ދަރިވަރުންނަށް ވެކްސިން ދިނުމުގައި ބެލެނިވެރިންގެ އިއުތިރާޒެއް އޮތްތޯ ބަލަނީ
ރާއްޖޭގެ ސުކޫލުތަކުގައި ކިޔަވާ ދަރިވަރުންނަށް ކޮވިޑް-19 ވެކްސިން ދިނުމުގައި ބެލެނިވެރިންގެ އިއުތިރާޒެއް އޮތްތޯ ބެލުމަށް އެޑިއުކޭޝަން މިނިސްޓްރީން ރާއްޖޭގެ ސުކޫލުތަކަށް އަންގައިފިއެވެ.
އެޑިޔުކޭޝަން މިނިސްޓްރީން ސުކޫލުތަކަށް އެނގި އެންގުމުގައި ސުކޫލުތަކުގައި ކިޔަވާ 12 އަހަރުން މަތީގެ ދަރިވަރުންގެ ލިސްޓެއް ފޮނުވަން ވެސް ސުކޫލުތަކަށް ވަނީ އަންގައިފައެވެ. އަދި ކުދިންނަށް ވެކްސިން ދިނުމުގައި ބެލެނިވެރިންގެ އިއުތިރާޒެއް އޮތްތޯ ބެލުމަށް ވެސް ސުކޫލުތަކަށް ވަނީ އަންގައިފައެވެ.
ރާއްޖޭގައި 12 އަހަރުން މަތީގެ ކުދިންނަށް ވެކްސިން ޖެހުމުގެ ހުއްދަ ދީފައިވާއިރު މިކުދިންނަށް ދޭނީ ފައިޒާ ވެކްސިންކަމަށް ވެސް މައުލޫމާތު ލިބެއެވެ.
ރާއްޖޭގައި މިހާރު ފައިޒާ ވެކްސިން ވެކްސިން ޖަހައިދިނުމަށް ހަމަޖެހިފައި ވަނީ، އުމުރުން 12 އަހަރާއި 17 އަހަރާ ދެމެދުގެ ކުޑަކުދިންނަށާއި ކޮވިޝީލްޑް ވެކްސިންގެ ފުރަތަމަ ޑޯޒް ޖެހި ފަހުން މާބަނޑުވުމުން ވެކްސިން ފުރިހަމަ ނުކުރެވި ތިބި މީހުންނަށާއި އެއްވެސް ވެކްސިނެއް ނުޖަހާ ތިބި މާބަނޑު މީހުންނަށާއި ހަށިގަނޑުގައި ދިފާއީ ނިޒާމް ދެރަވާ ފަދަ ބައްޔަކަށް ބޭސްކުރާ މީހުންނަށާއި ރާއްޖެއިން ބޭރުގައި ފައިޒާ ވެކްސިން ޖަހައިފައި ތިބި ދިވެހިންނަށާއި ބޭރަށް ކިޔަވަން ދާ ދަރިވަރުންގެ ތެރެއިން ފައިޒާ ނޫން ވެކްސިން ގަބޫލު ނުކުރާ ގައުމުތަކަށް ދާ ދަރިވަރުންނަށެވެ.
ރާއްޖޭގެ ހުރިހާ ރައްޔިތުންނަކީ ވެކްސިން ފުރިހަމަކޮށްފައިވާ ބަޔަކަށް ހެދުމަށް ސަރުކާރުން ވަނީ ބޮޑު ކެމްޕެއިނެއް ފަށައިފައެވެ. އަދި ކިޔެވުން މެދުކެނޑުމެއް ނެތި ކުރިއަށް ގެންދިޔުމަށް ޓަކައި ސުކޫލުތަކުގައި މަސައްކަތްކުރާ ފަރާތްތަކުން ވެކްސިން ޖެހުމުގެ ކެމްޕޭނެއް ވެސް ވަނީ ފަށައިފައެވެ. އަދި ވެކްސިން ފުރިހަމަ ނުކުރާ ފަރާތްތަކަށް ސުކޫލުތަކަށް ނުވަދެވޭނެކަމަށް ވެސް އެޑިޔުކޭޝަން މިނިސްޓްރީ ވަނީ ބުނެފައެވެ.
