އައްޑޫ ކޮވިޑް ހާލަތު ގޯސްވެ ފްރޮންޓްލައިނަށް ވޮލަންޓިއަރުން ހޯދަނީ

އައްޑޫ ސިޓީގެ ކޮވިޑް-19ގެ ހާލަތު ގޯސްވެ ކޮވިޑާ ގުޅުން ހުރި މަސައްކަތްތައް ކުރުމަށް އައްޑޫ ސިޓީން ފްރަންޓްލައިން ވޮލެންޓިއަރުން ހޯދަން އިއުލާނުކޮށްފިއެވެ.

އައްޑޫ އިކުއެޓޯރިއަލް ހޮސްޕިޓަލުން އިއްޔެކޮށްފައިވާ އިއުލާނެއްގައި ބުނެފައި ވަނީ ކޮވިޑް-19އާ ގުޅޭ މަސައްކަތުގައި ފްރަންޓްލައިން ވޮލެންޓިއަރުންގެ ގޮތުގައި ހަރަކާތްތެރިވުމަށް ޝައުޤުވެރިވާ ފަރާތްތަކަށް އެކަމުގެ ފުރުޞަތު އާންމުކޮށް ހުޅުވައިލައިފައިވާކަމަށެވެ. އަދި ކޮވިޑް-19 ހާލަތާ ގުޅުން ހުރި ކަންކަމުގައި ފްރަންޓްލައިން ވޮލެންޓިއަރުންގެ ގޮތުގައި މަސައްކަތް ކުރުމަށް ޝައުގުވެރިވާ ފަރާތްތަކުން މި މަހުގެ 7ވަނަ ދުވަހުގެ ކުރިން އެ ހޮސްޕިޓަލަށް ސިޓީ ފޮނުވުމަށް އެއިއުލާނުގައި ވަނީ އެދިފައެވެ.

"ކޮވިޑް-19އާ ގުޅޭ ކަންކަމުގައި ވޮލަންޓިއަރުންގެ ގޮތުގައި ހަރަކާތްތެރިވާން ޝައުޤުވެރިވާ ފަރާތްތަކުން 07 ސެޕްޓެމްބަރ 2021ވާ އަންގާރަ ދުވަހުގެ 13:00ގެ ކުރިން ސީވީއާ އެކު އެކަމަށް އެދި މިހޮސްޕިޓަލަށް ސިޓީ ހުށަހެޅުއްވުން އެދެމެވެ. މިހޮސްޕިޓަލުގެ އީމެއިލް [email protected] އަށް ފޮނުވާ ސިޓީ އަދި ސީވީ ވެސް ބަލައިގަނެވޭނެއެވެ." އިކުއެޓޯރިއަލް ހޮސްޕިޓަލުން ކޮށްފައިވާ އިއުލާނުގައި ބުނެފައިވެއެވެ.

Ads by Hajj Corporation

މީގެ އިތުރުން ވޮލަންޓިއަރުންގެ ގެގޮތުގައި ހަރަކާތްތެރިވާން ޝައުޤުވެރިވާ ފަރާތްތަކުން އެކަމާ ބެހޭ އިތުރު މަޢުލޫމާތު ހޯއްދެވުމަށް އެދޭ ނަމަ 6885046 ނަމްބަރ ފޯނަށް ގުޅުމަށް ވެސް އެއިއުލާނުގައި ވަނީ ބުނެފައެވެ.

އައްޑޫ ސިޓީގެ ގުޅިފައިވާ ރަށްތައް ކަމުގައިވާ ސ. ހިތަދޫ، ސ. މަރަދޫ، ސ.މަރަދޫފޭދޫ އަދި ސ.ފޭދޫ ވަނީ މިދިޔަ އޯގަސްޓުމަހުގެ 28 ވަނަ ދުވަހު މޮނިޓަރިންއަށް ލައިފައެވެ.