ކެޕްޓަން އިހްސާން ނޭޝަނަލް ޕާޓީއަށް!
ދިވެހިރާއްޖެއާއި ދިވެހިންގެ ހައްޤުގައި މިހާރަށް ވުރެ ފުޅާ ދާއިރާއެއްގައި މަސައްކަތް ކުރުމަށްކަމަށް ވިދާޅުވެ އެމްއެންޑީއެފްގެ ކުރީގެ ކެޕްޓަން އަލީ އިހްސާން މޯލްޑިވްސް ނޭޝަނަލް ޕާޓީއާ ގުޅިވަޑައިގަންނަވައިފިއެވެ.
އެކަން އިއުލާނު ކުރައްވާ ކެޕްޓަން އިހްސާން މިއަދު ކުރެއްވި ޓްވީޓެއްގައި ވިދާޅުވީ ނެޝަނަލް ޕާޓީއަކީ ޒުވާނުންނަށް ފުރުސަތުއޮތް ޕާޓީއެއް ކަމަށެވެ.
"ދިވެހިރާއްޖެއާއި ދިވެހިންގެ ހައްޤުގައި މިހާރަށް ވުރެ ފުޅާދާއިރާއެއްގައި މަސައްކަތްކުރުމަށް، މޯލްޑިވްސް ނެޝަނަލް ޕާޓީގެ މެމްބަރަކަށްވެ ސިޔާސީގޮތުން ޤައުމަތް ހިދުމަތް ކުރުމަށް ނިންމައިފިން. މިޕާޓީއަކީ ޤައުމާއި ދޭތެރޭ އަޅުގަނޑު ވެސް ދެކޭގޮތަށް ދެކޭ، ޒުވާނުންނަށް ފުރުސަތު އޮތް ޕާޓީއެއް." ކެޕްޓަން އިހްސާންގެ ޓްވީޓްގައި ވިދާޅުވިއެވެ.
މޯލްޑިވްސް ނޭޝަނަލް ޕާޓީ އުފައްދަނީ ކުރިއަށް އޮތް ރިޔާސީ އިންތިހާބުގައި ވާދަކޮށް ކާމިޔާބު ހޯދުމަށް ކަމަށް އެ ޕާޓީގެ އެއް ފައުންޑާ އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް ވަނީ ވިދާޅުވެފައެވެ. ރިޔާސީ އިންތިޚާބުގައި ވާދަ ކުރައްވާނެ ކަމަށާއި އަދި އިންތިހާބު ކާމިޔާބު ކުރައްވާނެ ކަމަށް ވިދާޅުވި ނަމަވެސް، އެ ޕާޓީން އިންތިހާބަށް ނެރޭނެ ކެނޑިޑޭޓަކާ މެދު ނާޒިމް ވަކި އެއްޗެއް ވިދާޅުވެފައެއް ނުވެއެވެ. ނަމަވެސް އޭނާ ވިދާޅުވީ ރިޔާސީ ޓިކެޓް ދޭނީ ޕާޓީން ބާއްވާ ޕްރައިމަރީ ކާމިޔާބު ކުރައްވާ ބޭފުޅަކަށް ކަމަށާއި ޕްރައިމަރީގައި ނާޒިމް ވެސް ވާދަކުރައްވާނެ ކަމަށެވެ.
އެ ޕާޓީއަށް މެމްބަރުން އިތުުރުކުރުމުގެ މަސައްކަތް މިހާރު ދަނީ ކުރަމުންނެވެ. އެ ގޮތުން ނޭޝަނަލް ޕާޓީގެ އިސްފަރާތެއްކަމުގައިވާ، ރައްޔިތުންގެ މަޖިލީހުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒް މީގެ ކުރިން ކުރެއްވި ޓްވީޓެއްގައި ވިދާޅުވީ ކޮޅުމަޑުލު 11 ރަށަކަށް ޒިޔާރަތްކޮށް ޕާޓީގެ މައުލޫމާތު ހިއްސާ ކޮށްފައިވާ ކަމަށެވެ. އަދި އެ ރަށްރަށުން 11 ފޯކަލް ޕޮއިންޓުން އައްޔަން ކޮށްފައިވާކަމަށް ވެސް އޭނާ ވަނީ ވިދާޅުވެފައެވެ.
