ނުބުނާ ކަމަށެވެ.

ޖާބިރުގެ ވާހަކަފުޅުގައި އިތުރަށް ވިދާޅުވީ، އެ މަނިކުފާނު އިޙްތިޖާޖް ކުރެއްވީ އިތުރު ދެ ސަބަބަކާ އެކުގައި ވެސް ކަމަށެވެ. އެއީ ރައީސް ނަޝީދުގެ ބަލި ހާލުކޮޅާ ހެދި މަޖިލީހުގެ ރައީސްކަމަށް ކުފޫ ހަމަނުވާތީ އެ މަނިކުފާނު މަޤާމުން ދުރު ކުރުމާއި އިންޑިއާއަށް ރާއްޖެ ވިއްކައިލައިފައި ވާތީ ފޮރިން މިނިސްޓަރު ޝާހިދުއާއި، ޑިފެންސް މިނިސްޓަރު މާރިޔާގެ އިތުރުން މޭޖާ ޖެނެރަލް ޝަމާލު މަޖިލީހުގެ އިދާރާއަށް ހާޒިރު ކުރުމާ ގުޅިގެން ކަމަށެވެ.

"އަޅުގަނޑު ތާއީދެއް ނުކުރަން ރައީސް މުޙައްމަދު ނަޝީދު މަޖިލީހުގެ ރައީސް ކަމުގައި ހުންނާކަށް. އެއީ އޭނާ ބަލިކަމުން. އޭނަ އެބަ ޖެހޭ މަޤާމުން ދުރުކުރަން. ދެވަަނަ ކަމަކީ ޝާހިދު، ރާއްޖެ އިންޑިއަށް ވިއްކައިލައިފި. އުތުރުތިލަފަޅުގައި މިލިޓަރީ ބޭހެއް އަޅަން ނިންމައިފި. މާރިޔާއާއި ޝާހިދުއާއި ޖެނެރަލް ޝަމާލުއާ އެބަ ޖެހޭ ކޮމިޓީތަކަށް ގެނެސް އެމީހުންނާ ސުވާލު ކުރަން." ޖާބިރު ވިދާޅުވިއެވެ.

ޖާބިރު ވިދާޅުވީ، އިދިކޮޅު ފަރާތްތަކާ އެކު މިކަންތައް ކުރުމަށް އޭނާ ހުންނެވީ ތައްޔާރަށް ކަމަށާއި މަޖިލީހުގެ އިދާރާއަށް ޖާބިރު ނުވެއްދީ ބިރުން ކަމަށެވެ.

ޖާބިރުގެ ވާހަކައިގައި އޭނާ ވަނީ 2023ވަނަ އަހަރު އިންތިޚާބުގައި ވާދަ ކުރައްވާނެކަން ހާމަ ކުރައްވައިފައެވެ. މިގޮތުން ވިދާޅުވީ، އެމަނިކުފާނުގެ ވެރިކަމެއްގައި އިންޑިއާއާ ްއެކި އެއްވެސް ގުޅުމެއް ނުބާއްވާނެ ކަމަށާއި މޯދީއަކީ މުސްލިމުންނަށް އަނިޔާވެރިވަމުން އަންނަ ވެރިއެއް ކަަމަށެވެ. އަދި އިންޑިއާއާ އެކު ގުޅުން ބޭއްވުމުގެ ހިތި މޮރިޝަސް އަދި ކަޝްމީރު ފަދަ ތަންތަނުން ފެންނަ ކަމަށް ޖާބިރު ވިދާޅުވިއެވެ.