ކަރީނާގެ ދެވަނަ ދަރިފުޅުގެ އަސްލު ނަމަކީ "ޖެހް"އެއް ނޫން؟
ބޮލީވުޑްގެ ކާމިޔާބު ތަރިން ކަމުގައިވާ ސައިފް އަލީ ހާންއާއި ކަރީނާ ކަޕޫރުގެ ދެވަނަ ދަރިފުޅުގެ ނަން މިހާތަނަށް ރަސްމީކޮށް އިއުލާނުކޮށްފައެއް ނުވެއެވެ. އެހެން ނަމަވެސް ކަރީނާގެ ބައްޕަ ރަންދީރު ކަޕޫރު ވަނީ އޭނާގެ ކާފަ ދަރިފުޅުގެ ނަމަކީ "ޖެހް" ކަމަށް ވަރަށް ފަހުން މީޑިޔާގައި ބުނެފައެވެ.
ދާދި ފަހުން ކަރީނާ ރިލީޒް ކުރި އޭނާގެ މާބަނޑު ދުވަސްވަރާ ބެހޭ ފޮތެއްގެ ފޮޓޯއެއްގެ ކެޕްޝަންގައި އޭނާގެ ދެވަނަ ދަރިފުޅުގެ ނަމަކަމަށް ބޭނުންކޮށްފައި ވަނީ "ޖެހަންގިރު" ކަމަށް ރިޕޯޓްތައް ބުނެއެވެ. މިފޮތުގައި ކަރީނާ އޭނާ ދެވަނަ ދަރިފުޅުގެ ނަމުގެ ގޮތުގައި ބޭނުންކޮށްފައި ވަނީ "ޖެހް" ކަމަށްވެސް އިންޑިޔާގެ މީޑިޔާތަކުން ވަނީ ބުނެފައެވެ.
ކަރީނާއާއި ސައިފްގެ ފުރަތަމަ ދަރިފުޅު ތައިމޫރުގެ ނަން މީޑިޔާގައި އާއްމު ކުރުމުން ވެސް އެ ދެމަފިރިންނަށް ވަނީ ފާޑުކިޔުންތައް އަމާޒުވެފައެވެ. އެގޮތުން ތައިމޫރުއަކީ އިންޑިޔާގައި ވެރިކަން ކުރި ތުރުކީގެ އަނިޔާވެރި ރަސްކަލެއްކަމުގައި ބުނެ ގިނަ ފާޑުކިޔުންތަކެއް އެ ދެމަފިރިންނަށް އަމާޒުވިއެވެ.
އަދި"ޖެހަންގިރު"އަކީ ވެސް ތުރުކީގެ އުސްމާނީ ހިލާފަތުގެ ރަސްކަލެއްގެ ނަމެކެވެ.
ކަރީނާ ދެވަނަ ދަރިފުޅަށް ބަލިވެއިންކަން މީޑިޔާގައި ހާމަކޮށްފައި ވަނީ 2020 ވަނަ އަހަރުގެ އޯގަސްޓު މަހުގައެވެ. ދަރިފުޅު އުފަންވެފައި ވަނީ މި އަހަރުގެ ފެބްރުއަރީ މަހުގެ 21 ވަނަ ދުވަހުއެވެ.
