މެމްބަރުން އިތުރުކުރުމަށް އެމްއެންޕީން 11 ފޯކަލް ޕޮއިންޓު
ރަައްޔިތުންގެ މަަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ ހުންނަވައިގެން އުފައްދަން މަސައްކަތް ކުރައްވަމުން ގެންދަވާ މޯލްޑިވްސް ނޭޝަނަލް ޕާޓީއަށް 11 ފޯކަލް ޕޮއިންޓުން ހަމަޖައްސައިފިއެވެ.
މިކަން އިއުލާނު ކުރައްވައި ނޭޝަނަލް ޕާޓީގެ އިސްފަރާތެއްކަމުގައިވާ، ރައްޔިތުންގެ މަޖިލީހުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒް ކުރެއްވި ޓްވީޓެއްގައި ވިދާޅުވީ ކޮޅުމަޑުލު 11 ރަށަކަށް ޒިޔާރަތްކޮށް ޕާޓީގެ މައުލޫމާތު ހިއްސާ ކޮށްފައިވާކަމަށެވެ.
"އޮގަސްޓު 5އިން 12އަށް ކޮޅުމަޑުލަށް ކުރި ދަތުރުގައި އެ އަތޮޅުގެ 11 ރަށަކަށް ޒިޔާރަތްކޮށް ޕާޓީގެ މަޢުލޫމާތު ހިއްސާކޮށް އެރަށްރަށުގައި އެމްއެންޕީގެ ފޯކަލް ޕޮއިންޓްސް ވަނީ ހަމަޖެއްސިފައި." ރިޔާޒްގެ ޓްވީޓްގައި ވިދާޅުވިއެވެ.
މޯލްޑިވްސް ނޭޝަނަލް ޕާޓީ އުފައްދަނީ ކުރިއަށް އޮތް ރިޔާސީ އިންތިހާބުގައި ވާދަކޮށް ކާމިޔާބު ހޯދުމަށް ކަމަށް އެ ޕާޓީގެ އެއް ފައުންޑާ އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް ވަނީ ވިދާޅުވެފައެވެ. ރިޔާސީ އިންތިޚާބުގައި ވާދަ ކުރައްވާނެ ކަމަށާއި އަދި އިންތިހާބު ކާމިޔާބު ކުރައްވާނެ ކަމަށް ވިދާޅުވި ނަމަވެސް، އެ ޕާޓީން އިންތިހާބަށް ނެރޭނެ ކެނޑިޑޭޓަކާ މެދު ނާޒިމް ވަކި އެއްޗެއް ވިދާޅުވެފައެއް ނުވެއެވެ. ނަމަވެސް އެމަނިކުފާނު ވިދާޅުވީ ރިޔާސީ ޓިކެޓް ދޭނީ ޕާޓީން ބާއްވާ ޕްރައިމަރީ ކާމިޔާބު ކުރައްވާ ބޭފުޅަކަށް ކަމަށާއި ޕްރައިމަރީގައި ނާޒިމް ވެސް ވާދަކުރައްވާނެ ކަމަށް ވިދާޅުވިއެވެ.
