ސްޕަޓްނިކް ވެކްސިން ނުގަތުމަށް ސަރުކާރުން ނިންމައިފި
ރަޝިއާއިން ގަންނަން ނިންމައިފައިވާ ސްޕަޓްނިކް ވެކްސިންގެ ނުގަތުމަށް ސަރުކާރުން ނިންމައިިފިއެވެ.
ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވީ މިވަގުތު ރާއްޖެއަށް ބޭނުންވާ ވަރަށް ވެކްސިން ގެނެވިފައިވާ ކަމަށެވެ. ޑރ. ނަޒްލާ އިތުރަށް ވިދާޅުވީ، ވެކްސިން ގަތުމަށް ފައިސާގެ މުއާމަލާތެއް ކޮށްފައި ނުވާ ކަމަށެވެ. އެހެން ނަމަވެސް ދެގައުމުގެ ދެމެދުގައި ވެކްސިންއާ ގުޅޭގޮތުން މަޝްވަރާތަކެއް ކުރެވިފައިވާ ކަމަށް ވިދާޅުވިއެވެ.
ޑރ.ނަޒްލާ މިފަދައިން ވިދާޅުވެފައިވާއިރު މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ދެއްވި ޚިތާބުގައި ވިދާޅުވެފައި ވަނީ ވެކްސިން ގެނައުމަށް ކުރާ މަސައްކަތް ހުއްޓައިނުލާ ކަމަށާއި، ކުރިއަށް އޮތް ދެ ދުވަހުގެ ތެރޭގައި ރަޝިއާގެ ސްޕަޓްނިކް ވެކްސިންގެ ދެ ލައްކަ ޑޯޒަށް އޯޑަރުދޭން ނިންމައިފައިވާކަމަށެވެ.
ރަޝިއާގެ ސްޕަޓްނިކް ވެކްސިން ރާއްޖޭގައި ބޭނުން ކުރުމުގެ ހުއްދަ ދީފައި ވަނީ މެއި މަހުގެ 12ވަނަ ދުވަހުއެވެ. މިއީ ރާއްޖޭގައި ކޮވިޑް 19 ހާލަތުގައި ބޭނުން ކުރުމަށް ހުއްދަ ދީފައިވާ ހަތަރު ވަނަ ވެކްސިނެވެ.
ކޮވިޑް-19އިން ރައްކާތެރިވުމަށް ރާއްޖޭގައި ޖަހަނީ 3 ވައްތަރެއްގެ ވެކްސިނެކެވެ. އެއީ އިންޑިއާއިން ހަދިޔާ ކުރި ކޮވިޝީލްޑް ވެކްސިނާއި ޗައިނާއިން ހަދިޔާ ކުރި ސިނޮފާމް ވެކްސިންގެ އިތުރުން ފައިޒާ ވެކްސިނެވެ. އޭގެ ތެރެއިން އިންޑިއާއިން ހަދިޔާ ކުރި ވެކްސިންގެ ސްޓޮކް ހުސްވުމާއެކު، އެ ވެކްސިން އާންމުކޮށް މިހާރު ޖެހުން ވަނީ މެދުކަނޑައިލައިފައެވެ.
